1 Lelo, kuwala vilyo vilavigwe nhambiko kwa jimalukolo, twanguvizela kota hetwe tweng'ha twanawo uwanzi, ila uwanzi awo wanguwaditaga wanhu wawe na kidaya, ila igano lyanguzenga. 2 Munhu yoneche yalingijesa kota kanguchizela chinhu, ndikomya, hachizelele kota vyoilingumgana kuchizela. 3 Ila yalingumgana Nguluwi, ayo kanguzeleka na Nguluwi.

4 Lelo, kuwala mbuli ya vilyo viwele navilavigwa kota nhambiko kwa jimalukolo, twanguvizela kota jimalukolo hajiwele chinhu muisi, twanguvizela kota Nguluwi ndo yumwe hela. 5 Hanga hana vinhu vilinguchemigwa milungu kuli isi ama kilanga, kahi wone ja baho milungu na wakulu wenji, 6 ila kwa hetwe hana Nguluwi yumwe hela, Mhaza, yalumbile vinhu vyeng'ha, yawele kwa chiwalo cha heye, hetwe twangikala. Kahi hana Mkulu yumwe hela, Yesu Kilistu, yawele kwa kukolela heye vinhu vyeng'ha navilumbigwa natwe twangikala kwa kukolela heye. 7 Ila hawele chila munhu yawele na uwanzi awu. Kwa vila hana wanhu wanji wawele nawajizowela jimalukolo, wanhu wawele mbaka mhela awu howolya vilyo wangijesa kota vilyo navilavigwa nhambiko kwa jimalukolo. Kwa vila majesa gawo ndo ng'hochele, wanguwichigwa ukokomu. 8 Ila chilyo hambe chiweze kutuwika habehi na Nguluwi. Wone tuleche kulya hambe tupunguchilwe na chinhu na wone tulye hambetonjezelwe chinhu.

9 Ila, milolele, aku kilejeha kwa hemwe kuleche kuwadita wawele na makundo mado wagwe kuli gehile. 10 Kwa vila munhu yawele majesa gake ndo ng'hochele wone yakone hegwe uwele na uwanzi kwangulya vilyo avyo mgati mwa ng'handa ya milungu, ndaze, hochikangaza kulya vilyo viwele navilavigwa nhambiko kwa jimalukolo? 11 Ahyo, ayo mng'holozo yawele na majesa ng'hochele, yawele Kilistu nakabagama kwa chiwalo cha heye, kokwajilila kwa chiwaalo cha uwanzi wa hegwe. 12 Wone modita gehile hali wang'holozenu kwa nzila ayi na kugalumiza majesa ga hewo gawele ng'hochele, mowa mumditile vibi Kilistu. 13 Ahyo, wone chilyo changwambuzaga kugwa kwa mng'holozangu, silya miwunde mazuwa gose, leka ndeche kumdita mng'holozangu yagwe kuli gehile.