1 Wang'holozangu, lombuyile kwa hemwe, siwadamlile uviso wa usenga wa Nguluwi kwa ndonga itanganiche ama kwa luhala lwa wanhu. 2 Londiwele kwa hemwe nasiganile kuvizela choneche ila kumzela Yesu Kilistu, ena, Kilistu yawambigwe. 3 Lombuyile kwa hemwe nandali ng'hochele, nandali ndikakama lukami kwa lunhwinhwi. 4 Kulonga kwa heni na kudamla kwa heni, hakuwele kwa ulonzi ulingunojeza na luhala ila kwa kutawizwa kwinji na mong'ho wa Muhe wa Nguluwi. 5 Nandita ahyo leka makundo ga hemwe getumbile mong'ho wa Nguluwi.

6 Ne ahyo twangulonga ndonga ya luhala kwa wala watanganiche kuli Muhe, ila luhala alo haluwele lwa kuli isi ayi ne haluwele lwa vilongozi wa kuli isi ayi wawele wa kuli ubanzi wa kwajilila. 7 Luhala lotulingutumiya ndo luhala lwa uviso wa Nguluwi, luhala luwele naluvisigwa luwele Nguluwi nakanuwila kulawila mwaluko kwa chiwalo cha welile wa hetwe. 8 Ndo luhala luwele vilongozi wa isi ayi hawaluzelele, kwa vila wahaluzelele hawalimuwamba Mkulu wa welile. 9 Ila ndo kota Maandiko Matakatifu vyogalingulonga,

"Mbuli ziwele iziho halina zona,

ne makutu kuhulika,

mbuli ziwele munhu hanawahika kijesa,

azo ndo Nguluwi zoyaziwichile goya kwa chiwalo cha wala walingumgana."

10 Azo ndo mbuli ziwele Nguluwi nakatugubulila kwa Muhe wa heye. Kwa vila Muhe kangulolaga goya chila chinhu mbaka mbuli za mgati ng'hatu za Nguluwi. 11 Whaani yalinguweza kuvizela mbuli za mgati mwa munhu wone haiwele muhe wa munhu ayo yuye? Hihyo du haduhu yalinguvizela mbuli za Nguluwi wone haiwele Muhe wa Nguluwi. 12 Lelo, hetwe hatumbochele muhe wa isi, ila natumbochela Muhe yalingulawa kwa Nguluwi leka yatuzelese gala gotupegwe na Nguluwi.

13 Lelo, hetwe twangulangusa, haiwele kwa ulonzi wotulangusigwe na luhala lwa munhu, ila kwa ulonzi wotulangusigwe na Muhe, twangulonga goya mbuli za Muhe kwa wala wawele na Muhe. 14 Munhu yalihela Muhe hambe yaweze kubochela mbuli zilingulawa kwa Muhe wa Nguluwi. Kwa vila ndo upoka kwa heye, kahi hambe yavizele kwa vila zanguzeleka kwa utanzi wa Muhe. 15 Ila munhu yawele na ayo Muhe kanguweza kugazela geng'ha, na haduhu munhu yoweza kumzela. 16 Maandiko Matakatifu gangulonga,

"Whaani yoweza kugazela majesa ga Mkulu?

Whaani yoweza kumlangusa Mkulu?"

Ila hetwe twanago majesa ga Kilistu.