1 Munhu yatone kota twa vitumagwa wa Kilistu tuwele natupegwa uviso wa Nguluwi. 2 Chilinguganigwa kwa yoneche yula yawele nakapegwa mijito ndo yawe wa kukundigwa. 3 Kwa heni haiwele chinhu wone ndotagusigwa na hemwe ama kuli chitala cha wanhu, nani hambe ndichitaguse. 4 Majesa ga heni ga goya kuli mbuli yoneche, ila alyo hambelilajile kota ndahela nongwa. Mkulu ndo yalingunhagusa. 5 Lelo, mleche kutagusa mbuli yoneche wone ung'hali mhela wake, mbeteze mbaka Mkulu hoyokuya. Heye koziwika hazelu mbuli za kuli jiza na kulajila kunuwila kwa nhumbula za wanhu. Aho chila yumwe kubochela lutogo lwake kulawa kwa Nguluwi.

6 Wang'holozangu, aga geng'ha gondonjile kuwala Apolo na kuwala heni ndo kwachiwalo cha hemwe leka milanguse kulawa kwa hetwe ulonzi awu, "Mibatilile gandichigwe." Hali hemwe hawe haduhu munhu yoneche yalingidaya kwa chiwalo cha munhu yumwe na kumbeza yunji. 7 Whaani yakuganilile hegwe? Kuna chinhu chachi hegwe chiwele haupegwe? Wone nakupegwa, lekachoni kwangidaya kota haupegwe?

8 Lelo, mwanago geng'ha gomlinguganigwa kupegwa! Mna lufufu! Namuwa wandewa ne utanzi wa hetwe! Wone mwahawele wandewa ng'hatu leka natwe tuwe wandewa hamwe na hemwe! 9 Kwa vila ndangona kota Nguluwi nakatudita hetwe watumigwa tuwe wanhu wa kuli kuduma, kota wanhu watagusigwe kubagama kuli chalanza, kwa vila natuditwa tuwe wanhu wa kulajilwa hali isi yeng'ha na hali wahilisi na wanhu. 10 Hetwe twa wapoka kwa chiwalo cha Kilistu, ila hemwe mna luhala kuli kilumba na Kilistu! Hetwe twa ng'hochele, hemwe mna mong'ho. Hemwe mwanguhulichizwa ila hetwe twangubezigwa. 11 Mbaka mhela awu, hetwe tuna nzala na ng'halu, twahela mivalo, twangutowigwa na twahela honhu ha kikala. 12 Twangukola mijito ng'hatu kwa moko ga hetwe. Hotulingupanjilwa, twangutambichiza na hotugazwa, twangwimilila, 13 Hotulonjelezwa kwa udesi, twangwidichila kwa uliholile. Mbaka mhela awu natuditilwa kota wavu wa kuli isi na chila munhu kangutona kota wavu.

14 Ndangwandika mbuli azi haiwele kwachiwalo cha kuwabasa soni ila kuwakanya kota wana wa heni wondiwaganile. 15 Hanga mowa na walangusa elufu kumi (10,000) kuli Kilistu ila mwahela wahaza wenji. Heni nandali mhaza wa hemwe kuli Yesu Kilistu kwa kuwegalila Mbuli Inojile.

16 Ahyo, ndanguwadedeza, mdite kota vyondilingudita heni. 17 Kwa chiwalo acho ndangumlajiza Timoteyi kwa hemwe. Heye ndo mwana wa heni yondilingumgana na wakukundigwa kuli kilumba na Mkulu. Kowadita hemwe mkumbuchile nzila yondilinguiwinza kuli kilumba na Kilistu, nzila yondilingulangusa chila honhu kuli vilundo vyeng'ha vya wanhu walingumkunda Kilistu.

18 Wamwe wa hemwe nawaluka kidaya wochijesa kota sikuya kahi kwa hemwe. 19 Ila hoyogana Mkulu ndokuya hima kwa hemwe, aho ndo molola kwa meho ga hemwe kota haiwele kuli chila chowalinguweza kulonga awo walingidaya ila kahi chila chowalinguweza kudita. 20 Kwa vila Undewa wa Nguluwi hauwele ndo ulonzi hela, ila ndo mong'ho. 21 Hemwe mwamule. Ndaze, mbuye kwa hemwe na ng'hobwa ama mbuye na nhumbula ya igano na uliholile?