1 Wone munhu yoneche wa hemwe kana kilewa na miyage, kanguweza ndaze kumlonjeleza kuli chitala cha wanhu wohambe wamdumbe Nguluwi honhu ha kumlonjeleza hali wanhu wa Nguluwi? 2 Ndaze, hamvizelele kota wanhu wa Nguluwi woitagusa isi yeng'ha? Wone isi yotagusigwa na hemwe, lekachoni hamlingutagusa mbuli ndodo? 3 Hamvizelele kota towatagusa wahilisi? Ndaze, haiwele mzidi wa mbuli za kikala aku? 4 Ahyo, wone hana kilewa hali hemwe kuwala mbuli kota azi, lekachoni mwanguluta kulonjeleza kwa watagusa wohawawele kuli ulongozi wa chilundo cha wanhu walingumkunda Kilistu?

5 Ndangulonga aga leka mone soni. Ndaze, hali hemwe haduhu munhu yawele na luhala lwa kuhega kwamula kilewa hali walingukunda? 6 Ila yalingukunda kangumlonjeleza miyage hali watagusa wohambe wakunde.

7 Ndikomya! Kilonjeleza hali hemwe kwangulajila kota namlemwela ng'hatu! Ndaze, haiwele goya kwa hemwe kubunzwa? Haiwele goya kusukulwa lufufu lwa hemwe? 8 Ila hemwe ndo mlingubunza na kusukula, ago geng'ha mwanguwaditila wang'holozenu. 9 Ndaze, hamvizelele kota wanhu wehile hawohalila Undewa wa Nguluwi? Mleche kihada! Wang'hondwa ne walingufugamila jimalukolo ne walinguwasa na walume wayao, 10 wahizi ne wabuhu ne walingugala ne walinguheha ne wabokaji ne walinguliga, hewo weng'ha hawowa kuli Undewa wa Nguluwi. 11 Wamwe wa hemwe namwali hiho, ila namusilwa gehile ga hemwe, namditwa welile na kuditigwa muwe wakukundigwa na kuhanyisigwa hamwe na Nguluwi kwa itagwa lya Mkulu Yesu Kilistu na kwa Muhe wa Nguluwi wa hetwe.

12 Munhu koweza kulonga, "Chila chinhu nachikundizwa kwa heni." Ena, ila haviwele vinhu vyeng'ha ndo vyamzidi. Ndangukunda kota chila chinhu nachikundizwa kwa heni ila hambe ngane kulongozwa na chinhu choneche. 13 Kwanguweza kulonga, "Chilyo ndo kwa chiwalo cha munda na munda ndo kwa chiwalo cha chilyo." Goya, ila Nguluwi koviwifya vyeng'ha vili. Lukuli lwa munhu haluwele kwa chiwalo cha ung'hondwa, ila kwa chiwalo cha kumkolela mijito Mkulu, naye Mkulu ndo kwa chiwalo cha lukuli. 14 Lelo, Nguluwi yawele nakamzilipula Mkulu kulawa kuli wabagame kotuzilipula natwe kwa ludali.

15 Ndaze, hamvizelele kota ng'huli za hemwe ndo vitomo vya lukuli lwa Kilistu? Ndaze, mwangijesa kota ndoweza kuhola honhu ha lukuli lwa Kilistu na kuhadita kuwa honhu ha lukuli lwa mng'hondwa? Ne hado! 16 Hamvizelele kota yelumbile na mng'hondwa kanguwaga lukuli lumwe naye? Kwa vila nayandichigwa, "Hewo weli wowa lukuli lumwe." 17 Ila yelumbile na Mkulu kanguwaga muhe umwe naye.

18 Miwiche kutali na ung'hondwa. Gehile geng'ha ganguditigwa hanze ha lukuli, ila mng'hondwa kanguditaga gehile mgati mwa lukuli lwake. 19 Ndaze, hamvizelele kota ng'huli za hemwe ndo ng'handa ya Muhe Yelile yawele ka mgati mwa hemwe, yawele namumbochela kulawa kwa Nguluwi? Lelo, hemwe mwa wa Nguluwi. 20 Namguligwa kwa sendi nyinji. Ahyo, ng'huli za hemwe zikole mijito ja kumtogola Nguluwi.