1 Hanga ndolonga kwa ndonga za wanhu na za wahilisi, wone siwele na igano, ndangiwhana kota lizi lya idebe lilihela chinhu ama nhogo. 2 Kahi, wone ndahawele na ndolendole uloli na kuvizela mbuli zeng'ha zivisigwe na kuwa na uwanzi weng'ha na wone ndoweza kuwa na makundo makulu ga kuweza kuhejeza vidunda, ila wone siwele na igano, siwele chinhu. 3 Wone ndolavya lufufu lwangu lweng'ha na kuwapa wazunwa, kahi wone ndolulavya lukuli lwangu leka lulakazwe, wone siwele na igano haduhu mzidi woneche wowele ndobochela.

4 Yawele na igano kangwimililaga, kangulajilaga isungu, yawele na ligano kahela maya, halingidaya na hawele mjuvi. 5 Yawele na igano kangunyenyetelaga, hambe yapale mzidi wa heye yuye hela na hambe yazudile himahima kahi hambe yawiche mnhumbula ya heye kukumbuchila kwa mbuli zihile, 6 hambe yasangalale kwa chiwalo cha wihe ila kangusangalalaga kwa chiwalo cha kukomya. 7 Yawele na igano kangwimililaga geng'ha na kanguwaga na makundo kuli mbuli zeng'ha na kangitumbilaga mbuli zeng'ha. 8 Igano lyahela kuduma. Wone hana ndolendole uloli, yoduma, wone hana ndolendole ya kulonga ndonga ya chijenzi, yomala, wone hana nyala, nayo yokwaga. 9 Kwa vila uwanzi wa hetwe hawenele na ndolendole ya hetwe ya kuwikula usenga wa Nguluwi hayenele. 10 Ila chila chitanganiche hochifika, vyeng'ha viwele havyenele vyokwaga.

11 Londiwele mwana nandonga chiwana, nandivizela chiwana, nandijesa chiwana. Ila sambi, hanga nda mkulu, mbuli za chiwana nandizileka. 12 Hotulinguchona sambi ndo kota kumeho kuli chilolelo, ila aho hamba tochiwona meho kwa meho. Sambi ndanguvizela hado hela, ila aho hamba ndovizela vyeng'ha goya, kota vila Nguluwi vyoyalingunzela. 13 Lelo, aga gadatu ndo golutilila kwimilila, makundo na kitumbila na igano, ila liwele likulu kusinda geng'ha ndo igano.