1 Igano ndo kuwe kunuwila kwa hemwe, ila mwanguganigwa kahi kubochela ndolendole za Muhe. Mwanguganigwa kuigana ng'hatu ndolendole ya kuwikula usenga wa Nguluwi. 2 Munhu yoneche yalingulonga kwa ndonga ya chijenzi, hambe yalonje na wanhu ila kangulonga na Nguluwi. Kwa vila haduhu munhu yoneche yalinguvizela kota kangulonga choni, kwa vila kangulonga kwa ludali lwa Muhe kuwala mbuli zivisigwe. 3 Ila yalinguwikula usenga wa Nguluwi kangulonga na wanhu kwa chiwalo cha kuwadita wawe nzinzili kuli makundo na kuwakangaza nhumbula na kuwahembuliza. 4 Yalingulonga kwa ndonga ya chijenzi kangiwikaga nzinzili heye yuye, ila yalinguwikula usenga wa Nguluwi kanguchiwikaga nzinzili chilundo cha wanhu walingumkunda Kilistu.

5 Lelo, nangana hemwe weng'ha mlonje kwa ndonga ya chijenzi, ila nangana ng'hatu hemwe weng'ha muwikule usenga wa Nguluwi, kwa vila yoneche yalinguwikula usenga wa Nguluwi ndo wakitumbila ng'hatu kusinda yalingulonga ndonga ya chijenzi, ila wone kabaho munhu yalinguweza kutang'ula ndonga ayo leka chilundo cha wanhu walingumkunda Kilistu chiwichigwe nzinzili kuli makundo. 6 Lelo, wang'holozangu, wone nambuye kwa hemwe na kulonga na hemwe kwa ndonga ya chijenzi, mwahapatile mzidi wachi? Hampata mzidi woneche ila wone ndowalonjela kuwala ugubulo wa Nguluwi ama ulonzi wa uwanzi ama usenga wa Nguluwi ama malanguso. 7 Mbaka vinhu vilihela ukomu vilingulavya lizi kota mluli ama chinanda. Ndaze, munhu kanguweza kuluzela lwimbo wone vinhu avyo hambe vilavye lizi hala hovitowigwa? 8 Na kuli ngondo, wone mhalamanda hambe lilavye lizi lilinguzeleka ndo whaani yochiwika goya kwa chiwalo cha ngondo? 9 Hihyo du kwa hemwe, wone molonga ulonzi wohambe uzeleche kuli nyhala za wanhu, wovizela ndaze chomlingulonga? Ulonzi wa hemwe wokwajilila hela. 10 Hana ndonga nyinji kuli isi, ila haduhu ndonga ilihela mana. 11 Ila wone sivizelele mana ya ndonga ilingulonjigwa na munhu yumwenga, ndowa mjenzi kwa munhu ayo naye munhu ayo kowa mjenzi kwa heni. 12 Hiho du kwa hemwe, kwa vila mwangugana kupegwa ndolendole ya Muhe, mikangaze ng'hatu kubochela ndolendole zilingutanza kuchikangaza chilundo cha wanhu walingumkunda Kilistu kuli makundo. 13 Ahyo, wawele na ndolendole ya kulonga ndonga ya chijenzi, walande leka waweze kutang'hula gala gowalingulonga. 14 Kwa vila, hondilanda kwa ndonga ya chijenzi, muhe wa heni ndo ulingulanda ila nyhala za heni hambe zikole chinhu. 15 Ndite choni lelo? Ndolanda kwa muhe kahi ndolanda kwa nyhala. Ndokwimba kwa muhe na ndokwimba kahi kwa nyhala. 16 Houmtogola Nguluwi kwa muhe wa hegwe hela, munhu yunji yawele hali nhing'hano ayo koweza ndaze kwidichila kulanda kwa hegwe kwa kulonga, "Ena," Wone havizelele choulonga? 17 Kulanda kwa hegwe kwa kulonga malumbo kwa Nguluwi kwanguweza kuwa kwa kukomya ng'hatu, ila hakuweza kumdita yawe nzinzili ayo munhu yunji.

18 Ndangulonga malumbo kwa Nguluwi kwa vila heni ndangulonga ng'hatu kwa ndonga ya chijenzi kusinda hemwe weng'ha. 19 Ila hali nhing'hano ya chilundo cha wanhu walingumkunda Kilistu, ndangugana ng'hatu kulonga ulonzi uchefu hela ulinguzeleka leka ndiwalanguse wanji, kusinda kulonga ulonzi winji ng'hatu wa ndonga ya chijenzi. 20 Wang'holozangu, mleche kuwa kota wana kuli kijesa kwa hemwe. Kuwala wihe, muwe kota vyali, ila kuwala kijesa yanguwagana muwe kota wanhu wakulu. 21 Nayandichigwa kuli Maandiko Matakatifu,

Mkulu kangulonga hino,

"Kwa nzila ya wawele ngulonga ndonga ya chijenzi,

na kwa milomo ja wajenzi,

ndolonga na wanhu awa,

hanga hawonyhulichiza."

22 Lelo, ndolendole ya kulonga kwa ndonga ya chijenzi ndo ulajilo, hauwele kwa chiwalo cha wanhu wawele na makundo, ila ndolendole ya kuwikula usenga wa Nguluwi ndo kwa chiwalo cha walingukunda, hauwele kwa chiwalo cha wanhu wohambe wakunde.

23 Lelo, chilundo cheng'ha cha wanhu walingumkunda Kilistu hochiting'hana hamwe na weng'ha kwaluka kulonga ndonga ya chijenzi, wone nawoye wanhu wa hihi hela ama walihela makundo, ndaze, hawolonga kota wanhu weng'ha wa chilundo acho wanalukwale? 24 Ila wone weng'ha wowa wowikula usenga wa Nguluwi, hoyokuya munhu wa hihi hela ama yalihela makundo, geng'ha gawele kohulika gotawiza wihe wa heye yuye, geng'ha gawele kohulika gomtagusa. 25 Uviso wa nhumbula ya heye wowichigwa hazelu, naye komfugamila Nguluwi yolonga, "Ndikomya, Nguluwi ka hamwe na hemwe."

26 Wang'holozangu, lelo tulonje choni? Homting'hana hamwe, yumwe wa hemwe yembe lwimbo, yunji yalavye malanguso, yunji kahi yawe na ugubulo ulawile kwa Nguluwi, yunji kahi yolonje kwa ndonga ya chijenzi na yunji yatang'hule chilingulonjigwa. Geng'ha gawe kwa chiwalo cha kuchikangaza chilundo cha wanhu walingumkunda Kilistu kuli makundo. 27 Wone wawe baho wanhu wadahile kulonga ndonga za chijenzi, walonje weli ama wadatu, waleche kuwa wenji, kahi yalonje yumweyumwe na yawe baho munhu wa kuwatang'hulila chowalingulonga. 28 Ila wone kuwe haduhu wa kutang'hula, lelo, yalingulonga ndonga ya chijenzi yanyamalile kuli nhing'hano, yalonje yaliyeka kuli nhumbula ya heye na Nguluwi. 29 Kwa wala wawele na ndolendole ya kulonga usenga wa Nguluwi, walonje weli ama wadatu, na wanji walole ulonzi wa hewo. 30 Wone yumwe hoyolonga na yunji yalinguhulichiza yapegwe ugubulo kulawa kwa Nguluwi mhela wuwo, lelo, yula yalingulonga yanyamalile. 31 Kwa vila weng'ha mwanguweza kuwikula usenga wa Nguluwi, yumwe mbaka yunji leka weng'ha milanguse na kukangazwa nhumbula. 32 Ndolendole ya kuwikula usenga wa Nguluwi, yanguganigwa ilongozwe na yawele na ndolendole ayo. 33 Kwa vila Nguluwi hawele Nguluwi wa kilewa, ila ndo Nguluwi wa kikala goya. Kota vyoyili kuli nhing'hano zeng'ha za welile, 34 wadala wanguganigwa wanyamalile kuli nhing'hano za vilundo vya wanhu walingumkunda Kilistu. Hambe wakundizwe kulonga, ila wanguganigwa kunyenyetela kota malajizo vyogalingulonga. 35 Wone wangugana kuuza kuwala mbuli yoneche, wanguganigwa kuwauza walume wa hewo haluga ha hewo, kwa vila ndo soni kwa wadala kulonga kuli nhing'hano ya chilundo cha wanhu walingumkunda Kilistu.

36 Ndaze, mwangijesa kota ulonzi wa Nguluwi naulawa kwa hemwe ama nawuya kwa hemwe yeka? 37 Wone hana munhu yoneche yalingijesa kota heye ndo mloli ama kana ndolendole ya Muhe, yavizele kota aga gondilingwandika kwa chiwalo cha hemwe ndo mzilo wa Mkulu. 38 Wone yoneche hali hemwe yobeza mbuli ayi, naye kobezigwa.

39 Ahyo, wang'holozangu, mwanguganigwa kugana ng'hatu kuwikula usenga wa Nguluwi na mleche kuwalemeza wanhu kulonga ndonga ya chijenzi. 40 Ila geng'ha gakoleche kwa kuhulichiza na kwa kuwika goya.