1 Wang'holozangu, kuwala ndolendole za chimuhe ndangugana mvizele goya mbuli azi. 2 Mwanguvizela kota, lomuwele mng'hali kumzela Nguluwi namlongozwa na kwajilizwa na jimalukolo jiwele hambe jilonje. 3 Lelo, mvizele kota munhu yoneche yalingulongozwa na Muhe wa Nguluwi hambe yaweze kulonga, "Yesu yapanjilwe!" Hihyo du, munhu yoneche hambe yaweze kulonga, "Yesu ndo Mkulu," Wone hambe yalongozwe na Muhe Yelile.

4 Kuna ndolendole za chimuhe nyinji, ila Muhe ndo yumwe yalinguzilavya. 5 Hana mijito jili vinji ja utumagwa, ila Mkulu ndo yumwe. 6 Hana mbuli zili vinji za kukola mijito, ila Nguluwi ndo yumwe yalingujidita mijito jeng'ha jikoleche. 7 Lelo, chila yumwe kangupewaga lumuli lwa Muhe Yelile kwa chiwalo cha weng'ha. 8 Muhe kangumpaga yumwe usenga wa luhala na yunji usenga wa uwanzi, kota vyoyalingugana Muhe yuyo. 9 Muhe Yelile kangumpaga yumwe makundo na kangumpaga yunji ndolendole ya ludali lwa kulohola, 10 kangumpaga yumwe ludali lwa kudita vinduzanduza na yunji ludali lwa kulonga usenga wa Nguluwi na yunji ludali lwa kuvizela vila vilingulawa kwa Muhe Yelile na haviwele vya Muhe Yelile, kahi kangumpaga yumwe ludali lwa kulonga ndonga ya chijenzi na yunji ludali lwa kutang'hula ndonga ayo. 11 Ajo jeng'ha ndo mijito ja yuyo Muhe Yelile, yawele kangumpaga chila munhu ludali luli vinji, kota vyoyalingugana heye yuye.

12 Kota vila lukuli vyoluwele lumwe na luna vitomo vinji, vitomo avyo vyeng'ha hanga ndo vinji, vyanguludita lukuli luwe lumwe, hihyo du ndo vyoili kwa Kilistu. 13 Kwa vila kuli Muhe yumwe weng'ha natubatizigwa kuli lukuli lumwe, wone natwali Wayahudi ama Wagilichi ama vitumagwa ama wanhu welejehe, tweng'ha natumunwa Muhe Yelile yuyo.

14 Lukuli hambe lwenele kwa chitomo chimwe hela, ila kwa vitomo vinji. 15 Wone mgulu naulonje, "Kwa vila heni siwele moko, lelo heni siwele wa lukuli," Ndaze, kwa chiwalo acho ndo hauwele wa lukuli? 16 Wone ikutu nalilonje, "Kwa vila heni siwele iziho, lelo heni siwele wa lukuli," Ndaze, ulonzi awo wahawezile kudita ikutu lileche kuwa lya lukuli? 17 Wone lukuli lweng'ha lwahawele iziho, munhu yahahuliche ndaze? Kahi wone lukuli lweng'ha lwahawele ikutu, munhu yahawezile kunusa ndaze? 18 Ila kota vyoili, Nguluwi nakaviwika goya vitomo avyo kuli lukuli kota vyoyaganile. 19 Wone vitomo vyeng'ha vyahawele chitomo chimwe, lukuli lwahawele kohi! 20 Kota vyoluwele, kuna vitomo vinji, ila lukuli ndo lumwe.

21 Iziho haliweza kuulonjela moko, "Ndikulema!" Ne mutwi hauweza kugalonjela magulu, "Ndiwalema!" 22 Ila mzidi wa ago, yangoneka kota vitomo vila vya lukuli vilingoneka kota vya ng'hochele ndo vilinguganigwa ng'hatu. 23 Kahi, vitomo vyotulinguvijesa kota havilinguganigwa kuhulichizwa ng'hatu, ndo tulinguvilolela goya ng'hatu, vitomo vya lukuli viwele havilingoneka kota vya goya ng'hatu, twanguviwikaga goya ng'hatu, 24 mhela vitomo vinji havilingugana kulolelwa goya ng'hatu. Nguluwi yuye nakaluwika lukuli na nakakipa lutogo ng'hatu chitomo chiwele ng'hochele, 25 Leka kuwe haduhu kibagula kuli lukuli, ila vitomo vyeng'ha vilolele. 26 Wone chitomo chimwe chilumile, vitomo vyeng'ha vyangulumilaga hamwe na acho. Chitomo chimwe wone chitogoligwe, vitomo vyeng'ha vyangusangalalaga hamwe na acho.

27 Lelo, hemwe weng'ha mwa lukuli lwa Kilistu, chila yumwe wa hemwe ka chitomo cha lukuli alo. 28 Nguluwi nakawika kuli chilundo cha wanhu walingumkunda Kilistu. Mwaluko watumigwa na keli waloli na kadatu walangusa, hamba nakawawika wala wawele na ndolendole ya kudita vinduzanduza na kulohola na kutanza, nakawawika vilongozi na wawele na ludali lwa kulonga ndonga ya chijenzi. 29 Ndaze, weng'ha ndo watumigwa? Ndaze, weng'ha ndo waloli? Ndaze, weng'ha ndo walangusa? Ndaze, weng'ha wana ludali lwa kudita vinduzanduza? 30 Ndaze, weng'ha wana ndolendole ya kusa matamwa? Ndaze, weng'ha wana ndolendole ya kulonga ndonga ya chijenzi? Ndaze, weng'ha wanguvizela kutang'hula ndonga ya chijenzi? 31 Lelo, muwe na maya ga kubochela ndolendole inojile ng'hatu. Nani sambi ndowalajila nzila inojile ng'hatu.