1 Heni Paoli, mtumigwa wa Kilistu Yesu kwa igano lya Nguluwi na mng'holozetu Timoteyi, Twanguwandichila hemwe chilundo cha wanhu walingumkunda Kilistu muwele ako Kolinto hamwe na wanhu weng'ha welile wawele chila honhu kuli Akaya. 2 Igano na kikala goya vilingulawa kwa Nguluwi Mhaza wa hetwe na kwa Mkulu Yesu Kilistu viwe na hemwe.

3 Yatogoligwe Nguluwi yawele ndo Mhaza wa Mkulu wa hetwe Yesu Kilistu, Mhaza wa isungu na Nguluwi yalingigala uhembulizo wa vyeng'ha. 4 Heye kangutuhembulizaga hetwe kuli magazo ga hetwe geng'ha, leka natwe tuwahembulize wanji kuli chila magazo kwa uhembulizo uwele natuubochela kulawa kwa Nguluwi. 5 Kota vila magazo ga Kilistu vyogalingonjezeka kwa hetwe, hihyo du ndo uhembulizo wa hetwe vyoulingonjezeka kwa kukolela Kilistu. 6 Wone twangugazika, ndo kwachiwalo cha uhembulizo na ulohozi wa hemwe. Hotuhembulizwa ndo kwachiwalo cha kuwakangaza hemwe leka mpate mong'ho wa kwimilila magazo gagala galingutufika hetwe. 7 Kahi, kitumbila kotulinako kwa hemwe ndo kukulu kwa vila twanguvizela kota wone mochilumba na hetwe kuli magazo ga hetwe, mochilumba kahi kuli kuhembulizwa kwa hetwe.

8 Wang'holozangu, twangugana kuwazelesa kuwala magazo gawele nagatufika kula Asiya, magazo ago nagali makulu ng'hatu kwa hetwe mbaka natutweguka nhumbula kota tolutilila kikala. 9 Ena, natwali kota wanhu wawele nawatagusigwa wabagame, leka tulangusigwe kitumbila kwa Nguluwi yawele kanguwazilipula wabagame honhu ha kitumbila mong'ho wa hetwe. 10 Heye yawele nakatulohola kulawa kuli nongwa ng'hulu ya kubagama na kolutilila kutulohola, hetwe natulutilila kitumbila kwa heye kota kotulohola kahi, 11 wone hemwe mwangilumba na hetwe kwa kulanda kwa chiwalo cha hetwe. Ahyo, wenji wolonga malumbo kwa chiwalo cha utambichizo wa isungu wotuupatile kwa kwidichila kwa kulanda kwa wenji.

12 Lelo, aku ndo kidaya kwa hetwe. Kunuwila kwa hetwe kwangutulajila kota natikala kuli isi yino hali hemwe kwa kunyenyetela na kugoloka kotupegwe na Nguluwi, hatulongozwe na luhala lwa munhu ila na isungu lya Nguluwi. 13 Twanguwandichila hemwe mbuli ziwele moweza kusoma na kuzizela. Ndangijesa kota movizela goya ng'hatu, 14 kwa vila mbaka sambi namnzela hado hela. Twanguvizela kota kuli zuwa lila lya Mkulu Yesu moweza kutonela lutogo hetwe kota natwe vyotulinguwonela hemwe lutogo.

15 Kwa vila nanditumbila mbuli azi, nangana mbuye kwa hemwe tandi leka mtambichizwe mala keli. 16 Nanhuwila kukolela kwa hemwe hondiwa kuli majendo ga kuluta Makedoniya na mhela wa kuhiluka kahi ng'holele hano leka nhanzigwe na hemwe kwa majendo ga heni ga kuluta Yudeya. 17 Ndaze, mwangijesa kota vyonjesile ahyo nandali kota munhu yalemwelile kwimilila? Ndaze, mwangijesa kota kwamula kwa heni ndo kwa majesa ga munhu na kota ndangulonga "Ena," na "Hebu," baho du? 18 Ndikomya, kota Nguluwi vyoyawele wa kitumbila, ulonzi wa hetwe hauwele "Ena na hebu," kwa mala imwe. 19 Kwa vila Kilistu Yesu, mwana wa Nguluwi, yawele natumdamla heni na Silivani na Timoteyi, kwa hemwe, hawele munhu wa kulonga "Ena," na "Hebu," ila kwa heye mazuwa gose nayali "Ena," ya Nguluwi. 20 Kwa vila mgati mwa heye malagano geng'ha ga Nguluwi nagawa "Ena." Kwachiwalo acho, "Ena," ya hetwe yangulonjigwa kwa kukolela Kilistu kwa chiwalo cha ukulu wa Nguluwi. 21 Nguluwi yuye ndo yalingutuwika nzinzili hetwe na hemwe kahi kuli Kilistu, kahi ndo heye yalingutuwika chiuyeng'ha, 22 Ndo yatuwichile ulajilo wa kota twa wanhu wa heye na kutupa Muhe mnhumbula za hetwe kota lehani kwa chiwalo cha kutawiza kwa hetwe chila chilinguya.

23 Nguluwi ndo mlolezi wa heni, heye kanguizela nhumbula ya heni! Heni suyile kahi Kolinto kwachiwalo cha kuwonela isungu. 24 Hatulingugana kuwaditila kwa lupichi kuwala makundo ga hemwe, hemwe mwa nzinzili kuli makundo ga hemwe. Chotulinguganigwa kudita ndo kukola mijito hamwe kwa chiwalo cha kusangalala kwa hemwe.