1 Lelo wang'holozangu, kwa vila natupegwa malagano aga geng'ha, lelo, tiyelize nhumbula za hetwe kwa chila chinhu chilingudita nhumbula na lukuli vikokomoche, tuwe welile ng'hatu na kikala kwa kumdumba Nguluwi.

2 Twangulanda mtukunde! Hatumditile wihe munhu yoneche, hatumhade ne kumbunza munhu. 3 Hambe ndonje mbuli azi kwa chiwalo cha kumtagusa kwa wihe munhu, kota vyondonjile, hemwe mwa mnhumbula za hetwe, tubagame hamwe ama tikale hamwe. 4 Ndanguvizela kota namwima nzinzili ng'hatu hondilonga na hemwe, ndangona lutogo lukami kwa hemwe! Kuli kugaya kwa hetwe, namhegwa chihembulizo chikulu na kusangalala ng'hatu.

5 Mbaka lotufichile Makedoniya hatwesela. Chila ubanzi nakwali na kugaya, kunze kilewa, mgati mwa nhumbula namwali na lunhwinhwi. 6 Ila Nguluwi, yalinguwahembuliza wazunwa, nakatukangaza nhumnbula kwa kuya kwa Tito. 7 Hakuwele kwa kuya kwa Tito hela, ila kwa chiwalo cha hemwe cha kumkangaza nhumbula. Tito nakatulonjela vila vyomlingugana kumbona, vila vyomuwele na masinzo na vyomulingugana kundewela. Mbuli ayi yangundita sangalale ng'hatu.

8 Wone nandiwadita muwe na masinzo kwa baluwa iwele nandiwandichila, hambe njese lukami. Hanga nandijesa kwa mhela uchefu kwa vila ndanguvizelakota baluwa ya heni naiwalumiza, ila ndo kwa mhela uchefu hela. 9 Lelo ndangusangalala, haiwele kwa vila mwa mmasinzo, ila kwa vila masinzo ga hemwe nagawadita mgalule kunuwila kwa hemwe na kulonga gehile ga hemwe. Namditigwa muwe na masinzo kwa kiwhana na vyoyaganile Nguluwi na kwa chiwalo acho hatuwalumize. 10 Kuwa na masinzo vyoyaganile Nguluwi kwangigalaga kugaluka kwa nhumbula, kugaluka kuli ngigala ulohozi, kuduhu kung'ung'uta. Ila masinzo ga chiisi, gangigalaga kubagama. 11 Lelo moweza kugona galawile kwa kona masinzo goyaganile Nguluwi, hemwe namditigwa leka muwe wanhu mlingikangaza na muwe mlinguweza kulonga kwa chiwalo cha kilewela. Mwangutinuka na kudumba, mwangikangaza na mwa goya kona hachi yangukoleka. Kwa chila nzila namditigwa leka muwe welile kuli mbuli ino.

12 Ahyo, hanga nanyandika yila baluwa, haiwele kwa chiwalo cha yula yawele nakadita wihe ama kwa chiwalo cha yula yawele nakaditilwa wihe. Nanyandika leka yoneche hazelu hali Nguluwi vyomikangaze kwa chiwalo cha hetwe. 13 Achi ndo chiwalo cha kusangalala ng'hatu kwa hetwe.

Haiwele kota natusangalala hela, ila kahi Tito nakatudita tusangalale kwa vila nayali na usangalalo uwele nawambuzwa na hemwe kuli nhumbula ya heye. 14 Heni nandiwatogola hemwe lukami hali heye, na kwa mbuli ayo nasibasigwe soni. Natuwalonjela hemwe kukomya mazuwa gose na kuwatogola hemwe hali Tito nayali mbuli ya kukomya. 15 Ahyo igano lya heye lya nhumbula kwa hemwe nalyangonjezeka ng'hatu kuno yokumbuchila vila vyomlingukunda na vyombochele kwa kudumba na kukakama na kulajila kuhulichiza. 16 Ndangusangalala ng'hatu kota ndanguweza kitumbila hemwe lukami kwa chila mbuli.