1 Lelo nanyamula kota ndeche kuya kwa hemwe kahi kwa chiwalo cha kuwadita muwe na masinzo. 2 Kwa vila, wone ndiwadite hemwe muwe na masinzo, lelo, whaani yawele konyhembuliza? Ila wawala wawele nandiwadita wawe na masinzo! 3 Nandiwandichila baluwa ayi leka hondikuya kwa hemwe ndeche kuwa na masinzo gawele gokwambuzwa na wanhu wawele wanguganigwa kundita sangalale. Ndikomya, kwa vila hemwe weng'ha mochilumba kuli kusangalala kwa heni. 4 Londiwandichile baluwa ya mwaluko, nanyandika kuno ndilavya mahozi menji. Sandiche leka kuwadita muwe na masinzo, ila leka kuwadita mvizele vila vyondilinguwagana.

5 Wone hana munhu yawele nakamdita yunji yawe na masinzo, handitile heni ndiwe na masinzo ila nakawadita hemwe weng'ha na hambe ngane nding'ang'ale lukami. 6 Magazo gawele nakagapata kulawa kwa wenji wa hemwe ganguhega. 7 Lelo, yanguwagana kumlechela munhu ayo na kumhembuliza leka yaleche kuwa na masinzo lukami. 8 Ahyo, ndanguwadedeza, mumlajile kota kahi mwangumgana ng'hatu. 9 Nandiwandichila yila baluwa kwa vila nangana kuvizela kota mwa goya kuhulichiza kuli chila mbuli. 10 Wone momlechela munhu yoneche, nani ndowa ndimlechele munhu ayo. Kwa vila hondilechela, ndikomya wone ndanacho cha kulechela, ndangulechela hali Kilistu kwa chiwalo cha hemwe, 11 leka Limazoga lileche kutusumya, kwa vila twanguvizela kiwika goya kwa heye.

12 Londifichile Tiloa kwa chiwalo cha kudamla Mbuli Inojile ya Kilistu, nafika lwizi lwa mwanzi kwa chiwalo cha mijito ya Mkulu. 13 Ila nandisinza ng'hatu kwa vila nasimfichile mng'holozangu Tito. Ahyo nandiwalaga weng'ha, nanduta Makedoniya.

14 Ila, malumbo kwa Nguluwi yalingutulongoza mazuwa gose kuli majendo ga kusumya kwa Kilistu. Heye kangutuditaga tweneze kukomya kwa Kilistu kota kunhunyhilila kunojile kuli chila honhu. 15 Kwa vila hetwe kwa Nguluwi ndo kununyhilila kunojile kwa unhunyhililo wa Kilistu hali wala walinguloholigwa na wala walingwajilila. 16 Kwa wala walingwajilila, hetwe ndo kunhunyhilila kwa kubagama, ila kwa wala walinguloholigwa, hetwe ndo kunhunyhilila kunojile kulingugala ukomu. Whaani yalinguweza mbuli azo? 17 Hetwe hatuwele kota wanhu wanji wenji, hetwe hambetugule na kuguza ulonzi wa Nguluwi, hetwe twangudamla kwa kugoloka hali Nguluwi, kota wanhu wawele nawalajizwa na Nguluwi, tuwele natilumba na Kilistu.