1 Haiganigwe kwandika ng'hatu kuwala mijito ajo ya hemwe kwa chiwalo cha wanhu wa Nguluwi. 2 Ndanguvizela vyomuwele na nhumbula ya kutanza na ndangitumbila kwa hemwe kuwala mbuli ayo hali wanhu wa Makedoniya. Nandiwalonjela, "Wang'holozetu wa Akaya nawewika goya mwaka ukolile." Ahyo, maya ga hemwe nagawakangaza nhumbula wanhu wenji kuli kulavya. 3 Lelo nandiwalajiza wang'holozetu awo, leka lutogo lwa hetwe kuwala hemwe lyoneche kota haluwele ndo ulonzi hela, ila miwiche goya kota vyondonjile miwiche goya. 4 Leka ileche kulawila hala wanhu wa Makedoniya howokuya hamwe na heni na kuwafika hamiwichile goya, aho hetwe tobasigwa soni ng'hatu kwa vila natitumbila ng'hatu kwa hemwe. 5 Ahyo, nambona inoga kuwalanda awa wang'holozangu walongole kuya kwa hemwe, leka wawiche goya ndolendole ya hemwe ng'hulu yomilahile. Nayo ilajile kwa kukomya kota ndo ndolendole ilavigwe kwa kunuwila na haiwele kwa lupichi.

6 Mkumbuchile, "Yalingunyala hado kangubetaga hado, yalingunyala kwa winji kangubetaga vinji." 7 Chila yumwe, yalavye kota vyoyalingugana kwa nhumbula ya heye na haiwele kwa masinzo ama kwa lupichi, kwa vila Nguluwi kangumganaga yalingulavya kwa kusangalala. 8 Nguluwi kanguweza kuwapa hemwe mzidi wa gala gomlingugana, mazuwa gose mopata chila chinhu chomlingugana. Ahyo mlutilile kutanza kuli chila mijito jinojile. 9 Kota Maandiko Matakatifu vyogalingulonga,

"Kangulavyaga kwa isungu na kuwapa wazunwa,

kutanganika kwa heye kwangikala mazuwa gose."

10 Nguluwi yalingumpa yalingulima nyhadikwa na ibumunda kwa chiwalo cha chilyo, kowapa hemwe kahi nyhadikwa zomlingugana na kozidita zote, zikule na kuwapa mbena nyinji kwa kutanganika kwa hemwe. 11 Heye kuwadita hemwe muwe na lufufu lwa chila chinhu mazuwa gose, leka wanhu walonje malumbo kwa Nguluwi kwa chiwalo cha ndolendole za hemwe zowalingubochela kwa moko getu. 12 Kwa vila mijito aji yelile yomlingukola hajiwele kota jowatanza wanhu wa Nguluwi hela, ila kahi yowambuza wanhu wenji walonje malumbo kwa Nguluwi. 13 Kwa chiwalo cha mijito jilingulajilwa, wanhu womtogola Nguluwi kwa chiwalo cha kuhulichiza kwa hemwe kwa Mbuli Inojile ya Kilistu yomlingumfugamila na kahi kwa chiwalo cha isungu lyomlinguwalajila hewo na wanhu weng'ha. 14 Ahyo, wolanda kwa nhumbula yeng'ha kwa chiwalo cha igano likulu lyompegwe na Nguluwi. 15 Tumtogole Nguluwi kwa chiwalo cha ndolendole ya heye ipulute ng'hatu.