1 Ayi ndo mala ya kadatu heni kuya kwa hemwe. "Chila momtagusa ulonjelezi woneche wula wanguganigwa utawizwe na walolezi weli ama wadatu." 2 Nandiwakanya lombele hamwe na hemwe lombuyile kwa hemwe lwa keli, lelo ndangulonga kahi kuno nda kutali kota wala weng'ha wawele nawadita wihe ne kulonga gehile ga hewo, londikuya siwonela isungu. 3 Mokona mwemwe baho kota Kilistu kangulonga mgati mwa heni. Kwa hemwe Kilistu hawele ng'hochele, ila ludali lwake lwangukola mijito hali hemwe. 4 Hanga nakagazigwa kwa chiwalo cha ung'hochele, ila sambi kangikala kwa ludali lwa Nguluwi. Hihyo du, hetwe twa ng'hochele kwa kukolela heye, ila kwa kukola mijito na hemwe tochikala hamwe na heye kwa ludali lwa Nguluwi.

5 Milole mwemwe leka mvizele kota mwanago makundo. Milole mwemwe baho. Ndaze, hamvizelele kota Yesu Kilistu ka mgati mwa hemwe? Wone haiwele ahyo, lelo namlemwela kufika kuli chipimilo acho. 6 Ila ndangitumbila kota hemwe mwanguvizela kota hetwe hatulemwele. 7 Twangumlanda Nguluwi mleche kudita wihe woneche, ila hatulingugana koneka kota ndo wanhu wawele nawasinda, ila muweze kudita ganojile hanga twangoneka kota natulemwela. 8 Kwa vila hatulinguweza kukulemeza kukomya, ludali lotuwelenalo ndo lwa kulutilila kulajila kukomya. 9 Twangusangalala kota hetwe twa ng'hochele, ila hemwe mna ludali, ahyo twangulanda hemwe muwe wanhu wawele nawenela. 10 Lelo, ndangwandika baluwa ayi kuno nda kutali, leka londifika kwa hemwe ndeche kuwang'hanuchila hemwe kwa lula ludali loyamhele Mkulu, ena, ludali lwa kuzenga na haluwele lwa kuwifya.

11 Lelo, wang'holozangu, ndaguwalaga! Muwe mwenele na mibatilile malajizo ga heni na muwe na kunuwila kumwe na mikale goya, naye Nguluwi wa igano na kikala goya kowa hamwe na hemwe.

12,13 Milamse kwa kulajila igano lya Kilistu. Welile weng'ha wa Nguluwi wanguwalamsa.

14 Isungu lya Mkulu Yesu Kilistu na igano lya Nguluwi na Muhe Yelile, viwe hamwe na hemwe weng'ha.