1 Lelo heni Paoli ndanguwadedeza kwa kunyenyetela na uliholile wa Kilistu, heni ndilingudumba hondiwa hamwe na hemwe ila ndina kwimilila hondiwa kutali na hemwe. 2 Ndangulanda kwa chiwalo cha hemwe leka mleche kunyambuza nding'hang'hale mhela hondikuya, kwa vila ndangukomya ndanguweza kuwa nding'hang'hale kwa wala weng'ha walingujesa kota twangikala kota wanhu wa isi. 3 Ndangukomya twangikala muisi, ila ngondo yotulingitowa hawele ya chiisi. 4 Kwa vila vinhu vya kitowela ngondo vyotulinguvitumiya kuli ngondo ya hetwe haviwele vinhu vya muisi, ila ndo ludali lwa Nguluwi lulinguwifya ngome zeng'ha. Twanguwifya ndonga zeng'ha za udesi, 5 na kubomola chila chilingulemeza chiwele ndo kidaya chiwele nachiwichigwa leka kulemeza malanguso ga Nguluwi. Twangugahola majesa geng'ha na kugadita gamhulichize Kilistu. 6 Lomuwa nzinzili kuli kuhulichiza, hetwe twagoya kuchigaza chila chinhu chohambe chihulichize.

7 Hemwe mwangulola mbuli kwa kunze hela. Ndaze, hana munhu yoneche yalingijesa kota heye ndo wa Kilistu? Ena! Lelo yejese kota hetwe kahi ndo wa Kilistu kota heye vyoyawele wa Kilistu. 8 Hanga ndangidaya ng'hatu kuwala lula ludali luwele Mkulu nakatupa ludali lwa kuwakangaza nhumbula na haluwele lwa kuwabomola, heni sikona soni kwa chiwalo acho. 9 Hambe ngane ndijese kota ndangugana kuwakabusa hemwe kwa baluwa za heni. 10 Munhu kanguweza kulonga, "Baluwa za Paoli ndo zing'hang'hala na zina ulonzi ung'hang'hale, ila heye yuye hoyowa hamwe na hetwe ndo munhu yalihela mong'ho, na hala hoyolonga ulonzi wa heye wanguwaga kota hauwele chinhu." 11 Munhu yalingulonga ahyo fola yakumbuchile kota gotulingulonga kuli baluwa hala hotuwa kutali gangiwhana na gala gawele togadita mhela hotuwa hamwe na hemwe.

12 Hambe tujeze kiwika kuli chilundo chimwe ama kiwhaniza na awo walingidaya kota hewo ndo wa kukomya ng'hatu. Wanhu walingidita kota hewo ndo chipimilo cha kuwapima wanji na wanhu walingiwhaniza hewo wawo ndo wapoka. 13 Ila hetwe hambe tidaye ng'hatu, kidaya ako kosigala kuli chipimilo cha mijito joyatupele Nguluwi, mijito jiwele twangujikola kwa hemwe. 14 Hatulochile mbaka jiwele natuwichilwa mhela uwele natuya kwa hemwe. Hetwe natwali wa mwaluko kuya kwa hemwe, natuwagalila Mbuli Inojile ya Kilistu. 15 Lelo hatulingidaya kwa chiwalo cha mijito yowajikolile wanji mzidi wa chipimilo chotupegwe, ila twangitumbila kota makundo ga hemwe gokonjezeka hali hemwe kwa chipimilo chiwele nakatuwichila Nguluwi. 16 Aho toweza kuidamla Mbuli Inojile kuli isi zinji, kutali na hemwe na haiwa mhuli ya kidaya kwa chiwalo cha mijito yowalingujikola wanhu wanji kuli honhu hanji.

17 Ila kota vyogandichigwe Maandiko Matakatifu, "Yalingidaya na yetogole kwa chiwalo cha mijito ja Mkulu." 18 Yalingukundigwa hawele yula yalingitogola yuye, ila yula yalingutogoligwa na Mkulu.