1 Ndanguganigwa kitogola hanga hailingutanza chinhu. Ila ndolonga kuwala kulota na ugubulo kulawa kwa Mkulu. 2 Ndangumzela munhu yumwe yalingumkunda Kilistu, mhela wa miyaka kumi na jine jikolile nakanyasuligwa mbaka kuli ulanga wa kadatu. Sivizelele kota nayali ako kwa lukuli ama kwa muhe, Nguluwi ndo kanguvizela. 3 Ndangulonga kahi kota munhu ayo nakanyasuligwa mbaka kuli ulanga. Ila hambe ndivizele kota nayali ako kuli lukuli ama kuli muhe, Nguluwi yuye ndo kanguvizela. 4 Loyawele ako nakahulika mbuli za uviso, ziwele munhu halingukundizwa kulonga. 5 Lelo ndotogola kuwala munhu ayo na haiwele kwa chiwalo cha heni, ila heni ndochitogola kuwala ung'hochele wa heni. 6 Wone nangane kitogola, nasalikuwa mpoka, kwa vila ndahalonjile ga kukomya yeng'ha. Ila sichitogola, silingugana munhu yanjese ng'hatu kusinda vila vyoyalingumbona na kuhulika kulawa kwa heni.

7 Ila nandiganigwa kuleka kitogola ng'hatu kuwala mbuli za ugubulo wa kububuwaza, ziwele nazigubuligwa kwa heni. Kwachiwalo acho nafichigwa na magazo gawele na usungu kuli lukuli lwa heni, msenga wa Limazoga nakalajizwa kwa heni leka yangaze, leka ndeche kijesa kota heni sinojile ng'hatu kusinda wanhu wanji. 8 Nandimlanda Mkulu kwa kumdedeza mala zidatu leka yambusile magazo ago. 9 Ila nakandonjela, "Isungu lya heni lyanguhega kwa hegwe, kwa vila ludali lwa heni lwangwenezwa ng'hatu kuli ung'hochele." Lelo ndochitogola kuwala ung'hochele wa heni leka ludali lwake Kilistu uwe mgati mwa heni. 10 Ahyo, ndangukunda ng'hatu ung'hochele na kubezigwa na magazo na kubunzigwa, kwa chiwalo cha Kilistu kwa vila ndo ndanguwa na mong'ho.

11 Ndiwa kota mpoka, ila hemwe namndita ndiwe ahyo. Hemwe ndo namganigwa kunhogola, hanga siwele chinhu, ila siwele mdodo kusinda awo "watumigwa wakulu." 12 Vinduzanduza na kububuwaza vilingulajila kota heni nda mtumigwa, nagavikoleka hali hemwe kwa kwimilila kweng'ha. 13 Ndaze, nampunguchilwa na choni ng'hatu kusinda vilundo vya wanhu walingumkunda Kilistu vinji, hanga kuli ubanzi wa heni siwatunyile kwa kugana utanzi wa hemwe? Ndangulanda kulechelwa na hemwe kwa chiwalo cha mbuli ayo! 14 Lelo nda goya ng'hatu kuya kwa hemwe lwa kadatu, kahi siwatunya hemwe. Kwa vila chondilikuchipala hachiwele lufufu lwa hemwe, ila ndo hemwe hela. Mhaza na mamo ndo wanguwikaga ng'hano kwa chiwalo cha wana wa hewo, ila haiwele kwa wana kuwika ng'hano kwa chiwalo cha mhaza na mamo. 15 Heni ndagoya ng'hatu kulavya chondilinacho kwa chiwalo cha hemwe mbaka kilavya nene, kwa chiwalo cha kuwatanza hemwe. Ndaze, mongana hado kwa vila heni ndanguwagana ng'hatu hemwe?

16 Lelo mokunda kota siwele itunyo kwa hemwe. Hanji munhu yunji kolonga, "Kwa vila Paoli ka msugu, nakawahada hemwe." 17 Ndaze, heni nandiwabunza hemwe kwa kukolela msenga yoneche yawele nandimlajiza kwa hemwe? 18 Heni nandimlanda Tito na nandimlajiza kwa hemwe na mng'holozetu yunji. Ndaze, Tito nakawabunza hemwe? Ndaze, hamvizelele kota hetwe twangulongozwa na muhe yumwe na chihendo cha hetwe ndo chimwe?

19 Hanji mwangijesa kota mbaka sambi twangilewela hali hemwe! Ila, twangulonga mbuli azi hali Nguluwi, kuno tuwele tilumbile na Kilistu. Mbuli azi zeng'ha, wondiwaganile, ndo kwa chiwalo cha kuwakangaza hemwe. 20 Ndangudumba, hanji hondikuya kwa hemwe ndowafika muwele vibi, nani ndoganigwa kuwa vibi. Ndangudumba hanji howa na kilewa na fihi na kilema na kitwanza na kuheha na kupwepwa na kidaya na ivuche hali hemwe. 21 Ndangudumba hanji aho hondikuya kahi Nguluwi wa heni kondita kombasa soni hali hemwe, nani ndolombocheza kwa chiwalo cha wenji wa wala waditile gehile ila hawamgalamchile Nguluwi kwa kuleka awo wavu na maya ga hewo gehile na ung'hondwa wawele nawaudita.