1 Lelo, kwa isungu lya Nguluwi, nakatupa mijito aji, ahyo hambe tugozole. 2 Natuzileka mbuli zeng'ha za soni na za chinyele. Hambe tikale kwa uhadi ne kuwajiliza ulonzi wa Nguluwi ila twangikala kwa kulajila kukomya na kilajila kuli kunuwila kwa chila munhu hali Mkulu Nguluwi. 3 Wone Mbuli Inojile yotulinguidamla naivisigwa, naivisigwa kwa wala walingwajilila. 4 Hewo hambe wakunde kwa vila mlungu wa kuli isi ayi, nakaziwika jiza nyhala za hewo leka waleche kona lumuli lwa Mbuli Inojile ya ukulu wa Kilistu, yawele nakewhana ng'hatu na Nguluwi. 5 Kwa vila hambe tudamle kwa chiwalo cha twetwe, ila twangumdamla Yesu Kilistu kota ndo Mkulu natwe twa vitumagwa wa hemwe kwachiwalo cha Yesu. 6 Kwa vila Nguluwi nakalonga, "Lumuli na lupuliche kuli jiza," nakaludita lumuli lya heye lupuliche kuli nhumbula za hetwe leka kutulangazila uwanzi wa ukulu wa Nguluwi kwa kukolela kumeho kwa Kilistu.

7 Lelo hetwe tuwele na ng'hano ayi twa kota vinhu vya ilongo, leka yoneche hazelu kota ludali alu lukulu lwangulawa kwa Nguluwi haluwele kulawa kwa hetwe. 8 Twangugazika kuli chila ubanzi ila hambe tudumigwe, twanguwa na lunhwinhwi ila hatulingutweguka nhumbula, 9 Twangugazika ila hatulingulechigwa ne utanzi, hanga natugwisigwa hasi, hatudumigwe. 10 Chila mhela weng'ha natwali tuhola kubagama kwa Yesu kuli ng'huli za hetwe, leka ukomu wa Yesu woneche kuli ng'huli za hetwe. 11 Kwa vila hetwe tuwele wakomu, mazuwa gose natulavigwa leka tubagame kwa chiwalo cha Yesu, leka ukomu wa heye woneche kuli ng'huli za hetwe zilingubagama. 12 Ayi yangulajila kota mgati mwa hetwe kubagama kwangukola mijito, ila mgati mwa hemwe ukomu wangukola mijito.

13 Maandiko Matakatifu gangulonga, "Nandali na makundo, ahyo nandonga." Natwe tuna nhumbula yiyo ya makundo, twangukunda na kwa chiwalo acho twangulonga. 14 Twanguvizela kota yawele yamzilipule Mkulu Yesu, kotuzilipula na hetwe kahi hamwe na Yesu na kutuwika hali heye hamwe na hemwe. 15 Aga geng'ha ndo kwa mzidi wa hemwe, mbaka isungu lya Nguluwi holiwafichila wanhu wenji ng'hatu, malumbo nago gonjezeche ng'hatu kwa ukulu wa Nguluwi.

16 Kwa chiwalo acho hambe tutweguche nhumbula, hanga ng'huli za hetwe zokola, ila kwa mgati twanguditigwa tuwe goya chila zuwa. 17 Magazo galingutufika ndo mado kahi ndo kwa mhela uchefu hela, ila gotugalila ukulu wa mazuwa gose, ukulu ulihela kuduma. 18 Ahyo twanguulolela goya, haviwele vinhu vilingoneka, ila havilingoneka. Kwa vila vilingoneka ndo vya mhela uchefu hela, ila havilingoneka ndo vya mazuwa gose.