1 Wang'holozangu, twangugana kuwegalila mbuli za utambichizo wa Nguluwi, uwele nakawapa wanhu wa chilundo walingumkunda Kilistu wa ako Makedoniya. 2 Wala wanhu wa ako Makedoniya, nawajezigwa ng'hatu kwa kugaya, ila kusangalala kwa hewo nakwali kukulu, kwa vila nawali wolavya kwa moko meli, hanga nawali wazunwa ng'hatu. 3 Ndoweza kulavya ulolezi kota nawalavya ne lupichi na kwa isungu ng'hatu kota vyoluwele mong'ho wawo na kupuluta ng'hatu. Kota navyowaganile hewo wawo, 4 nawatulanda kwa kutudedeza ng'hatu wapegwe mhumhu ya kihanza kuli mijito aji ja kuwatanza wanhu wa Nguluwi ako Yudeya. 5 Ayo nayali mbuli ya kilavya ng'hatu! Mwaluko nawelavya hewo wawo kwa Mkulu, hamba welavya kahi kwa chiwalo cha hetwe, kwakuwinza vyoyalingugana Nguluwi. 6 Kwa chiwalo acho natumdededeza Tito yaluche mijito ajo ja kuwatanza leka mlutilile kukola mijito aji ja kulavya kwa isungu hali hemwe. 7 Mwemwe namuwa na vinji kwa chila chinhu, makundo na ludali lwa kulonga na uwanzi na kikangaza kweng'ha kwa kudita ganojile na ligano lya hemwe kwa hetwe. Ahyo, twangulolela kota mowa mnojile kuli mijito aji ja kulavya.

8 Siwapa hemwe ilajizo, ila ndangugana hela kulajila ndaze wanji vyowalingikanganza kuwatanza, leka mvizele igano lya hemwe vyoliwele lya kukomya. 9 Kwa vila hemwe namkuzela kunoga kwa heye Mkulu wa hetwe Yesu Kilistu, hanga nayali na lufufu, nakedita mzunwa kwa chiwalo cha hemwe, leka kwa uzunwa wa heye, yawadite muwe na lufufu. 10 Kwa chiwalo achi, lelo ndanguwalonjela hino, naigana hemwe sambi kugadita gala gomwaluche mhela upulute. Hemwe namwali mwaluche kudita, namwamula kudita ahyo. 11 Lelo msinde mijito aji ja maya kota vyomwaluche, mlavye kwa kiwhana na vinhu vyomuwele navyo. 12 Kwa vila wone munhu kana nhumbula ya kutanza, Nguluwi kangubochelaga chila chinhu choyolinguweza kulavya, halingugana mzidi. 13 Chotulingunuwila hachiwele kota wanji watanzigwe mhela awo hemwe mwangugaya, ila yanguganigwa hawe na kiwhana na hachi. 14 Chila chomuwelenacho sambi chonjezeche leka chiwatanze wala walinguganigwa kupegwa, leka na hewo lowowa na mzidi, wawatanze hemwe kuli vila vyomlingugana, ahyo, hawe na kiwhana. 15 Kota vyogandichigwe,

"Yawele nakakungajiza kwa winji hawele na mzidi,

na yula yawele nakakungajiza hado nahapunguchilwe."

16 Ndangulonga malumbo kwa Nguluwi yawele nakamkangaza Tito nhumbula leka yawagane hemwe kota vyondilinguwagana. 17 Haiwele kota nakakunda kulanda kwa hetwe hela, ila kahi nayali na maya ng'hatu ya kuwatanza mbaka nakamula kwa kugana kwa heye yuye kuya kwa hemwe. 18 Hamwe na heye, twangumlajiza mng'holozetu yumwe yawele na lutogo lwa kudamla Mbuli Inojile kuli vilundo vyeng'ha vya wanhu walingumkunda Kilistu. 19 Mzidi wa ago, nakahaguligwa na vilundo vya wanhu walingumkunda Kilistu leka tuwe hamwe kuli majendo mhela hotuluta kukola mijito ja kunoga kwa chiwalo cha ukulu wa Mkulu na kuzeleka kwa igano lya hetwe linojile.

20 Hatulingugana kufichigwa na kung'ung'uta kwoneche kuwala vila vyotukwimilila ndolendole azi za kunoga. 21 Chotulingugana hetwe ndo kudita ganojile, haiwele hali Mkulu hela, ila kahi hali wanhu.

22 Lelo, hamwe na wang'holozetu, natumlajiza mng'holozetu yunji yawele mala nyinji nakatawiza kwa nzila nyinji kota kana maya ng'hatu ga kutanza, lelo kangugana ng'hatu kwa vila kana makundo na hemwe. 23 Tito ndo myangu, twangukola mijito hamwe kwa chiwalo cha hemwe, ila kuwala awa wang'holozetu wanji walinguya hamwe na hewo, awo ndo wasenga wa vilundo vya wanhu walingumkunda Kilistu, welile kwa Kilistu. 24 Lelo, mlajile hali vilundo vya wanhu walingumkunda Kilistu kota mwangukomya ng'hatu. Kota mwanguwagana na kuwazelesa kota natuganigwa kidaya kwa chiwalo cha hemwe.