1 Lelo hotuwa wakola mijito hamwe na Nguluwi, twanguwadedeza mleche kukunda kula kunoga komkubochele kulawa kwa Nguluwi kwajilile hela! 2 Nguluwi kangulonga hino,

"Mhela ukundigwe,

nandikuhulichiza,

muhela wa ulohozi,

nandikutanza."

Lelo, awu ndo mhela ukundigwe, sambi ndo zuwa lya ulohozi!

3 Leka tuleche kuwa na nongwa yoneche kuli uchitumagwa wa hetwe, hatulingugana kuwika chinhu choneche kwa munhu chiwele chomlemeza. 4 Ila twangilajila kota twa vitumagwa wa Nguluwi ng'hatu kwa chila chinhu, kwa kwimilila kwinji mhela wa magazo na kugaya. 5 Natutowigwa, natuwichigwa mchinweng'ho na kuzomelwa hali wanhu, natukola mijito mbaka natutoka, natikala meho ne kulya. 6 Twangilajila kota twa vitumagwa wa Nguluwi kwa kunoga kwa nhumbula na luhala na kwimilila na isungu, kwa Muhe Yelile na kwa igano lilihela udesi, 7 kwa usenga wa kukomya na kwa mong'ho wa Nguluwi. Kutanganika ndo chinhu cha kitowela ngondo chotulingitumbila kuli chila ubanzi. 8 Twagoya kuhulichizwa na kubezigwa, kulonjigwa vibi na kutogoligwa. Twangoneka kota twawadesi, hanga twangulonga kukomya, 9 twa kota wanhu hawalinguzeleka, hanga twanguzeleka kwa weng'ha, kota wabagame hanga twa twawakomu. Twangugazigwa ila hatulingudumigwa 10 Hanga natutowigwa ila hatubagame, hanga twammasinzo ila twangusangalala mazuwa gose, hanga twawazunwa ila twanguwadita wanhu wenji wawe na lufufu, twangoneka kota wanhu walihela chinhu ila twanacho chila chinhu.

11 Wang'holozangu Wakolinto, natulongasa na hemwe kwa kugoloka, nhumbula za hetwe za hazelu. 12 Wone mwangona kota hana chinhu choneche chilinguwalemeza, chinhu acho cha kuko kwa hemwe, hachiwele kuli ubanzi wa hetwe. 13 Lelo, ndangulonga na hemwe kota mwa wana wa heni, mgubule nhumbula za hemwe kota hetwe vyotuditile.

14 Mleche kihanza na wanhu wohambe wakunde. Ndaze, kunoga na wihe vyangikundiza? Ndaze, lumuli na jiza vyanguweza kuwa hamwe? 15 Ndaze, Kilistu koweza kihanyisa na Limazoga? Yalingukunda kandaze na yohambe yakunde? 16 Ng'handa ya Nguluwi yangiwhana ndaze na jimalukolo? Kwa vila hetwe twa ng'handa ya Nguluwi yawele mkomu. Kota Nguluwi yuye vyoyalonjile,

"Ndochikala mgati mwa hewo,

na kikala hali hewo,

ndowa Nguluwi wa hewo,

nawo wowa wanhu wa heni."

17 Mkulu kangulonga kahi,

"Mlawe hali hewo,

mibagule hali hewo,

mleche kudoliza chinhu chikokomoche,

nani ndowabochela.

18 Heni ndowa Mhaza wa hemwe,

namwe mowa wana wa heni, walume kwa wadala,

Mkulu Nguluwi yawele na ludali kangulonga."