1 Ndaze, twangwaluka kitogola twetwe? Ama twanguganigwa kupata baluwa za kizelesa kwa hemwe ama kulawa kwa hemwe kota wanhu wanji? 2 Hemwe ndo baluwa ya hetwe iwele nayandichigwa kuli nhumbula za hetwe, ilinguzeleka na kusomigwa na chila munhu. 3 Yanguzeleka kota hemwe ndo baluwa ya Kilistu iwele nakaihilika kwa moko ga hetwe. Baluwa ayo hayandichigwe kwa wino, ila kwa Muhe wa Nguluwi yawele mkomu, hayandikwe mchanya mwa chihande cha iganga, ila kuli nhumbula za wanhu.

4 Aku ndo kitumbila kotuwelenako hali Nguluwi kwa kukolela Kilistu. 5 Hambe tijesa kota twanguweza kudita mbuli yoneche twetwe yeka, ila mong'ho wa hetwe wangulawa kwa Nguluwi. 6 Kwa vila heye ndo nakatudita tuwe vitumagwa wa Ilagano Inyale, haliwele ilagano lya malajizo gawele nagandichigwa ila ilagano lya Muhe. Kwa vila malajizo gawele nagandichigwa gangugalaga kubagama ila Muhe wangugalaga ukomu.

7 Malajizo nagawichigwa kwa kwandichigwa mchanya mwa vihande vya maganga. Hanga kuduma kwake nakwali kubagama, ukulu wa heye nawali ukulu ng'hatu mbaka wana wa Isilaeli hawawezile kukulola kumeho kwa Musa kwa chiwalo cha kupulika kwa heye. Kahi kupulika ako nakwali kwa mhela uchefu hela. Lelo, wone mijito ja chila chiwele nachambuza najikoleka kwa ukulu ng'hatu chasi acho, 8 lelo, mijito ja Muhe jina ukulu ng'hatu. 9 Wone nakwali na ukulu kuli mijito jilingigala utaguso, kukomya kota mijito jilingigala kukundigwa jowa na ukulu ng'hatu. 10 Lelo, ukulu uwele mkulu ng'hatu nauhola honhu ha ukulu hamwande uwele wahaduhu kuli mhela awu. 11 Kwa vila chila chiwele nachali kwa mhela uchefu hela nachali na welile wake, kahi chiwele na mijito ja mazuwa gose chowa na ukulu ng'hatu.

12 Kwa vila aku ndo kitumbila kwa hetwe, twangulonga ne kudumba. 13 Hetwe hambe tudite kota Musa vyoyagubiche kumeho kwa heye kwa chibende leka wanhu wa Isilaeli waleche kukona kula kubilabila kwa kupulika kuli kuduma. 14 Ila nyala za hewo naziditigwa zibubuwale. Mbaka mhela awu holisomigwa ilagano lya Katali, chigubiko acho ching'hali baho. Chigubiko acho chokusigwa hala du, munhu hoyochilumba na Kilistu. 15 Ena, mbaka mhela awu, chila hogasomigwa Malajizo ga Musa, nyala za hewo zanguwaga zigubikwe. 16 Ila, mhela munhu hoyomgalamchila Mkulu, chigubiko acho changusigwa. 17 Lelo, "Mkulu" Ndo Muhe na hala hoyali Muhe wa Mkulu, ndo hawele na kilejeha.

18 Lelo, hetwe weng'ha tuwele kumeho kwa hetwe hakugubukwe, twangona kota vyotulingona kuli chilolelo, ukulu wa Mkulu wangutudita tiwhane ng'hatu na ukulu mbaka ukulu. Ajo ndo mijito ya Muhe wa Mkulu.