1 Kwa vila twanguvizela kota ihema lya hetwe lya isi yotulingikala lyowifigwa, liwele ndo lukuli lwa hetwe, holiwifigwa, Nguluwi kotupa honhu hanji ha kikala hawele ndo kilanga, ng'handa ya mazuwa gose iwele haizenjigwe kwa moko ga wanhu. 2 Kuli ihema ali twangulila kwa usungu, kuno twangugana kupegwa honhu ha hetwe ha kikala hawele ndo kilanga. 3 Kwa vila hotupegwa alo lukuli lwa kilanga, hatokoneka kahi kota twa mwazi. 4 Lotung'ali kuli ihema ali lya isi, twangulila kwa kutunyigwa na itunyo ikulu, haiwele kota twangugana kululavya alu lukuli lulingubagama, ila tuna maya ga kuvalizwa lula lukuli lohambe lubagame, leka chila chilingubagama chimeligwe na ukomu. 5 Nguluwi yuye ndo nakatuwichila goya kugaluka ako, naye nakatupa Muhe wa heye leka yawe lehani kuli geng'ha gawele nakatuwichila.

6 Twa nzinzili mazuwa gose hanga twanguvizela kota kikala kuli lukuli alu hela ndo kikala kutali na Mkulu. 7 Kwa vila twangikala kwa makundo, haiwele kwa kona. 8 Ila twangitumbila na twahaganile kuka hali lukuli alu na kuluta kikala kwa Mkulu. 9 Ahyo, wone twangikala hano muisi ama ako kilanga, mbuli itanganiche ng'hatu kwa hetwe ndo kumnojeza Mkulu. 10 Kwa vila tweng'ha tokwima hali chigoda cha utaguso cha Kilistu, leka chila yumwe yabochele choyalinguganigwa kupegwa kwa kiwhana na madito goyaditile loyawele yochikala kuli isi, gawe ganojile ama gehile.

11 Lelo, hetwe twanguvizela vila vyotulinguganigwa kumdumba Mkulu na twangikangaza kuwakwega wanhu wanji. Ila Nguluwi kangutuzela goya ng'hatu, nani ndangitumbila kota hemwe mwangutuzela goya ng'hatu. 12 Haiwele kota twangujeza kahi kidedeza kwa hemwe, ila twangugana kuwapa hemwe mbuli za hetwe za kona lutogo kwa hemwe, leka muwedichile wala walingidaya kuwala mbuli zilingoneka kwa kunze kusinda ziwele mnhumbula. 13 Wone twangoneka kota tuna luweje, ndo kwa chiwalo cha Nguluwi na wone twangoneka kota tuna nyhala, ndo kwa chiwalo cha hemwe. 14 Igano lya Kilistu lyangutudita tuwe na mong'ho kwa vila twangukunda kota munhu yumwe nakabagama kwa chiwalo cha weng'ha, ahyo weng'ha twangihanza kuli kubagama kwa heye. 15 Nakabagama kwa chiwalo cha wanhu weng'ha, leka walingikala waleche kikala kwa chiwalo cha hewo wawo, ila wekale kwa chiwalo cha heye yawele nakabagama na kuzilipuligwa kwa chiwalo cha hewo.

16 Lelo, kulawa sambi, hambe tumjeze munhu yoneche kwa majesa ga chiwunhu hela. Hanga kuli mhela umwenga natumjeza Kilistu kwa majesa ga chiwunhu, ila sambi haiwele ahyo kahi. 17 Wone Munhu yoneche yowa mgati mwa Kilistu nakawa chilumbigwe chinyale, mbuli za katali nazikola, mbuli zinyale nazuya. 18 Geng'ha ndo mijito ja Nguluwi yalingutuhanyisa hetwe na heye kwa kukolela Kilistu, na kutupa mijito ja kuwahanyisa wanhu wanji na heye. 19 Nguluwi nayali yoihanyisa isi na heye kwa kukolela Kilistu, ne kuwaza gehile ga wanhu. Heye nakatupa usenga kwa chiwalo cha kuwahanyisa wanhu na heye.

20 Lelo hetwe twahano kwa chiwalo cha Kilistu, naye Nguluwi kangutulajiza hetwe kuwadedeza hemwe. Twanguwalanda kwa chiwalo cha Kilistu, mihanyise na Nguluwi. 21 Kilistu hawele na gehile, ila Nguluwi nakamdita yawe na gehile kwa chiwalo cha hetwe, leka hetwe kwa kilumba na heye, tuwe tihanzile kuli kutanganika kwa heye Nguluwi.