1 Wone namwimilile upoka wa heni hado, hanga heni nda mpoka! Ena, mnyimilile hado. 2 Ndanguwonela maya hemwe ila ndo maya ga Nguluwi, kwa vila hemwe ndo kota mhinza yohanating'hana na mlume yawele nandimheseza kwa mlume yumwe hela yawele ndo Kilistu. 3 Ila ndangudumba, kota lila izoka kwa uhadi wa heye, nalimhada Eva, ahyo majesa ga hemwe goweza kugaluswa, moleka kukundigwa kwa hemwe kwa kukomya kwa Kilistu. 4 Kwa vila munhu yoneche yokuya na kumdamla Yesu yalivinji na yula yotumdamle, hemwe mwangumbochela kwa moko meli, ama mwangumkunda muhe yunji yawele hawele yula Muhe Yelile yomumbochele ama Mbuli Inojile ilivinji ng'hatu na yila iwele namuibochela kulawa kwa hetwe.

5 Silingijesa kota heni nda mdodo kusinda awo "Watumigwa wakulu." 6 Hanji sidahile kulonga goya, ila ndina uwanzi, mbuli ayi natuilajila hazelu kwa hemwe, chila honhu na chila mhela.

7 Heni nandamla kwa hemwe Mbuli Inojile ya Nguluwi ne kugana chinhu choneche, nandinyenyeteza leka hemwe muwe na lutogo. Ndaze, nandita vibi? 8 Long'holile mijito kwa hemwe, gondilinguganigwa kupegwa nhamhegwa vilundo vinji vya wanhu walingumkunda Kilistu. Kwa kudita ahyo nandiwa kota nandiwaboka hewo lufufu lwao leka ndiwakolele mijito hemwe. 9 Londiwele na hemwe simgazile munhu yoneche longanile sendi, wang'holozangu wawele nawalawa Makedoniya nawengalila chila chinhu chonganile. Nandilolela ng'hatu leka ndeche kuwa itunyo kwa hemwe na ndolutilila kuwa hihyo. 10 Ndangilaha kwa kula kukomya kwa Kilistu kuwele mgati mwa heni, kota haduhu chiwele chondemeza kidaya kwa chiwalo cha mbuli ayo honeche kuli isi ya Akaya. 11 Ndangulonga ahyo haiwele kota hambe ndiwagane hemwe, Nguluwi kanguvizela vila vyondilinguwagana!

12 Ndolutilila kudita kota vyondilingudita sambi, leka ndeche kuwapa honhu wala walingupala honhu ha kidaya kota wangukola mijito kota hetwe. 13 Kwa vila hewo ndo watumigwa wa udesi, wakola mijito wa udesi walingidita kota ndo watumigwa wa Kilistu. 14 Haiwele chinhu chijenzi, kwa vila Limazoga nalyo lyangiditaga kota ndo mhilisi wa lumuli. 15 Ahyo, haiwele chinhu chijenzi wone nawo watumigwa wa Limazoga wangidita kota ndo watumigwa wa hachi. Kuduma kwa hewo wopegwa chila chowalinguganigwa kupegwa kwa kiwhana na madito ga hewo.

16 Ndangulonga kahi, munhu yaleche kunjesa kota ndampoka. Ila wone mlingijesa monjesa ahyo, lelo mmbone kota ndampoka leka nani mhate kuwa na cha kidaya. 17 Chondilingulonga hachiwele chila choyandajize Mkulu, kuwala mbuli ayi ya kidaya, ila ndangulonga hela kota nda mpoka. 18 Kwa vila wenji wangidaya kwa chiwalo cha mbuli za muisi, nani ndochidaya hihyo. 19 Hemwe muna luhala ng'hatu mbaka mwanguwemilila wapoka! 20 Mwangumwimilila mbaka munhu yalinguwadita hemwe wapogozi, munhu yalinguwabuza na yawele nguwabeza na kuwatowa kumeho! 21 Kwa chiwalo cha soni ndangukunda kota hetwe natwali ng'hochele.

Ila choneche chiwele munhu yunji yawele koweza kidaya kwa chiwalo acho, ndangulonga kota nda mpoka, nani ndangidaya kuwala mbuli ayo. 22 Ndaze, hewo ndo Waebulaniya? Nani nda Muebulaniya. Ndaze, hewo ndo Waisilaeli? Nani nda Muisilaeli. Ndaze hewo ndo lulelo lwa Abulahamu? Nani nda mlelwa wa Abulahamu. 23 Ndaze, hewo ndo vitumagwa wa Kilistu? Nani, ndangulonga aga kwa lukwale, nani nda chitumagwa wa Kilistu kusinda hewo. Heni nang'hola mijito jing'ang'ale ng'hatu, nandikala kuchinweng'ho mala nyinji ng'hatu, nandiwichigwa mchinweng'ho mala nyinji, nanowigwa kwa ng'hobwa mala nyinji na ndali habehi kubagama mala nyinji. 24 Mala zihano nanzapigwa na Wayahudi ng'hobwa makumi gadatu na tisa. 25 Nanhowigwa kwa ng'hobwa mala zidatu, nanhowigwa na maganga mala imwe na mala zidatu meli naibeneka kuli bahali na amo mbahali nandali meho nechilo yeng'ha na kusinda nemisi yeng'ha ndikwelela mmazi. 26 Chila mala kuli majendo nandali ndifichigwa na kumema kwa mazi kuli nzanda na kugana kubagama kwa chiwalo cha walinguboka na kuditilwa vibi na Wayahudi wayangu na wanhu wa isi zinji, magazo kuli muji na magazo kuli chiwala na magazo mbahali na magazo kulawa kwa wang'holozangu wa udesi. 27 Nang'hola mijito na kugazika, nandali meho ne kuwa na usinjizi mala nyinji, nandali na nzala na ng'halu, nanyesela kulya mala nyinji na kikala kuli chipute ne kuwa na nguwo. 28 Mzidi wa ago geng'ha, chila zuwa chila zuwa ndina mijito kuli vilundo vya wanhu walingumkunda Kilistu. 29 Wone munhu yoneche ka ng'hochele, nani nda ng'hochele na wone munhu yoneche yoditigwa yazudile, nani kahi ndanguwaga na lunhwinhwi.

30 Wone ndoganigwa kidaya, lelo ndochidayila kuwala ung'hochele wa heni. 31 Nguluwi yawele ndo Mhaza wa Mkulu Yesu, mazuwa gose itagwa lyake litogoligwe, heye ndo kanguvizela kota silingulonga udesi. 32 Londiwele Damasiko, chilongozi wa mkowa, yalingulongozwa na mndewa Aleta, nakawamila muji wa Damasiko leka yembate. 33 Ila, mgati mwa chidoto chikulu, nanduliswa kunze kwa kukolela kuli itubuli liwele kuli lukanzi lwa muji, ahyo nasulupuka kulawa kuli moko ga heye.