1 Heni Paoli mbele mtumigwa, haiwele kwa ludali lwa wanhu ne kwa mong'ho wa munhu, ila kwa ludali lwa Yesu Kilistu na Nguluwi Mhaza yawele nakamzilipula Yesu kulawa kuli wabagame, 2 hamwe wang'holozangu weng'ha wawele hamwe na heni twanguvilamsa vilundo vya wanhu walingumkunda Kilistu vya ako Galatiya. 3 Twangugana muwe na kikala goya kulingulawa kwa Nguluwi Mhaza wa hetwe na kulawa kwa Mkulu Yesu Kilistu.

4 Kilistu nakelavya yuye kwa chiwalo cha gehile ga hetwe kwa kiwhana na igano lya Nguluwi wa hetwe na Mhaza, leka yatulohole kuli isi ayi yihile ya sambi. 5 Nguluwi yatogoligwe mazuwa gose! Ena.

6 Ndangububuwala kwa vila kwa mhela uchefu hela mwangumleka Nguluwi yawele nakawachema kwa isungu lya Kilistu na kuwinza usenga wunji ulingoneka kota Mbuli Inojile. 7 Ndangukomya, kuduhu Mbuli Inojile yinji. Ila ndangulonga aga kwa vila ndanguvizela kota wakuko wanhu walinguwahada, wanhu walingugana kuyajiliza Mbuli Inojile ya Kilistu. 8 Ila, wone yawe yumwe wa hetwe ama mhilisi wa kilanga, kowadamlila usenga wunji na ulivinji na wula uwele natuwadamlila, munhu ayo yapanjilwe na Nguluwi! 9 Kota vyotulonjile, sambi ndangulonga kahi, wone munhu yoneche kowadamlila mbuli inojile ilivinji na yila yomuibochele, munhu ayo yapanjilwe na Nguluwi!

10 Lelo ndangugana kumnojeza whaani, wanhu ama Nguluwi? Ama ndangugana kuwanojeza wanhu? Wone nangane kudita ahyo mazuwa gose salikuwa chitumagwa wa Kilistu.

11 Wang'holozangu ndangugana mvizele kota yila Mbuli Inojile yondiwadamlile hailawile kwa wanhu. 12 Kwa vila siibochele kulawa kwa munhu ne silanguswe na munhu. Yesu Kilistu yuye ndo yangubulile.

13 Ne majesa, namuhulika kuwala kikala kwa heni kwa katali londiwele kuli dini ya Chiyahudi na vila vyondichigazile ng'hatu chilundo cha wanhu walingumkunda Kilistu na kugana kuchidumya ng'hatu. 14 Ena, heni nandiwalongola Wayahudi wayangu wenji wotukulase kuli kibatilila dini ya Chiyahudi, nandikangaza ng'hatu kibatilila malanguso ga wasekulu wa hetwe.

15 Ila Nguluwi, kwa isungu lya heye, nakanyhagula londing'hali kupondigwa, nakanyhema leka ndiwe chitumagwa wa heye. 16 Nakamlajila mwana wa heye kwa heni leka ndiidamle mbuli inojile hali wanhu wa isi zinji, ne kupala ulonzi kulawa kwa wanhu. 17 Silutile Yelusalemu kwa wala wawele walongole kuwa watumigwa, ila nanduta Alabiya, hamba nanyhiluka kuli muji wa Damasiko. 18 Lojipulute miyaka jidatu nanduta Yelusalemu kiwona na Kefa. Kefa kwa Chigilichi ndo Petili, nandikala kwa heye mazuwa kumi na gahano. 19 Nandimona Yakubu, mng'holoze Mkulu Yesu hela hali watumigwa weng'ha. 20 Nguluwi kanguvizela kota aga gondilinguwandichila, silingulonga udesi.

21 Hamba nanduta kuli isi za Siliya na Kilikiya. 22 Mhela awo, heni nandali sizeleche kwa chilundo cha wanhu chilingumkunda Kilistu kula Yudeya. 23 Hewo nawahulika mbuli ilingulonga, "Munhu yula aho hamwande nayali yotugaza, lelo kangudamla makundo gagala gawele nayali yojeza kugadumya." 24 Lelo, nawamtogola Nguluwi kwa chiwalo cha heni.