1 Lelo ndangulonga hino, yalinguhalila lufufu lwa mhaza wa heye, wone yawe yang'hali mwana kangiwhana na mpogozi hanga lufufu lweng'ha ndo lwa heye. 2 Mhela awo weng'ha kowa hali ulolezi wa walingumlolela mbaka mhela wula uwichigwe na mhaza wa heye ufiche. 3 Hihyo du natwe lotuwele wana, natwali wapogozi wa ludali lulingulongoza isi yeng'ha. 4 Ila loufichile mhela wula utanganiche, Nguluwi nakamlajiza Mwanage yawele nakapondigwa na mdala, naye nakekala kwa kulongozwa na malajizo, 5 leka yawagombole wala walingulongozwa na malajizo leka hetwe tuditigwe kuwa wana wa Nguluwi.

6 Kwa vila hemwe lelo mwa wanage, Nguluwi nakamlajiza Muhe wa Mwanage mnhumbula ya hemwe, Muhe yawele ngulila "Aba," Ilinguzeleka "Mhaza." 7 Lelo, hegwe hauwele mpogozi, ila kwa mwana. Wone kwa mwana, kobochela geng'ha gawele Nguluwi nakawawichila wana wa heye.

8 Katali lomwali hamumzelele Nguluwi, namjikolela mijito jila milungu ja udesi. 9 Ila sambi, kwa vila namumzela Nguluwi, ama tulonje namzeleka na Nguluwi, mwanguweza ndaze kuhiluka kahi kwa jila Mimazoga mizunwa na ng'hochele, ahyo mwangugana muwe wapogozi wa ajo kahi? 10 Mng'hali mwanguwinza zuwa na myezi na miyaka! 11 Ndangudumba kota mijito jong'holile kwa chiwalo cha hemwe, najajilia hela!

12 Wang'holozangu, ndanguwadedeza kota miwhane na heni, kwa vila nani nda kota hemwe. Hamnditile wihe woneche. 13 Mwanguvizela kota kutamika kwa heni nakumha heni honhu ha mwaluko wa kuwadamlila hemwe Mbuli inojile. 14 Ahyo, mhela wula hambezile heni ne kundema kwa chiwalo cha utamwa wa heni uwele nauwawika kuli kujezigwa, ila nambochela kota mhilisi ama yuye Yesu Kilistu. 15 Namsangalala, lelo nakulawila choni? Ndangilaha kota mhela wula mwahawezile kusa meho ga hemwe na kumha heni. 16 Ndaze, lelo nandiwa mwihe wa hemwe kwa vila ndanguwalonjela kukomya?

17 Awo wanhu wanji walingitunya kwa chiwalo cha hemwe hawalingugana mfichigwe na ganojile. Wangugana kuwabagula na heni, leka hemwe mitunye kwa chiwalo cha hewo. 18 Lelo ndo inoga kuli chila zuwa kudita mbuli inojile ng'hatu kwa kitunya kwa chiwalo cha wanji kuli mbuli zinojile na haiwele kuli mhela uwele heni nda hamwe na hemwe hela. 19 Wana wa heni, kota vila mamo yawele na himila vyoyalingona usungu mhela wa kuponda, nani kahi ndanguwonela usungu mbaka aho Kilistu hoyolumbigwa mgati mwa hemwe. 20 Ndahawele na hemwe sambi, hanji ndahagalamle lizi lya heni kwa vila ndina lunhwinhwi kwachiwalo cha hemwe!

21 Ndonjeleni, hemwe mlingugana kulongozwa na malajizo, ndaze, hambe muhuliche vyogalingulonga malajizo? 22 Kwa vila nayandichigwa kuli chitabu cha malajizo ga Musa, kota Abulahamu nayali na wana weli, yumwe kwa mdala mpogozi na wakeli kwa mdala yelejehe. 23 Yula mdala yawele mpogozi, nakalela mwana kota wanhu wanji vyowalingulela, ila yula mdala yelejehe nakalela kulawila kuli ilagano lya Nguluwi. 24 Mbuli azi naziwa ziwhanile, kwa vila mamo awo weli ndo kiwhana na malagano meli, ilagano lya mwaluko ndo lila liwele naliwichigwa kuli chidunda cha Sinai, liwele naliponda wana kuli upogozi. Ilagano ali lyangiwhana na mdala Hagali. 25 Hagali kangulajila chidunda cha Sinai chiwele Alabiya, chiwele changiwhana na Yelusalemu ya sambi, iwele kuli upogozi hamwe na wanage. 26 Ila Yelusalemu iwele kilanga ndo muji uwele wilejehe na ndo mamo wa hetwe, 27 kwa vila Maandiko Matakatifu gangulonga,

"Usechelele, hegwe uwele mhende yohambe uponde,

utowe luchenze, hegwe uwele haupondile,

kwa vila mdala yula yalechigwe kana wana wenji,

kusinda yula yawele na mlume."

28 Lelo wang'holozangu, hetwe twa wana wa Nguluwi kwa chiwalo cha ilagano lya heye, kota vyoyawele Isaka. 29 Ila kota vila mazuwa ga yula mwana yawele nakapondigwa kwa kukolela lukuli, vyoyamgazile mwana yawele nakapondigwa kwa ludali lwa Muhe wa Nguluwi, hiho ndo vyoiwele mbaka mhela awu. 30 Ila Maandiko Matakatifu gangulonga ndaze? Gangulonga hino, "Muwinje mamo mpogozi hamwe na mwanage kwa vila wana wa mpogozi hohalila hamwe na wana wa mamo yelejehe." 31 Ahyo, wang'holozangu, hetwe hatuwele wana wa mamo mpogozi ila twa wana wa mamo yelejehe.