1 Hamba, lojipulute myaka kumi na jine, nanduta kahi Yelusalemu hamwe na Banaba na Tito. 2 Nanduta ako kwa vila Nguluwi nakangubulila. Nanhing'hana na vilongozi chinyele, nandiwalonjela awo vilongozi usenga wa Mbuli Inojile yondamle kwa wanhu wa isi zinji. Nandita ahyo, leka mijito ja heni jileche kwajilila hela. 3 Mbaka myangu Tito, yawele ndo Mgilichi, haganigwe kwinjizwa ikumbi, 4 hanga nakwali na wang'holozetu wanji wa udesi wawele nawagana yenjizwe ikumbi. Wanhu awa naweyinjiza chinyele leka kupugajiza kilejeha kotulinako kuli kilumba na Yesu Kilistu, leka watudite tuwe wapogozi. 5 Hatikundize na hewo, leka kukomya kwa Mbuli Inojile, kusigale hali hemwe mazuwa gose.

6 Ila kwa wala vilongozi, sijesile kuwala ukulu wa hewo kwa vila Nguluwi kahela uganililo, wanhu awo hawamhele chinhu choneche. 7 Ila, hewo nawavizela kota Nguluwi nayali yandajize kudamla Mbuli Inojile kwa wanhu isi zinji, kota Petili vyoyalajizwe kudamla Mbuli Inojile kwa Wayahudi. 8 Kwa vila yula yamditile Petili yawe chitumagwa kwa Wayahudi, ndo yuye yawele nakanditila nani ndiwe chitumagwa kwa wanhu wa isi zinji. 9 Lelo Yakubu na Kefa na Yohani, wawele nawoneka kota nda vilongozi wa chilundo cha walingumkunda Kilistu, nawavizela kota Nguluwi nakamha heni utambichizo awo, nawatibata moko Banaba na heni, uwe ulajilo wa kuwa hamwe kuli mijito. Hetwe natuganigwa kukola mijito kwa wanhu wa isi zinji na hewo wakole mijito kwa Wayahudi. 10 Nawatulanda chinhu chimwe chiwele ndo kuwakumbuchila wazunwa na kuwatanza, mbuli iwele nandikangaza ng'hatu kukola.

11 Ila Petili loyafichile kuli muji wa Antiokiya, nanditwanza na heye kwa vila nakawifya. 12 Kwa vila kung'hali wanhu wamwe wawele nawalajizwa na Yakubu kuya aho, Petili nayali yolya hamwe na wanhu wa isi zinji. Ila lowafichile, nakaleka kulya wanhu wa isi zinji kwa vila nayali yochidumba chilundo cha wanhu chiwele nachali chiwagana wanhu wenjizwe ikumbi. 13 Nawo Wayahudi wanji nawadita ahyo mbaka Banaba naye nakelumba na hewo kuli kudita ahyo. 14 Lombone kota hawalingudita kwa kiwhana kwa kukomya kwa Mbuli Inojile, nandimlonjela Petili hali wanhu weng'ha, "Hanga hegwe kwa Myahudi, nagwe kwangikala kota munhu wa isi zinji na haiwele kota Myahudi! Kwanguweza ndaze lelo kuwadita wanhu wa isi zinji leka wawinze vihendo vya Wayahudi kwa lupichi?"

15 Ndangukomya, hetwe natupondigwa Wayahudi, hatuwele wanhu wa isi zinji wawele nawachemigwa wehile. 16 Twanguvizela kota munhu halingoneka yatanganiche hali Nguluwi kwa kuwinza malajizo, ila kwa kumkunda Yesu Kilistu hela. Ahyo hetwe natwe natumkunda Yesu Kilistu leka tuwe tutanganiche kwa nzila ya makundo ga hetwe kwa Kilistu, ila haiwele kwa kuwinza malajizo, kwa vila haduhu munhu yoditigwa yatanganiche kwa kudita kota vyogalingugana malajizo. 17 Wone kuli kupala kuditigwa leka tuwe watanganiche kwa kilumba na Kilistu twangoneka kota tuna gehile, ndaze, mbuli ayi yangoneka kota Kilistu kangutanza gehile? Hebu! 18 Nambifya nzila ya kitumbila malajizo. Wone lelo ndanguzenga kahi, ndangoneka kota heni nda mwihe. 19 Kwa vila kuwala ago malajizo, heni nambagama, malajizo ago nagang'hopola, leka ndikale kwa chiwalo cha Nguluwi. Heni nambagama hamwe na Kilistu kuli msalaba, 20 na sambi ndangikala, ila siwele heni kahi, ila Kilistu ndo yalingikala mgati mwa heni. Kikala aku kondilingikala sambi ndangikala kwa makundo, makundo ga kumkunda Mwana wa Nguluwi yanganile na kuulavya ukomu wa heye kwa chiwalo cha heni. 21 Silingulilema Isungu lya Nguluwi. Wone munhu kanguditigwa yawe yatanganiche kwa kukolela kibatilila malajizo, lelo Kilistu nakabagama hela!