1 Hemwe Wagalatiya, muwa wapoka ng'hatu! Whaani yawele nakawahawila? Mbuli ya kugazigwa kwa Yesu Kilistu naisimilwa hazelu hali meho ga hegwe. 2 Ndangugana kuvizela chinhu chimwe kulawa kwa hemwe, ndaze, namumbochela Muhe wa Nguluwi kwachiwalo cha kweneza malajizo vyogalingugana ama kwa chiwalo cha kuhulika na kuikunda Mbuli Inojile? 3 Ndaze, hemwe mwawapoka ng'hatu? Hemwe namwaluka geng'ha kwa kutanzigwa na Muhe wa Nguluwi, ndaze, lelo mwangugana kusinda kwa mong'ho wa hemwe? 4 Ndaze, magazo geng'ha gawele nagawafika hemwe hagawele chinhu? Hebu! 5 Ndaze, Nguluwi kanguwapaga Muhe wa heye na kudita vinduzanduza hali hemwe kwa vila mwanguwinza malajizo, ama kwa vila mwanguihulika Mbuli Inojile na kuikunda?

6 Kota Maandiko Matakatifu vyogalingulonga, "Abulahamu nakamkunda Nguluwi na kwa makundo ga heye, Nguluwi nakamtawiza kota nakatanganika." 7 Lelo mvizele kota wala weng'ha walingumkunda Nguluwi, awo ndo wawele wana wa Abulahamu. 8 Maandiko Matakatifu nagalajila kota Nguluwi kowadita wanhu wa isi zinji wawe watanganiche kwa kukolela makundo. Ahyo Maandiko Matakatifu nagalongola kudamla Mbuli Inojile kwa Abulahamu, "Kwa kukolela hegwe nhanzi za isi zeng'ha zotambichizwa." 9 Lelo, wala wawele na makundo wangutambichizwa hamwe na Abulahamu yawele nakakunda.

10 Ila wala weng'ha wangitumbila kweneza galinguganigwa na malajizo, awo wopanjilwa na Nguluwi, kwa vila Maandiko Matakatifu gangulonga, "Yoneche halingibatilila na kweneza geng'ha gandichigwe kuli chitabu cha malajizo, kopanjilwa na Nguluwi" 11 Kukomya kota Malajizo hagalinguweza kumdita munhu yawe yatanganiche kwa Nguluwi kwa vila Maandiko Matakatifu gangulonga, "Yatanganiche kochikala kwa makundo." 12 Ila malajizo hagalingitumbila makundo, ila Maandiko Matakatifu gangulonga, "Yalingweneza galinguganigwa na malajizo, kochikala."

13 Kilistu nakatugombola kuli kupanjilwa na malajizo kwa kuhola kupanjilwa ako kwa chiwalo cha hetwe, kwa vila Maandiko Matakatifu gangulonga, "Nakapanjilwa munhu yoneche yawele nakaninizwa na kukopoligwa kuli igodi lya kukopola wanhu." 14 Mbuli ayi naikoleka leka wula utambichizo woyapegwe Abulahamu uduliche kwa wanhu wa isi zinji kwa kukolela Kilistu Yesu. Kwa nzila ya makundo, tumbochele yula Muhe yawele Nguluwi nakalagana kota kotupa.

15 Wang'holozangu, ndowalonjela vila wanhu vyowalinguganigwa kikala kuli chila zuwa, haduhuli munhu yoweza kupungula ama konjeza chinhu kuli malagano hali wanhu weli. Wone malagano gaditigwe na kuwichigwa muhuli haduhu munhu yalinguwika hafungo ama konjezela chinhu kuli chila chiwele nawalagana. 16 Lelo Abulahamu nakapegwa malagano, heye hamwe na mlelwa wa heye. Gandichigwe hambe galonje, "Na lulelo lwa hegwe," Kulajila wanhu wenji, ila gangulonga, "Na mlelwa wa heye," Kulajila yumwe, naye ndo Kilistu. 17 Chondilingugana kulonga ndo achi, Nguluwi nakadita ilagano na Abulahamu, nakalitawiza, malajizo gawele nagalavigwa kuli miyaka miya zine na makumi gadatu hamba, hagoweza kutang'ula, ama kusa chila choyalonjile. 18 Kwa vila, wone ndolendole ya Nguluwi yangitumbila malajizo, lelo hambe itumbile kahi ilagano lya Nguluwi. Ila Nguluwi nakamnojeza Abulahamu kwa chila choyalonjile. 19 Lelo malajizo gangukola choni? Nagonjezwa aho leka kulajila wihe ndo chinhu chachi, mbaka hoyokuya yula mlelwa wa Abulahamu, yawele nakapegwa lila ilagano. Malajizo nagagaligwa na wahilisi kwa moko ga mhanyisi. 20 Ndangukomya, mhanyisi halinguganigwa wone mbuli ayo yangumuwala munhu yumwe na Nguluwi ndo yumwe.

21 Ndaze, malajizo gangitwanza na malagano ga Nguluwi? Ne hado! Kwa vila, wone nakulavigwe malajizo galinguwapa wanhu ukomu, lelo twahaditigwe watanganiche kwa kukolela Malajizo. 22 Ila Maandiko Matakatifu nagalonga kota isi yeng'ha ya hali ulongozi wa gehile, ahyo walingukunda wapegwe lila ilagano liwele nalilavigwa na Nguluwi, kwa kumkunda Yesu Kilistu.

23 Lotung'hali kupegwa makundo, malajizo nagatudita wanweng'hwa, natubeteza makundo ago gagubuligwe. 24 Lelo ago malajizo nagatulongoza kuluta kwa Kilistu, leka kukolela makundo tuditigwe watanganiche hali Nguluwi. 25 Lelo kwa vila gala makundo nagafika, hatulingulongozwa kahi na malajizo.

26 Kwa makundo, hemwe weng'ha namuwa wana wa Nguluwi kwa kilumba na Kilistu Yesu. 27 Hemwe weng'ha muwele nambatizigwa namilumba na Kilistu namuwa kota heye Kilistu. 28 Ahyo, haduhu kahi kibagula hali Myahudi na Mgilichi, chitumagwa na munhu yelejehe, mlume na mdala. Weng'ha ndo chinhu chimwe kwa kilumba na Yesu Kilistu. 29 Wone hemwe mwa wanhu wa Kilistu, namuwa walelwa wa Abulahamu na mobochela gala gawele Nguluwi nakalagana.