1 Kilistu nakatugombola, nakagana tilejehe. Lelo mwime goya mleche kukunda kuwa wapogozi kahi. 2 Muhulichize! Heni nda Paoli ndilingulonga na hemwe! Wone mkunde kwinjila ikumbi, Kilistu howatanza ne chinhu. 3 Ndangulonga kahi ne uviso, chila yalingukunda kwinjila ikumbi kanguganigwa yebatilile malajizo geng'ha ga Musa. 4 Hemwe mlingugana kuwa mtanganiche kukolela malajizo, namibagula na Kilistu, namulileka Isungu lya Nguluwi. 5 Ila hetwe, twanako kitumbila kota Nguluwi kotudita tuwe watanganiche kwa kukolela makundo. Acho ndo chotulingubeteza ng'hatu kwa ludali lwa Muhe wa Nguluwi. 6 Kwa vila wone tilumbile na Kilistu Yesu, kwinjila ikumbi ama kuleka kwinjila ikumbi hakuwele chinhu, ila chinhu chikulu ndo makundo galingukola mijito kwa igano.

7 Namwali mdita goya, lelo whaani yawalemeze kibatilila kukomya? 8 Yaditile chinhu acho hawele Nguluwi yawele nakawachema. 9 Kota vyowalonjile, "Usaso udo hela wangwambuza utimbo weng'ha uwele kuli chidoto usase!" 10 Kwa vila natilumba na Mkulu, ndangukomya nhumbula za hemwe hazigaluka. Ila munhu yoneche yula yawele kowahanzanya, kotagusigwa na Nguluwi.

11 Wang'holozangu wone ndangulutilila kudamla mbuli ya ikumbi lekachoni lelo ndangugazigwa? Wone na iwe ahyo, kudamla kwa heni kwa chiwalo cha msalaba wa Kilistu, hakwaligala soni yoneche. 12 Ndangugana wanhu awo wawele wanguwahanzanya walute kutali na hemwe, webelenhuche wawo!

13 Hemwe wang'holozangu, namchemigwa muwe wanhu welejehe. Ila kilejeha ako kuleche kuwa chiwalo cha kulongozwa na maya genu ga wihe, ila mwanguganigwa mkole mijito kwa chiwalo cha mwemwe baho kwa igano. 14 Kwa vila malajizo geng'ha ga Musa gagwenezwa kuli kibata ulonzi awu umwe, "Mgane miyago kota vyoulingigana gwegwe baho." 15 Ila wone mochiluma na kidakula kota migongolo, milolele mleche kilumiza mwemwe baho!

16 Lelo ndangulonga hino, ukomu wa hemwe ulongozwe na Muhe wa Nguluwi, namwe hamuwinza kahi maya ga wihe gawele mgati mwa hemwe. 17 Kwa vila, maya ga wihe gawele mgati mwetu hambe gekundize na yalingugana Muhe wa Nguluwi na gala galinguganigwa na Muhe hambe gekundize na maya ga wihe. Vinhu avi vili vyangilewa, ahyo, Muhe wa Nguluwi hoyowalongoza hamdita hela choneche gomlingugana kudita mwemwe. 18 Wone mlongozwe na Muhe Yelile, lelo hamulongozwa kahi na malajizo.

19 Lelo madito ga wanhu walinguwinza maya ga wihe gawele mgati mwao nagazeleka, nago ndo ung'hondwa na kubunza na wavu, 20 kufugamila jimalukolo na uhawi na ung'honyo na kilewa na maya na kuzudila na ubuhu na kitwanza na kilema na kibagula, 21 kiwonela maya na kugala na kudongoka na vinhu vinji vilingiwhana na avyo. Ndanguwakanya kahi kota vyondiwakanyile hamwande, wanhu walingudita mbuli kota azo hawokwinjila kuli undewa wa Nguluwi.

22 Munhu yalingulongozwa na Muhe Yelile vinhu avi vyokoneka mgati mwa heye, vinhu avyo ndo igano na kusangalala na kikala goya na kwimilila na kunoga na yalingulavya vinhu ne kiwuza na kukundigwa, 23 uliholile na kilongoza. Kuduhu malajizo galinguweza kulema mbuli azo. 24 Wala wawele na Yesu Kilistu nawagagaza majesa gehile na maya ga hewo gehile gawele mgati mwa ng'huli za hewo. 25 Muhe Yelile nakatupa ukomu, lelo tumleche yalongoze ukomu wa hetwe. 26 Lelo tuleche kidaya na tuleche kilewa na kiwonela maya.