1 Wang'holozangu, wone mmone munhu yunji nakawifya, lelo hemwe mlingulongozwa na Muhe Yelile, mumkanye munu ayo, ila mdite ahyo kwa uliholile leka namwe mleche kujezigwa. 2 Mitanze kwa kidwika mhomholo za hemwe, kwa kudita ahyo mokweneza malajizo ga Kilistu. 3 Wone munhu yoneche kochijesa kota ka yatanganiche kusinda wanji, munhu ayo kangihada yuye. 4 Ila chila yumwe na yelole goya vyoyalingudita heye yuye. Wone uwe unojile, lelo kanguweza kona lutogo kwa chiwalo cha gala gouditile ne kuwa na chiwalo cha kiwhaniza na munhu yunji. 5 Kwa vila chila munhu kochidwika mhomholo ya heye yuye.

6 Yalingulanguswa ulonzi wa Nguluwi kanguganigwa yamlonjele mlangusa wa heye gala geng'ha ganojile.

7 Mleche kihada, Nguluwi hambe yaditilwe idaba. Kwa vila chowanyalile wanhu ndo chowobeta. 8 Yalingunyala kwa kunojeza maya gehile gawele mgati mwa heye, kobeta kubagama, ila yula yalingunyala kwa kumnojeza Muhe wa Nguluwi, kobeta kulawa kwa ayo Muhe ukomu wa mazuwa gose. 9 Lelo tuleche kutoka kudita ganojile, kwa vila tobeta mbena kuli mhela wuwula wone hatutweguka nhumbula. 10 Lelo chila hotupata mhumhu tuwaditile ganojile wala wamkundile Yesu na wanhu wanji weng'ha.

11 Mlole vila vyonyandiche kwa helufi ng'hulu, kwa moko wa nene baha. 12 Wala walingugana koneka kota wanoga kwa mbuli ya lukuli ndo walingugana kuwadita hemwe mwinjile ikumbi kwa lupichi, leka waleche kugazigwa kwa chiwalo cha msalaba wa Kilistu. 13 Kwa vila awo wawele nawenjila ikumbi hawalinguwinza malajizo ga Musa, ila wanguwagana hemwe mwinjile ikumbi leka wedaye kwa chiwalo cha chila chikoleche kuli ng'huli za hemwe. 14 Nguluwi yanhanze leka ndeche kidaya kwa chiwalo cha chinhu choneche, ila msalaba wa Mkulu wa hetwe Yesu Kilistu, kwa kukolela msalaba awo isi yeng'ha naigazika kwa heni, nani nangazika kwa isi yeng'ha. 15 Kwinjila ikumbi ama kuleka kwinjila ikumbi haiwele chinhu, chilinguganigwa ndo kuwa chilumbigwe chinyale. 16 Weng'ha walinguwinza nzila ayi ndangulanda kikala goya na isungu kwa chiwalo cha hewo, kahi ndangulanda makundo na utambichizo kwa chiwalo cha Waisilaeli, wanhu wa Nguluwi.

17 Lelo kulawila sambi munhu yoneche yaleche kungaza, kwa vila ng'hovu zondilinazo mlukuli mwangu zangulajila kota heni nda mpogozi wa Yesu.

18 Wang'holozangu, kunoga kwa Mkulu wa hetwe Yesu Kilistu kuwe hamwe na hemwe. Ena.