1 Heni Paoli ndiwele mtumigwa wa Yesu Kilistu kwa igano lya Nguluwi.

Ndanguwandichilani hemwe wanhu wa Nguluwi ako Efeso, muwele mtanganiche kuli kilumba na Yesu Kilistu.

2 Ndanguwaganila utambichizo na kikala goya kulawa kwa Nguluwi Mhaza wa hetwe na kwa Mkulu Yesu Kilistu.

3 Yatogoligwe Nguluwi na Mhaza wa Mkulu wa hetwe Yesu Kilistu! Kwa vila kuli kilumba na Kilistu nakatutambichiza kwa kutugalila utambichizo wa Chimuhe kilanga. 4 Ahyo, isi loing'hali kulumbigwa, Nguluwi nakatuhagula tuwe wa heye kuli kilumba na Kilistu leka tuwe welile tulihela wihe hali heye. Kwa chiwalo cha igano lya heye, 5 Nguluwi nakagana kulawa mwaluko kutigala kwa heye kota wanage kwa kukolela Yesu Kilistu. Ndo vyoyaganile na chimnojeze. 6 Lelo tumtogole Nguluwi kwa chiwalo cha utambichizo wa heye uwele ukulu woyatupele hela, kwa kukolela mwanage yamganile! 7 Kwa vila kwa danda ya heye Kilistu hetwe twangilejeha, twangusilwa gehile ga hetwe. Ahyo ndo vyouwele ukulu wa kunoga kwa Nguluwi, 8 woyatupele kwa winji! Kwa luhala na nyhala za heye zeng'ha. 9 Nguluwi nakatuzelesa gala ga heye goyavisile, goyaganile na kudita. Nakanojezwa na kugana kudita kwa kukolela Kilistu. 10 Ago gokoleka mazuwa gala Nguluwi kuli mhela woyauwichile, wone ufiche ndovikungajiza hamwe vilumbigwe vyeng'ha na chila chinhu kuli ulanga na kuli isi, Kilistu kowa mkulu wa vinhu avyo vyeng'ha.

11 Vinhu vyeng'ha navikoleka kota Nguluwi vyoyaganile, Nguluwi yatuhagule hetwe tuwe wa heye, kukolela Yesu Kilistu kota navyoyaganile, nakagana iwe ahi kulawila mwaluko. 12 Lelo hetwe tulongole kitumbila Kilistu twanguganigwa kumtogola Nguluwi kwa mbuli ya ukulu wa heye!

13 Namwe kahi wanhu wa isi zinji namuuhulika usenga wa kukomya kwa Mbuli Inojile iwele naiwagalila ulohozi. Namumkunda Kilistu, Nguluwi nakawawika ulajilo hemwe kwa kilumba na Kilistu, muwe wanhu wa heye kwa kuwapa yula Muhe Yelile yoyalagane na hetwe kutugalila. 14 Ayo Muhe ndo kotawiza kupegwa geng'ha gala ga Nguluwi goyalonjile kuwegalila wanhu wa heye, mbuli ayi yangutawiza kota Nguluwi kowadita welejehe ng'hatu weng'ha wawele wa heye. Lelo tumtogole Nguluwi kwa ukulu wa heye!

15 Kwa chiwalo acho, kulawila honyuliche mbuli ya makundo ga hemwe kwa Mkulu Yesu na igano lya hemwe kwa wanhu weng'ha wa Nguluwi. 16 Silechile kulonga malumbo kwa Nguluwi kwa chiwalo cha hemwe. Ndanguwakumbuchila kuli kulanda kwa heni, 17 leka Nguluwi wa Mkulu wa hetwe Yesu Kilistu, Mhaza yawele na ukulu, yawape Muhe wa heye yawele kowapa luhala na kuwagubulila leka mumzele goya Nguluwi. 18 Ndangumlanda Nguluwi yawadite mvizele goya, leka mpate kuvizela kula kitumbila koyawachemele na ukulu wa heye woyawawichile wanhu wa heye. 19 Muweze kuvizela vyoyawele na ludali luwele lukulu ng'hatu kwa chiwalo cha hetwe tulingukunda. Ludali alo lulingukola mijito mgati mwa hetwe ndo lwangiwhana na wula mong'ho ukulu ng'hatu 20 uwele Nguluwi naumzilipula Kilistu kuli wabagame kwa mong'ho awo na kumdita yekale ubanzi wa heye wa kudilo ako kilanga. 21 Ako kilanga, Kilistu kangulongoza hali chila undewa na ludali na ukulu na kolongoza hali chila ukulu ulinguhega na chila itagwa lilinguchemigwa kuli isi ayi na kuli isi ilinguya. 22 Nguluwi kamuwika Yesu hali ludali lwa vinhu vyeng'ha, kahi nakumuwika kuli chilundo cha wanhu wa Nguluwi yawe mutwi wa chilundo cha wanhu walingumkunda Kilistu. 23 Chilundo cha wanhu wa Nguluwi ndo lukuli lwa Kilistu, heye ndo yalingweneza vinhu vyeng'ha chila honhu.