1 Katali hemwe namwali kota wabagame kwa chiwalo cha wihe na gehile ga hemwe. 2 Mhela wula namikala kuli wihe na gehile na kuwinza nzila zihile za isi ayi, namwali mumhulichiza Mkulu wa gehile yawele na ludali kuli ulanga. Mkulu wa gehile ndo Limazoga, muhe yalinguwalongoza mbaka sambi wanhu wohambe wamuwinze Nguluwi. 3 Natwe tweng'ha natwali kota hewo, natikala kwa kuwinza maya gehile gawele mgati mwa hetwe na kudita mbuli zilinguganigwa kuli lukuli na luhala lwetu. Hetwe natiwhana na hewo, kota vila vyotuwele natuganigwa kubochela kuzudila kwa Nguluwi.

4 Ila Nguluwi nayali na isungu ng'hatu. Nakatugana kwa igano lyohambe liwazigwe. 5 Lelo hanga natwali tuwele tubagame kwa chiwalo cha gehile, nakatudita tuwe wakomu hamwe na Kilistu. Kwa kunoga kwa Nguluwi namwe namloholigwa. 6 Kwa kilumba na Kilistu Yesu, Nguluwi nakatuzilipula hamwe na heye, tikale hamwe na heye kilanga. 7 Nakadita aga kulajila mhela wula ukulu wa utambichizo wa heye yoyatupele kwa kunoga kuli kilumba kwa hetwe na Kilistu Yesu. 8 Kwa vila kwa kunoga kwa Nguluwi, namloholigwa kwa makundo. Makundo ago hagalawile kwa kitunya kwa hemwe, ila ndo ndolendole za Nguluwi. 9 Hambe galawe kuli madito ga hemwe baho, leka munhu yoneche yaleche kidaya kwa chiwalo acho. 10 Hetwe twa wana wa Nguluwi, kwa kilumba na Kilistu Yesu, nakatulumba kwa chiwalo cha kikala kwa kudita madito ganojile goyagawichile.

11 Mleche kusemwa aho katali, hemwe namwali hamzelele Nguluwi, namchemigwa "Hawenjile ikumbi" Na Wayahudi walingichema, "Wenjile ikumbi," Kwa chiwalo cha chikoleche kili ng'huli zao, kwa moko ga wanhu kulajila kota ndo ulajilo uhamwe wa wanhu wa Nguluwi. 12 Kahi mkumbuchile mhela uwele hemwe namwali hamzelele Kilistu, hemwe nambaguligwa na wanhu wa Isilaeli, namwali wajenzi kwa vila hamuwele na chinhu choneche cha kudita kuli malagano na Nguluwi. Namikala kuli isi ayi kuno mlihela kitumbila na kota wanhu wohawamzelele Nguluwi. 13 Aho katali, namwali kutali na Nguluwi, ila sambi kwa chiwalo cha kilumba na Yesu Kilistu, hemwe namigaligwa habehi kwa danda ya Kilistu. 14 Kwa vila Kilistu yuye nakatigalila kikala goya kwa kuwadita Wayahudi na wanhu wa isi zinji kuwa nhanzi imwe. Kwa kululavya nhambiko lukuli lwa heye nakosa ung'honyo hali hewo uwele kota lukanzi uwele nauwabagula. 15 Nakosa gala Malajizo hamwe na vihendo vyake, leka yawadite Wayahudi na wanhu wa isi zinji wawe chinhu chimwe kwa kilumba na heye, kwa kudita ahyo nakegala kikala goya. 16 Kwa kaludumya lukuli lwa heye kuli msalaba, Kilistu nakadumya ung'honyo wa hewo, nakazihanyisa nhanzi azo ziwe kota lukuli lumwe na kuzihanyisa na Nguluwi. 17 Ahyo Kilistu nakoya nakaidamla Mbuli Inojile ya kikala goya kwa hemwe wanhu wa isi zinji muwele kutali na Nguluwi, kahi kwa Wayahudi wawele habehi na Nguluwi. 18 Ahyo, kwa kukolela Kilistu, hetwe tweng'ha tuwele ndo Wayahudi na wanhu wa isi zinji twangukundigwa kuluta kwa Mhaza kwa Muhe Yelile yumwe.

19 Lelo hemwe hamuwele wajezi kahi na hamuwele wanhu wa kunze. Hemwe mwa wenyeng'haye na wanhu wa Nguluwi na mwa wanhu wa nhanzi ya Nguluwi. 20 Namwe namzenjigwa mchanya mwa msisi uwichigwe na watumigwa na waloli, naye Yesu Kilistu yuye ndo kota iganga lya msisi. 21 Kukolela heye ng'handa yeng'ha yangibatililwa hamwe na kukula na kuwa Ng'handa ya nguluwi kwa chiwalo cha Mkulu. 22 Kwa kilumba na heye, hemwe namwe mwanguzenjigwa hamwe na weng'ha wanji, leka muwe honhu ha kikala Nguluwi kwa kukolela Muhe wa heye.