1 Kwa vila hemwe mwa wana muwele namganigwa na Nguluwi, ahyo miwhane na heye. 2 Igano lyonjezeche kuli kikala kwa hemwe kota Kilistu vyoyatuganile na kuulavya ukomu wa heye kota nhambiko ilingununyilila goya na nhambiko ilingumnojeza Nguluwi.

3 Kwa vila hemwe mwa wana wa Nguluwi, ung'hondwa ama wihe woneche wula ama maya, havilinguganigwa kulonjigwa hali hemwe. Kwa vila mbuli azi hazinojile kwa wala wawele ndo welile wa Nguluwi. 4 Mleche kulonga ulonzi ulingubasa soni ama wa upoka ama kitwanza, kwa vila aga geng'ha haganojile kwa hemwe. Inoga mlonje ulonzi wa kumtogola Nguluwi. 5 Ahyo mvizele ng'hatu kota mng'hondwa ama mdesi ama mhadi ama mwavu, mazuwa gose munhu kota ayo houhalila undewa wa Kilistu na wa Nguluwi kwa vila munhu kota ayo kangiwhana na munhu yalingujifugamila jimalukolo.

6 Mleche kukunda kuhadigwa kwa ulonzi wa hihi hela, kwa chiwalo cha mbuli kota azo, kuzudila kwa Nguluwi kwanguyaga kwa weng'ha wohambe wakunde. 7 Lelo, mleche kitanza na hewo. 8 Katali namwali kuli jiza, ila sambi mwa kuli lumuli kwa vila namilumba na Mkulu, ahyo mikale kota wana wa lumuli. 9 Kwa vila lumuli lwanguwaditaga wanhu wawe na kunoga na kutanganika na kukomya. 10 Mjeze kuvizela gala galingumnojeza Mkulu. 11 Mleche kudita gehile, galingulawa kuli jiza, ila mgalavye hazelu. 12 Kwa vila mbuli zilingukoleka kwa kivisa zanguwaga soni kuzisima. 13 Ila mbuli zeng'ha ziwichigwe kuli lumuli, kukomya kwake kwangulajilwaga, 14 kwa vila lumuli lwanguditaga mbuli zeng'ha zoneche. Achi ndo chiwalo gandichigwe gangulonga hino,

"Ulilimche hegwe uwasile,

uzilipuche kulawa kuli wabagame,

naye Kilistu kokulangazila."

15 Lelo milolele vyomlingikala. Mleche kikala kota wapoka ila mikale kota wanhu wawele na luhala. 16 Mtumiye goya mhela womlinawo kwa vila mazuwa aga ndo geha. 17 Mleche kuwa wapoka ila mjeze kuvizela gala goyalingugana Mkulu. 18 Mleche kugala ujimbi kwa vila awo wowalumiza, ila mmemezwe Muhe Yelile. 19 Milonjele ulonzi wa nzimbo na nhelo za mnhumbula, mumwimbile na mumtogole Mkulu kuli nhumbula za hemwe. 20 Mazuwa geng'ha mumtogole Nguluwi Mhaza, kwa itagwa lya Mkulu wa hetwe Yesu Kilistu.

21 Chila yumwe yamhulichize myage kota vyayalingumhulika Kilistu. 22 Hemwe wache muwahulichize walume wa hemwe kota vyomulingumhulichiza Mkulu. 23 Kwa vila mlume ndo mutwi wa mchewake kota Kilistu vyoyawele mutwi wa chilundo cha wanhu walingumkunda Kilistu, naye Kilistu Mlohozi yuye nakachigombola chilundo cha wanhu walingumkunda Kilistu nawo ndo lukuli lwake. 24 Wache wawahulichize walume wa hewo kota chilundo cha wanhu walingumkunda Kilistu vyochilingumhulichiza Kilistu.

25 Namwe walume, muwagane wache wa hemwe kota Kilistu vyoyachiganile chilundo cha wanhu walingumkunda Kilistu, mbaka nakaulavya ukomu wa heye kwa chiwalo cha chilundo cha wanhu walingumkunda Kilistu. 26 Nakadita ahyo leka kwa ulonzi wa heye yachiwiche chiuyeng'ha kwa Nguluwi chilundo cha wanhu walingumkunda Kilistu, hala loyachihovuje kuli mazi, 27 leka yapate chilundo cha wanhu walingukunda Kilistu chiwele chelile na chinojile ng'hatu, chilundo cha wanhu walingumkunda Kilistu chilihela chinhu chihile, ama udesi ama wihe unji, ila chiwele chelile, chilihela nongwa. 28 Hihyo du walume wawagane wache wa hewo kota ng'huli za hewo. Mlume yalingumgana mchewake kangigana yuye. 29 Haduhu munhu yalinguulema lukuli lwa heye, ila kanguludita lugute na kululolela kota Kilistu vyoyalinguchiditila chilundo cha wanhu walingumkunda Kilistu, 30 kwa vila hetwe tweng'ha twa vitomo vya lukuli lwa heye. 31 Kota Maandiko Matakatifu vyogalingulonga, "Kwa chiwalo acho mlume komleka mhaza wa heye na mayake na kilumba na mche wa heye, nawo weli wowa lukuli lumwe." 32 Uviso awu ndo lukulu, ila heni ndangulonga kuwala Yesu Kilistu na chilundo cha wanhu walingumkunda Kilistu. 33 Ila chila mlume yamgane mchewake kota vyoyalingigana yuye na chila mche yamhulichize mlume wa heye.