1 Kwa chiwalo achi, heni Paoli nda mchinweng'ho kwa vila nda chitumagwa wa Yesu Kilistu kwa chiwalo cha hemwe wanhu wa isi zinji, ndangumlanda Nguluwi. 2 Ndikomya namuhulika kota Nguluwi kwa kunoga kwa heye, nakanipa mijito aji ndijikole kwa chiwalo cha hemwe. 3 Nguluwi nakangubulila leka ndiizele mbuli ayi iwele naivisigwa, kota vyondongole kwandika kwa uchefu mbuli ayi, 4 homsoma goya gala gonyandiche, moweza kuvizela ndaze vyondiizelele mbuli ayo ya Kilistu iwele naivisigwa. 5 Katali wanhu hawagubulilwe mbuli ayi ivisigwe, ila lelo Nguluwi kawagubulila watumigwa na waloli wa heye welile kwa kukolela Muhe Yelile. 6 Mbuli ayo ivisigwe ndo ayi, kwa kukolela Mbuli Inojile wanhu wa isi zinji wangubochela honhu hao hamwe na Wayahudi hali wula utambichizo wa Nguluwi, hewo ndo vitomo vya lukuli lulula na wangihanza ilagano lilila lyoyaliditile Nguluwi kwa kukolela Yesu Kilistu.

7 Nandiwa chitumagwa wa Mbuli Inojile kwa utambichizo wa uyeng'ha woyamhele Nguluwi, kwa ludali lwa heye lukulu. 8 Heni nda mdodo kusinda wanhu weng'ha wa Nguluwi, ila nakamha heni kunoga kwa heye, leka ndiwadamlile wanhu wa isi zinji kuwala lufufu lwa Kilistu wohambe uweze kupimigwa, 9 na kuwadita wanhu waizele mbuli ya Nguluwi ivisigwe vyoilingukola mijito. Nguluwi yawele ndo yavilumbile vinhu vyeng'ha nakaivisa mbuli ayo kulawa katali, 10 kwa chiwalo acho, kukolela chilundo cha wanhu walingumkunda Kilistu, wakulu na wawele na ukulu kilanga waluzele luhala lwa Nguluwi luwele vili vinji. 11 Nguluwi nakadita ahyo kota vyoyaganile mazuwa gose kwa kukolela Yesu Kilistu Mkulu wa hetwe. 12 Lelo kwa kilumba na Kilistu na kwa makundo kwa heye, hetwe twangumlutila Nguluwi ne kudumba. 13 Ahyo, ndanguwalanda mleche kugozola kwa chiwalo cha magazo gondilingugapata kwa chiwalo cha hemwe, kwa vila ndangudita ahyo kwa chiwalo cha welile wa hemwe.

14 Kwa chiwalo acho, ndangumfugamila Mhaza, 15 yawele chaluchizo cha nhanzi zeng'ha muisi na kilanga. 16 Ndangumlanda Nguluwi kota winji wa welile wa heye, yawape ludali lwa Muhe wa heye, mong'ho leka muwe nzinzili mgati mwa hemwe, 17 naye Kilistu yekale kuli nhumbula za hemwe kwa makundo. Ndangumlanda leka muweze kuwa na mizabi na msisi kuli igano. 18 Leka mvizele hamwe na wanhu wa Nguluwi vila igano lya Kilistu vyolilingwenela kwa ugazi na ulefu, kwa wimo na kina. 19 Ena, mpate kuvizela igano lya Kilistu lilingupuluta luhala lweng'ha, mmemezwe ng'hatu ukulu weng'ha wa Nguluwi.

20 Tumtogole Nguluwi, kwa mong'ho wake ulingudita mijito mgati mwa hetwe kuweza kudita mbuli ng'hulu kusinda gala tulinguweza kulanda ama kijesa, 21 Nguluwi yatogoligwe kwa kukolela chilundo cha wanhu walingumkunda Kilistu na kwa kukolela Yesu na kuli lulelo lweng'ha, mazuwa gose! Ena.