1 Hemwe wana, muwahulichize wahaza na mamo wa hemwe kota vyoyalingugana Mkulu, kwa vila ayo ndo mbuli inojile. 2 "Wahulichize mhaza na mayako," Awu ndo mzilo wa mwaluko uwele na ilagano, 3 "Leka wikale mhela winji kuli isi."

4 Hemwe namwe wahaza na wamamo, mleche kuwazudiza wana wa hemwe, ila muwalolele kwa kuwalangusa na kuwapa malanguso ga Mkulu wa hetwe Yesu Kilistu.

5 Hemwe vitumagwa muwahulichize wakulu wa hemwe wa hano kuli isi kwa nhumbula ya hemwe yeng'ha, kota vyomlingumhulichiza Kilistu. 6 Mdite ahyo, haiwele mhela howowalola leka mpegwe uganililo, ila mkole mijito kwa nhumbula yeng'ha kota vyoyalingugana Nguluwi kwa vila hemwe mwa vitumagwa wa Kilistu. 7 Mkole mijito kwa usangalalo kota mwangumkolela mijito Mkulu, haiwele kota mwanguwakolela mijito wanhu. 8 Mkumbuchile kota chila munhu yalingudita ganojile, yawe chitumagwa ama munhu yelejehe, kobochela chonolo kulawa kwa Mkulu.

9 Namwe wakulu, muwaditile hihyo vitumagwa wa hemwe na mleche kuwakabusa. Mkumbuchile kota hemwe ndo kota hewo, Mkulu wa hemwe weng'ha ndo yuyula yawele kilanga, halingubagula.

10 Hamba ndanguwagana muwe nzinzili kuli kilumba na Mkulu na kuli ludali lwa mong'ho wake. 11 Mvale vinhu vyeng'ha vya kitowela ngondo vyoyawapele Nguluwi leka muweze kitwanza na mbuli zihile za Limazoga. 12 Kwa vila hatulingitowa na wanhu, ila twangitowa na ludali lwihile lwa isi yeng'ha, twangitowa na vilongozi na wakulu na wawele na mong'ho, walingulongoza isi ayi ya jiza. 13 Ahyo mvale vinhu vya kitowele ngondo vyompegwe na Nguluwi leka zuwa lihile holikuya muweze kitowa na mng'honyo na homsinda kitowa mowa mng'hali nzinzili.

14 Ahyo mikale goya, mvale isali lya kukomya mchuno mwa hemwe, kutanganika kuwe kota mivalo ja kiyamila kuli mhambaga za hemwe, 15 muwadamlile wanhu Mbuli Inojile ya kikala goya kota vyomlinguvala makwamba. 16 Mhela weng'ha mibate ngawo ya makundo, leka muweze kuzimya milapi ja chiluli cha yula mwihe. 17 Mbochele ulohozi kota kofia ya hemwe ya chuma na ulonzi wa Nguluwi kota ipanga lyompegwe na Muhe Yelile. 18 Mdite aga geng'ha kwa kulanda, mumlande Nguluwi yawatanze. Mlande mhela weng'ha kota Muhe Yelile vyoyalinguwalongoza. Ahyo mlutilile kulanda ne kugozola, mazuwa geng'ha mlande kwa chiwalo cha wanhu wa Nguluwi. 19 Hihyo du mlande kwa chiwalo cha heni leka Nguluwi yamhe heni ulonzi wa kulonga leka ndoje ne kudumba, wanhu wavizele uviso wa Mbuli Inojile. 20 Kwa vila heni nda msenga wa Mbuli Inojile mbele mchinweng'ho. Mlande kwa chiwalo cha heni leka ndamle ne kudumba Mbuli Inojile kota vyondilinguganigwa kudita.

21 Tukiko, mng'holozetu yotulingumgana, chitumagwa yatanganiche kuli mijito ja Mkulu, kowalonjela mbuli za heni, ahyo movizela chondilingudita. 22 Ndangumlajiza kwa hemwe leka yawalonjele mbuli za hetwe na yawakangaze hemwe nhumbula.

23 Ndangugana kikala goya na makundo viwe hamwe na hemwe wang'holozangu, hamwe na igano lilingulawa kwa Nguluwi Muhaza na lilingulawa kwa Mkulu Yesu Kilistu. 24 Ndangumlanda Nguluwi yawape utambichizo wanhu weng'ha walingumgana Mkulu wa hetwe Yesu Kilistu kwa igano lyohambe limale.