1 Heni Paoli na Timoteyi, vitumagwa wa Yesu Kilistu, twanguwandichila hemwe wanhu wa Nguluwi ako Filipi muwele namilumba na Yesu Kilistu, hamwe na vilongozi na wala wawele wanguchitanza chilundo cha wanhu walingumkunda Kilistu. 2 Twangugana mbochele kunoga na kikala goya kulawa kwa Nguluwi Mhaza na kwa Mkulu Yesu Kilistu.

3 Ndangulonga malumbo kwa Nguluwi, chila mhela hondiwakumbuchila, 4 na chila mhela hondilanda kwa chiwalo cha hemwe, ndangulanda kwa usangalalo, 5 kwa vila namnhanza kuli mijito ja mbuli inojile kulawa zuwa lila lya mwaluko mbaka mhela awu. 6 Lelo ndanguvizela ng'hatu kota Nguluwi yawele nakaluka kukola mijito aji jinojile mgati mwa hemwe, kojidita jilutilile mbaka jenele kuli zuwa lya kuhiluka kwa Yesu Kilistu. 7 Hihyo du vyondilinguganigwa kijesa kwa chiwalo cha hemwe weng'ha, kwa vila hemwe mwa mnhumbula ya heni. Hemwe mwa hamwe na heni kuli mijito joyamhele Nguluwi ja kuitawiza Mbuli Inojile hano mchinweng'ho na hala hamwande hombele ndilejehe. 8 Kwa vila Nguluwi ndo mlolezi wa heni, ndangulonga kukomya vila vyombele na maya ga kugana kuwona hemwe kwa igano lilingulawa kwa Yesu Kilistu.

9 Kulanda kwa heni kwa Nguluwi ndo aku, igano lya hemwe lyonjezeche ng'hatu, muwe na uwanzi wa kukomya na luhala lweng'ha, 10 leka muweze kuhagula mbuli iwele inojile ng'hatu. Aho ndo homuwa mwelile na mlihela nongwa yoneche yila kuli zuwa lila lya kuhiluka kwa Kilistu. 11 Hamba ukomu wa hemwe wowa umemile mbuli zinojile zila zilingumnojeza Nguluwi, zilingulawa kwa Yesu Kilistu kwa mbuli ya ukulu na kumtogola Nguluwi.

12 Wang'holozangu, ndangugana mvizele kota mbuli zeng'ha ziwele nazifika heni nazinhanza ng'hatu kuli kulutilila kudamla Mbuli Inojile. 13 Kwa ago geng'ha, wamizi weng'ha wa ng'handa ya mndewa hamwe na wanji nawavizela kota nda mchinweng'ho kwa vila heni ndangumkolela mijito Kilistu. 14 Kwa chiwalo cha heni kuwa mchinweng'ho nakuwadita wang'holozangu wenji wetumbile ng'hatu kwa Mkulu na kuweza kudamla usenga wa Nguluwi ne kudumba. 15 Ndangukomya, wamwe wa hewo wangumdamla Kilistu kwa vila wana fihi na walingilewa, ila wanji wangumdamla Kilistu kwa kugana kuwatanza wanhu. 16 Awa wangudita ahyo kwa igano, kwa vila wanguvizela kota Nguluwi nakamha heni mbuli ayi ya kuilewela Mbuli Inojile. 17 Wala wanji wangumdamla Kilistu kwa kitwanza na haiwele kwa nhumbula inojile, kuno wochijesa kota wonyonjezela magazo ga heni mchinweng'ho.

18 Haiwele chinhu! Heni ndangusangalala wone wanhu wangudamla usenga wa Kilistu kwa chila nzila, iwe kwa fihi ama kwa kukomya. Kahi ndolutilila kusangalala. 19 Kwa vila nandivizela kota kwa kulanda kwa hemwe na kwa utanzi ulingulawa kwa Muhe wa Yesu Kilistu, ndoloholigwa. 20 Chondilingugana ng'hatu na kitumbila ndo kota kuduhu chinhu chiwele chombasa soni, lelo ndokwima nzinzili mazuwa gose na mhela awu ndowa nzinzili ng'hatu hondidamla kuli ukomu wa heni weng'ha, hondiwa mkomu ama mbagame, ndimdite Kilistu yatanganiche. 21 Kwa heni kuwa mkomu ndo Kilistu na kubagama ndo chonolo ng'hatu. 22 Wone kwa kuwa mkomu ndoweza kudita mijito jiwele na chonolo ng'hatu, lelo sivizelele kota nyhagule choni! 23 Ndiyenu ndangukwejigwa kuno na kuno kwa azo mbuli mbili. Ndangugana kuuleka ukomu awu nakuluta kikala hamwe na Kilistu, kwa vila mbuli ayo ndo inoga ng'hatu. 24 Ila kwa chiwalo cha hemwe ndo mbuli itanganiche ng'hatu kwa heni kulutilila kikala. 25 Ndangitumbila kuli mbuli azi, ndanguvizela kota ndolutilila kikala hamwe na hemwe, leka ndiwatanze kuli makundo na usangalalo konjezeka. 26 Lelo londiwa hamwe na hemwe kahi mowa na chiwalo cha kona lutogo kwa heni, kuli kilumba kwa hemwe na Yesu Kilistu.

27 Lelo mbuli itanganiche ndo kota vihendo vya hemwe viwhane na vyoilingugana Mbuli Inojile ya Kilistu, leka wone njeze kuya kwa hemwe ama ndemwele ndangugana kuhulika kota mwa nzinzili na namuwa na nhumbula imwe, kahi kwa nhumbula ayo imwe, mwangitowa ngondo kwa chiwalo cha makundo galingulawa kuli Mbuli Inojile. 28 Mleche kuwadumba wang'honyo wa hemwe, ila muwe nzinzili, acho chowalajila kota hewo wosumigwa kwa vila Nguluwi ndo yalingudita ago. 29 Kwa vila hemwe nampegwa igano na Nguluwi kwa chiwalo cha kumkolela mijito Kilistu, haiwele kumkunda hela ila kahi kwa kugazigwa kwa chiwalo cha heye. 30 Mhela awu namilumba na heni kuli kitowa ngondo ya kuilewela Mbuli Inojile. Ngondo ayi ndo yila iwele nakuhulika kota ndangitowa aho mwaluko na ndo mlinguhulika nding'hali ndichitowa mbaka mhela awu.