1 Kuduma, wang'holozangu, msangalale kuli kilumba na Mkulu. Silingutoka kuwila kuwandichila gala gondiwandichile hamwande, kwa vila gowonjezela kikala goya. 2 Milolele na awo walingudita wihe, awo nawewhana na mibwa ja kisolo, wanhu awo walinguwenjiza ikumbi wanhu wanji kwa lupichi leka wawe wanhu wa Nguluwi. 3 Wanhu wawele nawenjila ikumbi kwa kukomya ndo hetwe, haiwele hewo, kwa vila hetwe twangumfugamila Nguluwi kwa kulongozwa na Muhe wa heye na kidaya kuli kilumba na Yesu Kilistu. Hatulingitumbila lukuli. 4 Hanga heni ndahawezile kitumbila lukuli, wone hana munhu yalingijesa kota koweza kitumbila lukuli, heni ndina chiwalo chikulu cha kijesa ahyo. 5 Heni nanyinjila ikumbi kuli zuwa lya nane kulawa lomhondigwe, kahi heni nda Muisilaeli kulawa nhanzi ya Benjamini, nda Muebulaniya ng'hatu. Kwa chiwalo cha kibatilila malajizo ga Musa goyapegwe na Nguluwi, heni nandali Mfalisayo, 6 nandikangaza ng'hatu mbaka nandivigaza vilundo vya wanhu walingumkunda Kilistu. Kuwala kukundigwa kulingulawa kuli kuwinza malajizo heni nandali hela nongwa yoneche. 7 Ila ago geng'ha gawele ndahajesile kota ndo mzidi, nandigona kota nandajiliza vinhu, kwa chiwalo cha Kilistu. 8 Ena, hagawele ago hela, ila ndangona kota chila chinhu nachaga hela, kwa chiwalo cha mbuli ng'hulu ng'hatu ya kumzela Yesu Kilistu Mkulu wa heni. Kwa chiwalo cha heye nang'hunda kwajiliza chila chinhu, ago geng'ha nandigona kota midohe, leka ndiwe hamwe na Kilistu 9 na kilumba na heye ng'hatu. Heni kahi nandema koneka kota nojile hali Nguluwi, kulingulawa kwa kuwinza malajizo ila ndangoneka kota nojile hali Nguluwi kwa kumkunda Kilistu, kulingulawa kwa Nguluwi kwa kukolela makundo. 10 Chondilingugana ndo kumzela Kilistu na kuwona mong'ho wa kuzilipuka kwa heye, kilumba na heye kuli magazo ga heye na kiwhana na heye kuli kubagama kwa heye. 11 Nani ndangitumbila kota ndozilipuligwa.

12 Silingulonga kota nafika ama nhanganika. Ndangulutilila kikangaza leka ndiipate yila ndolendole iwele kwa ayo ndolendole Yesu Kilistu nakembata leka ndiwe wa heye. 13 Ndikomya wang'holozangu, silingulonga kota namhegwa ndolendole ayo, ila ndangukola mbuli imwe, ndangusemwa gala gapulute na kikangaza kugabatilila gala gawele kumwando kwa heni. 14 Lelo ndangubilima leka fiche kuli kuduma, leka mbochele yila ndolendole ya ukomu wa mazuwa gose, ndolendole ayo ndo nyhemo ya Nguluwi ya kuluta kilanga kwa nzila ya kilumba na Yesu Kilistu.

15 Hetwe tweng'ha tuwele natukangala kuli makundo twanguganigwa tijese mbuli ayi. Ila wone wamwe wa hemwe wangijesa vinji, lelo Nguluwi kowagubulilani mbuli ayo. 16 Hamwe na ago geng'ha, tulutilile kumwando kuli nzila yiyo iwele natuiwinza mbaka kuli mhela awu.

17 Wang'holozangu, muwinze vyondilingudita, milanguse kwa wala walingikala goya kota vyotuwalonjele. 18 Nandiwalonjela mbuli ayi mala nyinji na sambi ndanguwila kahi kwa mahozi, hana wanhu wenji wangikala kota wang'honyo wa usenga wa kubagama kwa Yesu Kilistu hala mumsalaba. 19 Kuduma kwa hewo ndo kuwifyigwa, wangukola mijito leka kunojeza ng'huli za hewo, ndo kota mlungu wa hewo, wangidaya kuwala mbuli za hewo za soni na kijesa mbuli za isi ayi hela. 20 Ila hetwe twa wenyeng'haye wa kilanga, twangumbeteza ng'hatu mlohozi wa hetwe Mkulu Yesu Kilistu yoye kulawa ako. 21 Heye kogalamla ng'huli za hetwe ziwele ng'hochele na kuzidita ziwhane na lukuli lwa heye luwele na ukulu ng'hatu kwa ludali lulula lulingumdita yaviwiche vinhu vyeng'ha hali ulongozi wa heye.