1 Ahyo, wang'holozangu wondilinguwagana, wondilingugana ng'hatu kuwona, hemwe muwele usangalalo wa heni na chipembelo cha kusumya kwa heni, vyomlinguganigwa kwima nzinzili kuli kilumba na Mkulu.

2 Ndanguwadedeza Euwodia na Suntike, mikale kwa kihulichiza kota mwalukolo kuli kilumba na Mkulu. 3 Nagwe mkola mijito myangu yondilingitumbila, ndangukugana uwatanze wadala awo, kwa vila wangikangaza kuli kukola mijito ja kweneza Mbuli Inojile hamwe na heni, hamwe na Kelemensi na wakola mijito wayangu weng'ha, wawele matagwa ga hewo gandichigwa kuli chitabu cha ukomu.

4 Lelo msangalale ng'hatu kuli kilumba kwa hemwe na Mkulu. Ndangulonga kahi, msangalale! 5 Uliholile wa hemwe uzeleche kwa wanhu weng'ha. Mkulu ka habehi kuya. 6 Mleche kuwa na lunhwinhwi kwa chinhu choneche chila, ila kwa chila mbuli mumlande Nguluwi kwa chiwalo cha vinhu vyomlingugana, mumlande kwa kulonga malumbo Nguluwi. 7 Na ako kikala goya kulingulawa kwa Nguluwi kuwele kukulu kusinda nyhala za wanhu, kokwamila goya nhumbula za hemwe na nyhala za hemwe kuli kilumba na Yesu Kilistu. 8 Hamba wang'holozangu, mibatilile mbuli zeng'ha za kukomya, goneche galingutogoligwa na galingukundigwa na Nguluwi na goneche gawele gelile na ga kunojeza na gatanganiche. 9 Mgadite gala gomilanguse na kubochela kulawa kwa heni, mbuli zomuhuliche na kuzona kulawa kwa heni. Naye Nguluwi yalingutudita tikale goya, kowa hamwe na hemwe.

10 Kuli kilumba kwa heni na Mkulu nasangalala ng'hatu kona kota mwangung'humbuchila. Kukomya, mwangulutilila kung'humbuchila mazuwa gose, ila hampatile honhu ha kulajila mbuli ayo. 11 Silingulonga sambi kwa vila ndangugana chinhu kwa vila nandilangusa kiguta na vinhu vyondilinavyo. 12 Ndanguvizela kikala na vinhu vinji ama kuwa hela vinhu. Nandilangusa mbuli zeng'ha, ndiwe na nzala ama kiguta, kupegwa vinji ama kuwa na vido. 13 Ndoweza kudita chila mbuli kwa vila Kilistu kangunipa ludali.

14 Ila hemwe namdita goya kwa kunhanza kuli magazo ga heni. 15 Hemwe Wafilipi mwanguvizela kota mwaluko wa kudamla Mbuli Inojile, lombele ndikuka Makedoniya, hemwe ndo namwali chilundo cha wanhu walingumkunda Kilistu chiwele namnhanza, hemwe yeka ndo muwele hamwe na heni kuli kubochela vinhu na kuwatanza wanji. 16 Aho vyombele ndigana kutanzwa kula Tesalonike namingalila utanzi, kahi haiwele mala imwe hela. 17 Haiwele hela kota ndangugana kubochela ndolendole, chondilingugana monjezelwe kuli gala geng'ha ganojile gomditile. 18 Lelo nambochela vinhu vyeng'ha vyomhele, kahi ndo vinji ng'hatu kusinda vyonganile. Ndina chila chinhu kwa vila sambi Epafulodito nakengalila ndolendole za hemwe. Ndolendole azo ndo kota nhambiko ilingununyhilila goya, nhambiko ilingukundigwa na kumnojeza Nguluwi. 19 Lelo Nguluwi wa heni, kwa ukulu wa lufufu lwa heye kwa kukolela Yesu Kilistu, kowapa hemwe vinhu vyeng'ha vyomlingugana. 20 Ukulu uwe kwa Nguluwi wa hetwe na Mhaza wa hetwe, mazuwa gose. Ena.

21 Ndanguwalamsa wanhu wa Nguluwi weng'ha walingumkunda Yesu Kilistu. Wang'holozangu wawele hano hamwe na heni wanguwalamsa. 22 Wanhu wa Nguluwi walingikala hano, wala wawele kuli ng'handa ya mndewa wa Loma, wanguwalamsa.

23 Ndangulanda isungu lya Mkulu wa hetwe Yesu Kilistu liwe hamwe na hemwe.