1 Heni Paoli, mtumigwa wa Yesu Kilistu kota Nguluwi vyoyaganile, hamwe na mng'holozangu Timoteyi, 2 twanguwandichila hemwe wanhu wa Nguluwi wa ako Kolosai, wang'holozetu mlingukundigwa kuli kilumba na Yesu Kilistu. Twangulanda isungu na kikala goya viwe hamwe na hemwe kulawila kwa Mhaza wa hetwe.

3 Mazuwa gose twangulonga malumbo kwa Nguluwi, Mhaza wa Mkulu wa hetwe Yesu Kilistu, mhela hotuwalandila, 4 kwa vila natuhulika mbuli ya makundo ga hemwe kuli Kilistu Yesu na kwa mbuli ya igano lya hemwe kwa wanhu wa Nguluwi. 5 Makundo ga hemwe na igano lya hemwe vina kitumbila komuwichilwe kilanga. Kwa vila namhulika kuwala ako kitumbila hala hamwande mhela lomdamlilwe usenga wa kukomya uwele ndo Mbuli Inojile. 6 Ayi Mbuli Inojile vyoifichile kwa hemwe, naiwadita wanhu wadite ganojile na kwenela muisi yeng'ha kota vila vyoyaditile kwa hemwe kulawa zuwa lila lomhuliche mbuli ya isungu lya Nguluwi na kuizela vila vyoiwele ya kukomya. 7 Namilangusa isungu lya Nguluwi kulawa kwa Epafula, mtanzi muyetu tulingumgana, yawele ndo mkolamijito wakukundigwa kwa Kilistu kwa chiwalo cha hetwe. 8 Heye naye, nakatigalila mbuli za igano lyenu lyompegwe na Muhe wa Nguluwi. 9 Kwa chiwalo acho, mazuwa gose natwali tuwalanda kulawa mhela lotuhuliche mbuli ya hemwe. Twangumlanda Nguluwi yawadite hemwe mvizele goya gala goyalingugana, hamwe na nyhala zeng'ha na uwanzi wa Muhe wa Nguluwi. 10 Aho moweza kikala kota vyoyalingugana Mkulu na kudita galingumnojeza mazuwa gose. Kwa nzila ayo, moweza kudita mbuli zilivinji zinojile, namwe molutilila kukula kuli kumzela Nguluwi. 11 Nguluwi yawape hemwe ludali kwa ludali lwa ukulu wa heye leka muweze kubeteza na kwimilila chila chinhu kwa usangalalo, 12 na kulonga malumbo kwa Mhaza, yawaditile hemwe mkundigwe kubochela mbuli zila ziwele nakawawichila wanhu wa heye kuli undewa wa lumuli. 13 Nguluwi nakatulohola kuli ludali lwa jiza, na kutwinjiza kuli undewa wa Mwanage yamganile. 14 Kwa heye twangugomboligwa, kwa vila twangusilwa gehile ga hetwe.

15 Kilistu kangiwhana na Nguluwi, halingoneka,

heye nayali baha kung'hali vinhu vyeng'ha kulumbigwa.

16 Kwa vila kwa heye vinhu vyeng'ha navilumbigwa,

chila chinhu muisi na kilanga,

vinhu vilingoneka na havilingoneka,

wone iwe wandewa, vilongozi, wakulu na wawele na mong'ho.

Vyeng'ha navilumbigwa kwa kukolela heye na kwa chiwalo cha heye.

17 Heye nayalibaha kung'hali lumbigwa kwa vinhu vyeng'ha,

kwa kilumba na Kilistu, vinhu vyeng'ha navilutilila kuwa kuli honhu hake.

18 Heye ndo mutwi wa lukuli, lukuli ndo chilundo cha wanhu walingumkunda Kilistu.

Heye ndo mwaluko wa ukomu,

mlelwa wa mwaluko kuzilipuligwa,

Leka yawe wa mwaluko kuli vinhu vyeng'ha.

19 Kwa vila Nguluwi nakagana Unguluwi wa heye woneche mgati mwa Kilistu.

20 Kwa nzila ya Mwanage, Nguluwi nakehanyisa heye na vinhu vyeng'ha,

na kwa danda ya mwanage ibohoche mumsalaba, nakadita kikala goya,

na vinhu vyeng'ha muisi na kilanga.

21 Aho hamwande hemwe namwali kutali na Nguluwi na namwali wang'honyo wa heye kwa majesa ga hemwe na madito ga hemwe gehile. 22 Ila sambi, Nguluwi nakawahanyisa hemwe kwa kukolela Mwanage yawele nayali munhu na kubagama, leka yawawiche hemwe kumwando kwa heye, namuwa wanhu wa Nguluwi, mlihela nongwa ne kulonjigwa vibi. 23 Mwanguganigwa, ila kulutilila na kibatilila nzila yiyila kuli makundo, mleche kukunda kutigaswa leka mlawe kuli kitumbila kula kompegwe mhela womhuliche Mbuli Inojile. Heni Paoli nandiwa chitumagwa wa ayo Mbuli Inojile iwele naidamligwa kwa chila munhu muisi.

24 Sambi ndangusechelela kugazigwa kwa chiwalo cha hemwe, kwa vila kwa kugazigwa aku aha muisi, ndangutanza kwenela kwa chila chipunguche kuli kugazigwa kwa Kilistu kwa chiwalo cha lukuli lwake, mina ndo chilundo cha wanhu walingumkunda Kilistu. 25 Nani nanditigwa na Nguluwi ndiwe chitumagwa wa chilundo cha wanhu walingumkunda Kilistu. Mijito ajo ndo kudamla ulonzi wa Nguluwi uwele nauzeleka goya. 26 Usenga awo wanhu nawavisigwa waleche kuuzela, kulawila lulelo lwa katali, ila sambi nakawalajila wanhu wa heye. 27 Nguluwi nakagana kuwazelesa awo, vila uviso vyouwele mkulu na ukulu vyowenele kwa wanhu wa isi zinji, nayo ndo ayi, Kilistu ka mgati mwa hemwe naye ndo yalingutugalila kitumbila kota tochihanza kuli ukulu wa Nguluwi. 28 Kwa mbuli ayo twangumdamla Kilistu kwa wanhu weng'ha, twanguwakanya na kuwalangusa weng'ha kwa luhala lweng'ha, leka tuweze kumigala chila yumwe yawele yakangale kumwando kwa Nguluwi kuli kilumba na Kilistu. 29 Kwa mbuli ayo heni ndangukola mijito na nandikangaza kwa ludali lukulu lwa Kilistu lulingukola mijito mgati mwa heni.