1 Namwe wakulu, muwaditile ganojile na hachi wapogozi wa hemwe, kuno mkumbuchila kota mna Mkulu kilanga.

2 Mleche kuleka kumlanda Nguluwi, homlanda muwe milolela, mlonje malumbo kwa Nguluwi. 3 Hihyo du mlande kwa chiwalo cha hetwe kahi leka Nguluwi yatupe mhumu ya kudamla usenga wa mbuli zivisigwe za Kilistu. Kwa chiwalo cha mbuli ayo heni sambi nda mchinweng'ho. 4 Lelo mlande kwa chiwalo cha heni leka mbeze kudamla hazelu mbuli ayo kota vyoilinguganigwa.

5 Muwe na luhala kuli kikala kwa hemwe hamwe na wanhu wohambe wamkunde Kilistu, muutumiye goya mhela womlinawo. 6 Mazuwa gose, kulonga kwa hemwe kuwe kunojile kulinguwatanza wanhu, kahi mwanguganigwa kuvizela vila vyomwidichila chila munhu.

7 Mng'holozetu Tukiko yotulingumgana ng'hatu, mkola mijito wa kukundigwa na chitumagwa muyetu, tulingukola naye mijito ja Mkulu, kowalonjela mbuli za heni zeng'ha. 8 Ndo mina ndangumlajiza heye kwa hemwe, leka yawakangaze nhumbula hemwe kwa kuwalonjela mbuli za hetwe. 9 Kanguya hamwe na Onesimo, mng'holozetu tumganile na wakukundigwa, ayo ndo miyenu. Wowalonjela mbuli za vinhu vyeng'ha vilingukoleka hano.

10 Alistako, yawele mchinweng'ho hamwe na heni, kanguwalamsa, kahi Malichi, binamu wa Balinaba kanguwalamsa, yawele namlonjelwa mbuli za heye, wone yoye mumbochele. 11 Naye Yoshuwa yalinguchemigwa Yusto, kanguwalamsa. Hali wala Wayahudi wawele nawabochela makundo, awa hela waliyeng'ha ndo wakola mijito wayangu kwa mbuli ya Undewa wa Nguluwi, nawo nawawa na utanzi ukulu kwa heni. 12 Epafula, yawele yumwe wa hemwe na chitumagwa wa Kilistu Yesu, kanguwalamsa. Mazuwa gose kangulanda kwa chiwalo cha hemwe ne kutoka leka mwime goya, mikangaze na kwima nzinzili kwa mbuli yeng'ha yalingugana Nguluwi. 13 Ndoweza kuwa mlolezi kota kangudita mijito jinojile lukami kwa mbuli ya hemwe na kwa mbuli ya wanhu wa Laudikeya na Hielapoli. 14 Dema na Lukasi munhu wa hetwe yotumganile yalingujizela goya mikwandi, wanguwalamsa.

15 Muwalamse wang'holozetu wa Laudikeya kwa chiwalo cha hetwe. Mumlamse lumbulyangu Nimfa hamwe na chilundo cha wanhu walingumkunda Kilistu chilinguting'hana hakaye hake. 16 Lomsinda kusoma baluwa ayi, mikangaze muwape wayenu wa Laudikeya kuli chilundo cha wanhu walingumkunda Kilistu, na yila baluwa iwele nandiwandichila wanhu wa Laudikeya, wawape hemwe msome. 17 Mumlonjele Alikipo yakole goya jila mijito joyapegwe na Mkulu. 18 Ndangwandika aga kwa moko wa heni, ulamso kulawa kwa heni Paoli. Mkumbuchile kota nda mchinweng'ho, kunoga kwa Nguluwi kuwe hamwe na hemwe.