1 Heni Paoli hamwe na Silivani na Timoteyi, twanguwandichila hemwe chilundo cha wanhu walingumkunda Kilistu ako Tesalonike, muwele ndo wanhu wa heye Nguluwi Mhaza na wa Mkulu Yesu Kilistu. Twanguwaganila kunoga kwa Nguluwi na kikala goya.

2 Twangulonga malumbo kwa Nguluwi mazuwa gose kwa chiwalo cha hemwe weng'ha na kuwakumbuchila mazuwa gose kuli kulanda kwa hetwe. 3 Hatulinguleka kuwakumbuchila hali Nguluwi Mhaza wa hetwe, vila vyomlingulajila makundo ga hemwe kwa madito, vila igano lya hemwe vyolilinguwadita mkole mijito kwa kikangaza na vila kitumbila kwa hemwe kuli Mkulu wa hetwe Yesu Kilistu vyoluwele nzinzili. 4 Wang'holozangu, natuvizela kota Nguluwi kanguwagana na kuwahagula muwe wanhu wa heye, 5 Kwa vila mhela wotudamle yila Mbuli Inojile na haiwele kwa mlomo hela, ila kahi kwa mong'ho na kwa Muhe Yelile, tuwele tuvizelele ng'hatu kota usenga awo nawali wa kukomya. Namvizela vila vyotikale hamwe na hemwe, natikala kwa kuwatanza hemwe. 6 Hemwe mwangutuwinza kota vyotulingudita hetwe, kahi vyoyalingudita Mkulu. Hanga namgazigwa ng'hatu, namuubochela usenga awo kwa usangalalo ulingulawa kwa Muhe Yelile. 7 Lelo hemwe mwangudita ganojile mbaka wanhu wamkundile Kilistu wa Makedoniya na Akaya wanguwawinza hemwe. 8 Kwa vila kikangaza kwa hemwe usenga wa Mkulu nauhulikwa haiwele ako Makedoniya na Akaya hela, ila makundo ga hemwe kwa Nguluwi nagenela kweng'ha. Kahi hambe tugane konjeza choneche kwa alyo, 9 kwa vila wanhu awo wangusima vila vyomtubochele hala hotuwajendele, vila navyomlechile kufugamila jimalukolo na kumgalamchila na kumkolela mijito Nguluwi yalingikala na wa kukomya. 10 Kahi mwangutulonjela kota mwangumbeteza Mwanage kulawa kilanga, yawele ndo Yesu, yawele nakazilipuligwa na Nguluwi na yawele nakatulohola kuli kuzudila kwa Nguluwi kulinguya.