1 Wang'holozangu, hemwe ndo mwanguvizela kota kuwajendela hemwe kwa hela chinhu. 2 Mwanguvizela kota vyotugazigwe na kulijigwa kula Filipi lotung'hali fika kwa hemwe Tesalonike. Hanga nakwali na kitwanza kwinji, Nguluwi wa hetwe nakatudita tuleche kudumba kuwadamlila Mbuli Inojile. 3 Mbuli yotulinguikangaza kwa hemwe haiwele mbuli ilingitumbila udesi ama majesa gehile na hatulingugana kumhada munhu yoneche. 4 Ila, mazuwa gose hetwe twangulonga vila Nguluwi vyoyalingugana kwa vila nakatona kota toweza kudita ahyo na nakatupa mong'ho wa kuidamla ayi Mbuli Inojile. Hatulingugana kuwanojeza wanhu ne hado, ila twangugana kumnojeza Nguluwi yawele yalinguzizela nhumbula za hetwe vyozili mbaka mgati. 5 Nguluwi ndo mlolezi, kota vyomvizelele, hetwe hatulonjile kwa kuwadedeza leka kuvisa maya ga hetwe gehile ga kugana kupegwa lufufu kwa uviso, 6 Hatupalile kutogoligwa na wanhu, hanji kulawa kwa hemwe ama kulawa kwa munhu yoneche. 7 Hetwe tuwele watumigwa wa Kilistu, twahajezile kulanda vinhu vinji kwa hemwe, ila hetwe twa waliholile hali hemwe kota vyoyawele mamo yalinguwalolela wanage. 8 Natuwagana hemwe ng'hatu, natona ndo inoga kuwegalila Mbuli Inojile yotupegwe na Nguluwi, haiwele ahyo hela, ila kahi na ukomu wa hetwe. Kwa vila hemwe ndo wanhu wotulinguwagana ng'hatu.

9 Wang'holozetu, mwangukumbuchila vila vyotukolile mijito na kitunya. Hala hotuwadamlile Mbuli Inojile ya Nguluwi, natukola mijito nemisi na nechilo leka tuleche kumha munhu yoneche mijito ja kutulolela. 10 Hemwe mwanguweza kuwa walolezi, na Nguluwi kahi ka mlolezi, kota madito ga hetwe hali hemwe mlingumkunda Kilistu nagali ganojile, galingumnojeza Nguluwi na galihela nongwa. 11 Namvizela kota hetwe natumditila chila yumwe wa hemwe kota vila mhaza vyoyalinguwaditila wana wa heye. 12 Hetwe natuwakanya na tuwakangaza nhumbula na kuwadedeza ng'hatu, leka mikale kota vyoyalingugana Nguluwi yalinguwachema leka muwe hamwe kuli undewa na ukulu wa heye.

13 Kahi twanayo mbuli yinji ya kulonga malumbo kwa Nguluwi, vyotuwagalile usenga wa Nguluwi, hemwe namuuhulika na namuubochela. Haiwele kota vila usenga wa munhu, ila kota usenga wa Nguluwi, ndangukomya ndo vyouwele. Kwa vila ulonzi wa Nguluwi ndo ulingukola mijito chila zuwa mgati mwa hemwe mlingukunda. 14 Wang'holozangu, hemwe namting'hana na mbuli zizila ziwele nawating'hana nazo wanhu wa Nguluwi kula Yudeya na vilundo vya wanhu walingumkunda Yesu Kilistu. Hemwe na namgazigwa na wayenu kota vila hewo vyowagazigwe na Wayahudi wayawo, 15 wawele nawamkopola Mkulu Yesu na waloli na nawatugaza na hetwe natwe. Wanhu awo wangumzudiza Nguluwi, kahi ndo wang'honyo wa chila munhu! 16 Mbaka nawajeza kutulemeza kuwadamlila wanhu wa isi zinji usenga uwele wowagalila ulohozi, ahyo ndo vyowamemezwe gehile gowaditile mazuwa gose. Ila sambi kuzudila kwa Nguluwi kuwagwila.

17 Wang'holozangu, kileka kwa hemwe na hetwe nakwali kwa mhela udo hela, kahi kileka ako nakwali kwa lukuli hela na haiwele chimuhe. Mhela udo hamba twangugana kiwona na hemwe kahi. 18 Ahyo, natugana kuwajendela kahi. Nani Paoli, nanjeza kuya kwa hemwe mala nyinji ila Limazoga nalitudita ndemwele kuya.

19 Ndaze, hotukwima hali Mkulu Yesu mhela hoyokuya, chipembelo cha kulajila kusumya kwa hetwe chowa choni? Yowa ndo mwemwe, muwele ndo utumbilo wa hetwe na usangalalo wa hetwe. 20 Ena, hemwe ndo ukulu na usangalalo wa hetwe!