1 Ahyo, wang'holozangu, namilangusa kulawa kwa hetwe vila vyomlinguganigwa kikala leka kumnojeza Nguluwi. Kukomya, namwali mchikala ahyo. Sambi twanguwalanda na kuwalonjela kwa itagwa lya Mkulu Yesu mdite ganojile mzidi wa ago. 2 Kwa vila namvizela gala malanguso gotuwapele, natuwapa kwa ludali lwa Mkulu Yesu. 3 Nguluwi kanguwagana hemwe muwe welile na muwe kutali ng'hatu na mbuli za ung'hondwa. 4 Chila yumwe wa hemwe, kanguganigwa kuvizela kikala goya na mdala wa heye kuli welile na kuhulichiza, 5 haiwele kwa maya gehile kota wanhu wanji wohambe wamzele Nguluwi. 6 Lelo wang'holozangu, munhu yoneche yaleche kumditila vibi ama kumhada myage kwa mbuli ayi. Kwa vila natuwalonjela ago na kuwakanya kota Mkulu kowagaza wala walingudita mbuli azo. 7 Nguluwi hatuchemile leka tikale kuli wavu, ila tikale kota wanhu welile. 8 Ahyo lelo, yalingugabeza malanguso ago halingumbeza munhu, ila kangumbeza Nguluwi yuye yalinguwapa Muhe Yelile.

9 Haduhu mbuli ya kuwandichila chiwalo cha kuwagana wang'holozenu walingumkunda Kilistu. Mwemwe baho namlangusigwa na Nguluwi vila vyomlinguganigwa kigana. 10 Namwali muwaditila ahyo wang'holozenu weng'ha chila honhu kuli Makedoniya. Lelo wang'holozangu, twanguwalanda kota mdite ganojile ng'hatu mzidi wa ago. 11 Mikangaze kikala goya ng'hatu ne kubilima aku na aku, chila yumwe yetunye kwa chiwalo cha mbuli za heye yuye na yakole mijito kwa moko ga heye yuye kota vyotuwalajize hala hamwande. 12 Kwa mbuli ayo, mopegwa lutogo kulawa kwa wala wohambe wamkunde Kilistu na hamuwa na mbuli ya kugana kitumbila wanji kwa gala gomlingugana.

13 Wang'holozangu, twangugana mvizele kukomya kwa chiwalo cha wala wabagame, leka mleche kuwa na masinzo kota wanhu wanji walihela chinhu cha kitumbila. 14 Hetwe twangukunda kota Yesu nakabagama na nakazilipuka, ahyo hetwe twangukunda kota Nguluwi kowegala hamwe na Yesu hoyohiluka, wala weng'ha wabagame wawele womkunda.

15 Ali lotulinguwalonjela ndo ulonzi wa Mkulu, hetwe tulingikala sambi, lotowa tusigale wakomu mhela Mkulu hoyokuya, ndangukomya hatuwalongola wala wawele wabagame. 16 Kwa vila lolavigwa ilajizo, lizi lya mhilisi mkulu na lizi lya mhalamhanda ya Nguluwi, naye Mkulu kodulika hasi kulawa kilanga. Ndo wala wabagame walingumkunda Kilistu wozilipuligwa tandi. 17 Hamba hetwe tuwele wakomu, tusigale, mhela awo tokungajizwa hamwe na hewo kuli ng'hungugu leka kumting'aniza Mkulu kuli ng'hungugu. Ahyo towa hamwe ng'hatu na Mkulu. 18 Lelo migane na mikangaze nhumbula kwa ulonzi awu.