1 Wang'holozangu, silinguganigwa kuwandichila kuwala mbuli azi hozilawila. 2 Kwa vila hemwe mwanguvizela zuwa lya Mkulu hoyohiluka baho du kota mhizi vyoyalinguya nechilo. 3 Wanhu vyowowa wolonga, "Chila chinhu nachikala goya." Ndo kuwifya vyokuwagwilila baho du! Mbuli azo zolawila baho du kota usungu ulingumuyila mdala yalinguponda mwana, wala wanhu hawoweza kulibilima zuwa alyo. 4 Ila hemwe, wang'holozangu hamuwele kuli jiza na zuwa alyo hailinguganigwa kuya kwa hemwe baho du kota vila mhizi vyoyalinguya. 5 Hemwe mweng'ha mwa wanhu mlingikala kuli lumuli, wanhu wa nemisi. Hetwe hatuwele wanhu wa nechilo ne wala wa kuli jiza. 6 Lelo tuleche kuwasa kota wanji, twanguganigwa kikala meho na kuwa na chasi. 7 Walinguwasa, wanguwasa nechilo na walingugala, wangugala nechilo. 8 Ila hetwe twa wanhu wa nemisi na twanguganigwa tilongoze twetwe baha kwa kuwa na chasi. Twanguganigwa kuvala makundo na igano kota nguwo ya kigubika mmambaga na kitumbila kwa hetwe kwa ulohozi kota kofiya ya chuma. 9 Kwa vila Nguluwi hatuhagule leka tusumigwe na kuzudila kwa heye, ila tupegwe ulohozi kukolela Mkulu wa hetwe Yesu Kilistu, 10 yula yawele nakabagama kwa chiwalo cha hetwe, leka tikale hamwe na heye, tuwele wakomu ama tubagame hala hoyohiluka. 11 Ahyo mikangaze nhumbula mwemwe baho na kitanza kota vyomlingudita sambi.

12 Wang'holozangu, twanguwalanda muwahulichize vilongozi wa hemwe, wala walinguwalongoza na kuwakanya kuli ukomu kwa kilumba na Mkulu. 13 Muwe mtanganiche ng'hatu na kuwalajila igano kwa chiwalo cha mijito jowalingukola. Muwe na kikala goya hali hemwe.

14 Wang'holozangu, twanguwalanda muwakanye wagata, muwakangaze nhumbula wazunwa na muwatanze ng'hochele na muwemilile wanhu weng'ha. 15 Mlolele, munhu yoneche yaleche kumhilusila myage chibida, ila majesa ga hemwe gawe kiditila ganojile na kuwaditila wanhu weng'ha ganojile.

16 Msangalale mazuwa gose, 17 mumlande Nguluwi chila zuwa 18 na tulonje malumbo kuli chila mbuli. Ago ndo galinguganigwa na Nguluwi kuli ukomu wa hemwe kuli kilumba na Kilistu Yesu. 19 Mleche kulemeza mijito ya Muhe Yelile, 20 mleche kubeza usenga ulingulawa kwa Nguluwi. 21 Ila mjeze chila chinhu na mgakunde gala gawele ganojile 22 na mikale kutali na chila chinhu chihile.

23 Heye Nguluwi yalingutudita tikale goya, yawahovuje ng'hatu kwa chila nzila na kwamila ukomu wa hemwe, uwele ndo muhe na nhumbula na lukuli lwa hemwe, leka moneche mlihela nongwa yoneche mhela wa kuya kwa heye Mkulu wa hetwe Yesu Kilistu. 24 Heye yalinguwachema hemwe kodita ahyo, kwa vila ndo wakukundigwa.

25 Wang'holozangu, mtulandile kwa Nguluwi na hetwe kahi.

26 Muwalamse wang'holozenu weng'ha kwa igano na kwa kiyamba moko.

27 Ndanguwalajiza kwa itagwa lya Mkulu, muwasomele baluwa ayi wanhu weng'ha walingumkunda Kilistu.

28 Isungu lya Mkulu wa hetwe Yesu Kilistu liwe na hemwe.