1 Heni Paoli hamwe na Silivani na Timoteyi, twanguwandichila hemwe chilundo cha wanhu walingumkunda Kilistu ako Tesalonike, wawele ndo wanhu wa Nguluwi Mhaza wa hetwe na wa Mkulu Yesu Kilistu.

2 Twangulanda kwa Nguluwi mhaza wa hetwe na kwa Mkulu Yesu Kilistu kwa chiwalo cha hemwe, yawape isungu lya heye na kikala goya.

3 Wang'holozetu, twanguganigwa kulonga malumbo kwa Nguluwi mazuwa gose kwa chiwalo cha hemwe. Igana kwa hetwe kudita ahyo kwa vila makundo ga hemwe gangukula lukami na kigana hali hemwe kwangonjezeka lukami. 4 Ndo chiwalo twangidaya kwa chiwalo cha hemwe hali vilundo vya wanhu walingumkunda Kilistu. Twangidaya kwa vila mwangulutilila kuli makundo na kwimilila kuli nongwa na magazo geng'ha gomlingupegwa.

5 Ago geng'ha gangulajila kota utaguso wa Nguluwi ndo wa hachi mazuwa gose, nawo wangudita hemwe mkundigwe kuli undewa wa heye Nguluwi uwele hemwe mwangigaya kwa chiwalo acho. 6 Nguluwi kodita mbuli inojile, kowahilulila magazo wala walinguwagaza hemwe, 7 na kuwadita hemwe mlingugazigwa mwesele hamwe natwe. Kodita mbuli ayo mhela Mkulu Yesu hoyolawila kulawa kilanga hamwe na wahilisi wa heye wawele na ludali. 8 Na kuwagaza kwa ilapi lya chiluli wala walingumlema Nguluwi na kahi wala wohambe waikunde Mbuli Inojile ya Mkulu wa hetwe Yesu. 9 Utaguso wa hewo wowa ndo kudumigwa mazuwa gose ne kuduma na kuwichigwa kutali na ukulu wa ludali lwa heye. 10 Zuwa alyo hoyokuya kupegwa lutogo kulawa kwa wanhu wa heye na kutanganika kulawa kwa welile weng'ha walingukunda. Namwe mowa hali hewo, kwa vila namuukunda wula usenga woyawagalile.

11 Ndo chiwalo twangulanda kwa chiwalo cha hemwe mazuwa gose. Twangumlanda Nguluwi wa hetwe yawadite mikale vila vyoyawachemile mikale. Twangumlanda, kwa mong'ho wake, yeneze geng'ha ganojile gomlingugana kudita, kahi yeneze mijito ja hemwe ja makundo. 12 Twangulanda ahyo leka itagwa lya Mkulu wa hetwe Yesu lipegwe ukulu kulawa kwa hemwe, namwe mopegwa ukulu kulawa kwa heye kwa isungu lya Nguluwi wa hetwe na lya Mkulu Yesu Kilistu.