1 Lelo wang'holozetu, kwa chiwalo cha kuya Mkulu wa hetwe Yesu Kilistu na kukungajizwa kwa hetwe hali heye, 2 twanguwalanda hemwe kota mleche kuwa na lunhwinhwi, kahi mleche kutinuka kwa mbuli ilingulonga kota zuwa lya Mkulu nalifika. Hanji, yangujesigwa mbuli ayo lyolawila kwa ulaguzi woneche, kudamla ama lyandiko ilingulonjigwa kota nalilawa kwa hetwe. 3 Mleche kukunda kuhadigwa na munhu yoneche kwa mbuli yoneche yila. Kwa vila zuwa ayo halikuya mbaka tandi zuwa lya wanhu kumbelenhuka Nguluwi kulawile na munhu yula yalinguchemigwa mwihe yoneche, yawele kuduma kwa heye ndo kubagamizwa ng'hatu. 4 Heye kovilema vinhu vyeng'ha viwele wanhu wanguvichema mlungu, ama chinhu walinguchifugamila naye kowa mchanya mwa chinhu acho, hanji kokwinjila na kikalisa mli Ng'handa ya Nguluwi yochidita kota heye yuye ndo Nguluwi.

5 Ndaze, hambe mkumbuchile kota nandiwalonjela aga geng'ha mhela wondiwele hamwe na hemwe? 6 Ila hana chinhu chilingumlemeza sambi, namwe mwanguchizela chinhu acho. Lelo munhu ayo mwihe kokoneka mhela wa heye uwichigwe. 7 Lelo munhu yula yalinguchemigwa mwihe na ludali lwake nakaluka kukola mijito sambi kwa uviso, ila hokoneka mbaka yula yawele ngumlemeza yosigwe. 8 Aho ndo munhu yula yalinguchemigwa mwihe hoyolawila, ila Mkulu Yesu hoyolawila komkopola kwa muhe wa mlomo wa heye na kumdumya kwa welile wa kuya kwa heye. 9 Ayo munhu yalinguchemigwa mwihe kokuya yawele na ludali lwa Limazoga na kudita vinduzanduza vya chila mbuli na ulajilo na kububuwaza kwa udesi, 10 na kudita uhadi kwa chila nzila kwa wala walingwajilila. Awo wokwajilila kwa vila hawakubochele na kukugana kula kukomya leka waloholigwe. 11 Kwa chiwalo acho, Nguluwi kawawika walongozwe na ludali lwa kuhadigwa na wakunde mbuli za udesi. 12 Ahyo wanhu weng'ha wohambe wakunde kukomya, ila wangusechelela gehile, wotagusigwa.

13 Twanguganigwa kumtogola Nguluwi mazuwa gose kwa chiwalo cha hemwe wang'holozetu, hemwe mlinguganigwa na Mkulu kwa vila Nguluwi nakawahagula kulawila mwaluko leka mloholigwe, kwa ludali lwa Muhe Yelile muwe wanhu wa heye welile kwa chiwalo cha hemwe kukunda ulonzi wa kukomya. 14 Nguluwi nakawachema kwa chiwalo cha mbuli ayi kukolela Mbuli Inojile iwele natuwadamlila, nakawachema leka namwe muwe na honhu kuli ukulu wa Mkulu wa hetwe Yesu Kilistu. 15 Lelo wang'holozangu, muwe nzinzili na kibatilila gala malanguso gotuwalanguse kwa kudamla kwa hetwe na gala gotuwandichile.

16 Twangumlanda Mkulu wa hetwe Yesu Kilistu yuye na Nguluwi Mhaza wa hetwe yawele yatuganile na yatupele isungu lya heye, nakatudita tukole mbuli zinojile na kutukangaza mazuwa gose ne kuduma na kutupa utumbilo wa kukomya, 17 yakangaze nhumbula za hemwe na kuwadita muwe na ludali kuli kudita na kulonga gawele ganojile.