1 Hamba, wang'holozetu, mlande kwa chiwalo cha hetwe leka usenga wa Mkulu ulutilile kwenela himahima na kubocheligwa goya kota vila vyouwele hali hemwe. 2 Mlande kahi leka Nguluwi yatulohole na wanhu wehile na wasowile isungu, kwa vila haiwele weng'ha walingukunda usenga awu.

3 Ila Mkulu ndo wakitumbila, heye kowadita mwime nzinzili na kuwamila goya na yula Mwihe. 4 Mkulu nakatugalila utumbilo kota mwangudita na molutilila kudita gala gotuwalonjele hemwe.

5 Mkulu yalongoze nhumbula za hemwe kuli kulizela igano lya Nguluwi na kuli kwimilila kotulingupegwa na Kilistu.

6 Wang'holozangu, twanguwalajiza kwa itagwa lya Mkulu wa hetwe Yesu Kilistu, mibagule na wanhu weng'ha wawele wagata na wohambe wawinze malanguso gotuwalanguse. 7 Hemwe baho namvizela kota mwanguganigwa kiwhana na hetwe. Hetwe lotwali na hemwe nahatuwele wagata, 8 hatudile chilyo kwa munhu yoneche ne kumha chinhu. Natukola mijito kwa kikangaza na magazo nemisi na nechilo leka tuleche kumha munhu yoneche itunyo hali hemwe, mijito ja kutulolela. 9 Twahalandile kutanzwa na hemwe, ila natudita ahyo kwa vila natugana mtuwinze kuli mbuli zeng'ha. 10 Lotuwele hamwe na hemwe natwali tuwalonjela, "Munhu yoneche yawele halingugana kukola mijito, yaleche kulya chilyo."

11 Twangulonga mbuli ayo kwa vila natuhulika kota wabaho wamwe wa hemwe wagata na hawalingudita choneche, ila wanguwa videlenya kwa mbuli za wanhu wanji. 12 Kwa itagwa lya Mkulu wa hetwe Yesu Kilistu twanguwalajiza hemwe na kuwakanya wanhu awo kota wekale vyoilinguganigwa na wakole mijito leka wawe na vinhu vya kuwatanza hewo wawo.

13 Ila hemwe wang'holozetu, mleche kutoka kudita ganojile. 14 Wone munhu yoneche hambe yahulichize usenga awu wotuwegalile lelo mumzele munhu ayo na mumuwiche hazelu munhu ayo leka yone soni. 15 Ila mleche kumona munhu ayo kota mng'honyo wa hemwe, ila mumlonje kota vila mng'holozenu.

16 Mkulu yuye yalingigala kikala goya, kowapa hemwe kikala goya mazuwa gose na kwa chila nzila. Mkulu yawe na hemwe mweng'ha.

17 Heni Paoli, ndanguwalamsa kwa kuwandichila baluwa ayi kwa moko wa nene baha na ahi ndo vyondilinguwika ulajilo kuli chila baluwa yondiwandichile.

18 Isungu lya mkulu wa hetwe Yesu Kilistu liwe hamwe na hemwe mweng'ha.