1 Heni, chitumagwa wa Kilistu Yesu kwa mzilo wa Nguluwi Mlohozi wa hetwe na Kilistu Yesu tulingitumbila, 2 ndangukwandichila hegwe Timoteyi mwanangu ng'hatu kuli makundo. Ndangulanda kwa chiwalo cha hegwe kwa Nguluwi Mhaza na Kilistu Yesu Mkulu wa hetwe yakupe utambichizo na isungu na kikala goya.

3 Ndangugana wikale ako Efeso, kota vyondikulandile londiwele ndiluta Makedoniya. Wakuko wanhu wamwe walingulangusa malanguso ga udesi. Muwalemeze wanhu awo. 4 Walonjele weleche zila ndano zowawele ngulonga na mbuli ziwele haduhu za lung'hongola lwa wasekulu, lulingigala ibamba, hazilinguwazenga wanhu kuli mijito ja Nguluwi leka jizeleche kwa makundo. 5 Chiwalo cha mzilo awu ndo kigala igano lilingulawa kuli nhumbula ilihela nongwa na kugana kudita ganojile na makundo ga kukomya. 6 Wanhu wanji nawahadigwa na kuhinduchila ndonga zohaziwele zitanganiche. 7 Wangugana wawe walangusa wa malajizo, ila hawalinguvizela ulonzi wa hewo wowalingulonga ama mbuli yowalinguikunda.

8 Natuvizela kota malajizo ndo ganoga, wone gokolelwa mijito kota vyoilinguganigwa. 9 Ila twanguvizela kota malajizo hagalinguwichigwa kwa chiwalo cha wanhu wanojile, ila kwa chiwalo cha wanhu wehile na wohambe wamkunde Nguluwi na wohambe wamfugamile Nguluwi na wawele na gehile na wala wohawamzelele Nguluwi na walinguwakopola wahaza wa hewo na wamamo wa hewo, ama wawele ngukopola. 10 Malajizo nagawichigwa kwa chiwalo cha wahozolomo na walinguwasa na walume wayawo na wawele nguwaguza wanhu na wadesi na wawele ngulavya ulolezi wa udesi ama walingudita choneche chiwele vinji na malanguso ga kukomya. 11 Kwa wanhu malanguso ago gangoneka kuli Mbuli Inojile ya ukulu wa Nguluwi na yalingubweda na iwele heni namhegwa ndiidamle.

12 Ndangulonga malumbo kwa Mkulu wa hetwe Yesu Kilistu yamhele mong'ho kwa chiwalo cha mijito ja heni. Ndangulonga malumbo kwa kumbona heni kota nhanganika, nakanyhagula leka ndiwe chitumagwa wa heye, 13 hanga aho katali heni nandimliga na kumgaza na kumbunza. Ila Nguluwi nakambonela isungu, kwa vila nandali hela makundo, ahyo, sivizelele chondilingudita. 14 Ila Mkulu wa hetwe nakamha isungu lya heye kwa winji, nakahma makundo na igano kuli kilumba na Kilistu Yesu. 15 Ulonzi awu ndo wa kukomya na kukundigwa, kahi wanguganigwa kukundigwa ng'hatu, Kilistu Yesu nakoya muisi kuwalohola wawele na gehile. Nani ndina gehile ng'hatu kusinda hewo weng'ha, 16 ila Nguluwi nakambonela isungu, leka Kilistu Yesu yalajile kwimilila kwa heye kweng'ha kwa heni mbele na gehile kusinda weng'ha, kota kiwhana kwa wala weng'ha wawele hamba womkunda na kubochela ukomu wa mazuwa gose. 17 Heye yawele Mndewa wa mazuwa gose, yawele hambe yabagame na hambe yoneche na yawele Nguluwi yaliyeng'ha, kwa heye viwe lutogo na ukulu mazuwa gose na mazuwa gose! Ena.

18 Mwanangu Timoteyi, ndangukulonjela mzilo awu kwa ulonzi wa uloli woulonjigwe katali kwa chiwalo cha hegwe. Uhole ulonzi awo uwe vinhu vya hegwe vya kitowela ngondo goya 19 na wibate makundo ga hegwe na kudita ganojile. Wanhu wanji hawahulichize kutanganika kwa hewo na ahyo nawagawifya makundo ga hewo. 20 Hali hewo ndo Humenayo na Alekizanda wawele nandiwegala kwa Limazoga, leka walanguswe waleche kumliga Nguluwi.