1 Ulonzi awu ndo wa kukomya, munhu yalingugana kuwa chilongozi wa chilundo cha wanhu walingumkunda Kilistu, ayo kangujigana mijito jinojile. 2 Lelo, chilongozi wa chilundo cha wanhu walingumkunda Kilistu, kanguganigwa yawe munhu yalihela nongwa yoneche, kanguganigwa yawe na mdala yumwe hela na yalingidima yuye na yalingikala goya na wanhu na yawele na luhala na yalingudawala goya na wanhu na yalinguweza kulangusa, 3 yaleche kuwa yalingugala ama yalingutowa wanhu, ila yawe yaliholile, yalingugana kikala goya na yaleche kuwa munhu wa kugana sendi, 4 kanguganigwa yawe munhu yalinguweza kulongoza goya ivyazi lya heye na yawadite wanage wasindamale kwa kuhulichiza wanhu weng'ha. 5 Kwa vila wone munhu hambe yaweze kulongoza goya ng'handa ya heye, koweza ndaze kuchilongoza chilundo cha wanhu walingumkunda Kilistu? 6 Munhu yalihela makundo halinguganigwa yawe chilongozi kuli wanhu wamkundile Kilistu, yaleche kidaya na kutagusigwa kota vila Limazoga vyolitagusigwe. 7 Kanguganigwa kahi yawe munhu yalinguhulichizwa na wanhu weng'ha wa Nguluwi, leka yaleche kugwa kuli idiwa lya Limazoga.

8 Hihyo du, watanzi kuli wanhu walingumkunda Kilistu wanguganigwa kahi wawe wanhu walinguhulichiza ng'hatu, waleche kuwa wadesi, waleche kuwa wanhu walingunwa ng'hatu divai ama wawele na maya ga sendi, 9 wanguganigwa webatilile ng'hatu kukomya kuwele mgati mwa makundo. 10 Wanguganigwa woneche kota wahela nongwa, hamba ndo wakundizwe kukola mijito ajo. 11 Hihyo du, wache wa hewo nawo wanguganigwa wawe na madito ganojile ng'hatu na walingutogoligwa na wanhu na waleche kuwa walinguheha wanhu, wawe walingidima na wawe wokundigwa kuli mbuli zeng'ha. 12 Mtanzi kanguganigwa yawe mlume wa mdala yumwe na yalingulongoza goya wanage na ng'handa ya heye. 13 Kwa vila walingudita mijito ja hewo ja utanzi goya, wanguwadita wanhu wanji wawahulichize na woweza kulonga ne kudumba kuli makundo ga hewo kuli Kilistu Yesu.

14 Londikwandichila baluwa ayi ndangitumbila kota ndokuya kukona hegwe kuli mhela awu wa sambi. 15 Ila wone ndokawila, baluwa ayi yokuzelesa ndaze vyotuting'hana kuli Nghanda ya Nguluwi, iwele ndo chilundo cha wanhu walingumkunda Kilistu, wawele ndo wanhu wa Nguluwi yawele mkomu na yawele ndo izengo na msisi wa kukomya. 16 Haduhuli majesa goneche gala kuli ukulu wa uviso wa kukunda kwa hetwe.

Nakoneka yewhanile na munhu,

Muhe Yelile nakamtawiza kota nakakundigwa hali nguluwi,

nakoneka na wahilisi wa kilanga.

Nakadamligwa hagati ha wanhu wa isi yeng'ha.

Nakakundigwa honeche hali isi,

nakaholigwa kilanga kwa Nguluwi.