1 Wapogozi weng'ha wangulapigwa kuwahulichiza wakulu wa hewo, leka kuleche kuwa na chiwalo cha wanhu kuliliga itagwa lya Nguluwi na malanguso ga hetwe. 2 Wapogozi ama wakulu wa hewo walingumkunda Kilistu, waleche kuwabeza kwa vila ndo wang'holozawo. Ila hewo wangulapigwa kuwafugamila goya ng'hatu, mina wala wakulu awo, walingubweda ng'hatu kwa madito ga wapogozi, kahi ndo wanhu walingumkunda Nguluwi walinguwagana.

Kwangulapigwa kulangusa na kudamla mbuli azi. 3 Munhu yoneche yalingulangusa malanguso ga udesi na yalingulema ulonzi wa kukomya wa Mkulu wa hetwe Yesu Kilistu na kikala kota vyoyalingugana Nguluwi, 4 ayo kamema kidaya na havizelele choneche. Ndo munhu wa kugana ibamba na ivuche muli ulonzi yeka, ayo yangwambuza maya na kilewa na maligo na majesa gehile 5 na ibamba lilihela kuduma kulawila kwa wanhu wawele na nyhala ziwifigwe, kahi wahela cha kukomya ng'hatu. Wangijesa kota kumditila Nguluwi ndo nzila ya kumigalila lufufu.

6 Ndangukomya, kumtogola Nguluwi, koweza kumdita munhu yawe na lufufu ng'hatu, wone kanguganigwa kukunda vinhu vyoyawele navyo. 7 Mina hatigale chinhu choneche aha muisi ne hatuhola chinhu choneche.

8 Ahyo lelo, wone tuwele na chilyo na nguwo, twanguganigwa kukundizwa navyo. 9 Ila wala walingugana kuwa na lufufu wangugwa kuli kujezigwa na kugwila kuli idiwa lya maya menji gehile ga chipoka na zakigala magazo, gawele kuwakwega mbaka kuli kuwifigwa na kubagama. 10 Mina kugana lukami sendi ndo kwaluka kwa wihe weng'ha. Wanhu wanji wangugana ng'hatu kiyipa sendi mbaka wangulubaluba kutali na makundo na nhumbula za hewo zimema masinzo menji.

11 Ila hegwe, munhu wa Nguluwi, wiyuse na mbuli azo. Wibatilile koneka yawele na isungu hali Nguluwi na kudita gala ganojile na makundo na igano na kubeteza na kunyenyetela. 12 Ubilime kota vyouweza kwa kikangaza kugasumya majezo kuli makundo, ukapegwe chonolo cha ukomu wa mazuwa gose louchemigwe na Nguluwi mhela loukundile gwegwe baho, ago makundo ga hegwe hali walolezi wenji. 13 Ndangukulajiza hali Nguluwi yalinguvipa vinhu vyeng'ha ukomu na hali Yesu Kilistu yalavile ulolezi na kulonga kukomya hali Pontio Pilato, 14 uhulichize ilajizo alyo na kudita kwa makundo mbaka zuwa lya kuhiluka kahi, Mkulu wa hetwe Yesu Kilistu. 15 Kuya kwa heye kahi koditikwa mhela utanganiche uwichigwe na Nguluwi yawele ngubweda na Chilongozi yaliyeng'ha, Mndewa wa wandewa na Mkulu wa wakulu. 16 Heye yaliyeka kangikala mazuwa gose kuli lumuli luwele hambe luhejelelwe na munhu. Kuduhu munhu yawezile kumona ama yoweza kumona. Kwa heye iwe lutogo na kulongoza kwa mazuwa gose! Ena.

17 Uwalajize wanhu wawele na lufufu kuli mbuli za isi ya sambi, waleche kidaya na waleche kuwika utumbilo wa hewo kuli lufufu lohaluwele lwa kitumbila, ila wetumbile Nguluwi, yawele wa kunyenyetela kangutigalila vinhu vyeng'ha vitusangalaze. 18 Uwalajize wadite madito ganojile, wawe na lufufu kuli madito ganojile na wawe wonyenyetela na wawe wemile nzinzili kuwapa kwa kunyenyetela wanhu wanji lufufu lwa hewo. 19 Kwa mbuli ayo, wawo wochiwichila ng'hano iwele ndo msisi wimile kwa mhela ulinguya. Aho woweza kiholela ukomu uwele ndo ukomu wa kukomya.

20 Gwa Timoteyi, uwiche goya geng'ha gala goupegwe. Wiyuse na ulonzi haulingumnojeza Nguluwi na ibamba lya chipoka kwa chila chowalingichema wanhu wanji, wanguchema "Uwanzi." 21 Mina wanhu wanji wedaya kota wana awo uwanzi na chilawile aho, wajiliza makundo. Ndanguwaganilani weng'ha Isungu lya Nguluwi!