1 Muhe Yelile kangulonga ne kuvisa kota mhela wa kuduma wanji wochibagula na makundo, wohulichiza muhe yalinguhada na kuwinza malanguso ga Limazoga. 2 Malanguso ago gangwenezwa na wanhu wahadi na walingudeta, ludali lwa hewo lwa kuhagula ganojile na gehile nalubagama kota vila nalulakazwa kwa chiluli cha chuma. 3 Wanhu awo wangulangusa kota ndo vibi kihola na wanguwalemeza wanhu kulya vilyo vimwenga. Ila Nguluwi nakavilumba vilyo avyo, leka wanhu walingumkunda na kuvizela kota wangukomya walye chila chinhu choyachilumbile kwa kulonga malumbo kwa Nguluwi. 4 Chila chinhu choyachiumbile Nguluwi ndo chinoga, haduhuli chilingulemigwa wone vibocheligwe kwa kulonga malumbo kwa Nguluwi, 5 kwa vila ulonzi wa Nguluwi na kulanda kwanguchidita chinhu acho chikundigwe kwa Nguluwi.

6 Wone kowapa malajizo aga wang'holozo, kowa chitumagwa unojile wa Yesu Kilistu, wone ulutilile kukula chimuhe kwa ulonzi wa makundo na malanguso ga kukomya gawele hegwe nakugawinza. 7 Ila uleche zila ndano zohaziwele za Nguluwi na za chipoka. Uwe uchikala kuli ukomu ulingumnojeza Nguluwi. 8 Kigololagolola vitomo vya lukuli kwangutanza lukami, ila kizoweza kikala kwa kumnojeza Nguluwi kwa chila chinhu ndo kunoga lukami, kwa vila kangutulonjela kuwala ukomu wa sambi na ukomu ulinguya hamba. 9 Ulonzi awo ndo wakukomya ng'hatu na wanguganigwa kukundigwa. 10 Hetwe twangikangaza na kukola mijito kwa vila kitumbila kwa hetwe ndo Nguluwi yawele mkomu na yawele ndo Mlohozi wa wanhu weng'ha, mzidi wala walingumkunda Kilistu.

11 Uwalanguse mbuli azo na uwalonjele wanhu wadite mbuli azo. 12 Uleche kukunda munhu yoneche yakubeze kwa vila hegwe ndo kwa msongolo, ila uwe wa kuwinzigwa na walingukunda. Kuli ulonzi wa hegwe na madito ga hegwe na igano na makundo na ukomu ulingumnojeza Nguluwi. 13 Mazuwa gose ulutilile kikangaza kuwasomela wanhu ne uviso Maandiko Matakatifu, kudamla na kulangusa mbaka hondikuya. 14 Uleche kubeza yila ndolendole ya chimuhe iwele mgati mwa hegwe, kwa kukolela usenga wa waloli hala nhing'hano ya wasekulu walingumkunda Kilistu lowakutambichize. 15 Wijese ng'hatu kwa mbuli azo zeng'ha na wikangaze kuli kugadita leka kwinuka kwa hegwe koneche na wanhu weng'ha. 16 Wilolele ng'hatu mbuli za hegwe na malanguso ga hegwe. Ulutilile kudita ago, kwa vila houdita ahyo, kochilohola gwegwe baho na kuwalohola wala walingukuhulichiza.