1 Mwaluko, ndanguwalonjela kota mumlande Nguluwi kwa gala gomlingugana na mlande kwa chiwalo cha wanhu weng'ha 2 na mlandile kwa chiwalo cha wandewa na weng'ha wawele mli ulongozi, leka tikale kuli ukomu uholile na kikala goya hamwe na kumdumba Nguluwi na kudita ganojile. 3 Mbuli ayi ndo inoga na yangukundigwa na Nguluwi yawele Mlohozi wa hetwe, 4 yalingugana wanhu weng'ha waloholigwe na kuvizela kukomya. 5 Kwa vila hana Nguluwi yumwe, kahi hana yalinguhanyisa yumwe hali Nguluwi na munhu, ayo ndo Yesu Kilistu, 6 yawele nakelavya yuye kuwagombola wanhu weng'ha. Awo nawali ulolezi kwa mhela utanganiche loufichile, kota Nguluwi kangugana kuwagombola wanhu wa heye. 7 Kwa chiwalo acho heni nandonjeligwa ndiwe msenga na mlangusa wa wanhu wa isi zinji, ndiuwikule usenga wa makundo na kukomya. Ndangulonga kukomya, hambe ndonje udesi!

8 Lelo, honeche homting'hana kulanda ndangugana walume walande, wanhu welavile ng'hatu walinguweza kwinula moko ga hewo howolanda kwa Nguluwi walihela ng'halazi ne ibamba. 9 Hihyo du, ndanguwagana wadala wagoloche na walinguhulichiza kuli kuvala mivalo jilingukundigwa hali wanhu, haiwele kwa kinoliga kwa kudalanga mnvili na kinoliga kwa zahabu na lulu ama nguwo zilinguguligwa kwa sendi nyinji, 10 ila kwa madito ganojile kota vyoilinguganigwa kwa wadala walingumfugamila Nguluwi. 11 Wadala wanguganigwa wanyamalile tulu na wawe wohulichiza mhela wa kilangusa. 12 Heni hambe ndimkundize mdala yamlanguse ama yawe na lizi kwa mlume, kanguganigwa yawe tulu. 13 Kwa vila Adamu nakalumbigwa mwaluko, hamba Eva. 14 Haiwele Adamu yahadigwe, ila mdala ndo yahadigwe, nakabeza malajizo ga Nguluwi na kudita gehile. 15 Ahyo, mdala koloholigwa kwa kuponda wana, wone yekale kuli makundo na igano na welile na madito ganojile na kuwa na chasi.