1 Uleche kumng'hanuchila sekulu, ila ulonje naye kota mhaza wa hegwe. Uwaditile wasongolo kota wang'holozo, 2 nawo papa uwaditile kota mamo wa hegwe na wahinza kota walumbuzo, wiyamile kuli kiyeliza kweng'ha.

3 Muwahulichize wadala wafililwe na walume wa hewo, walihela utanzi woneche. 4 Ila mdala yafililwe na mlume wa heye wone kana wana ama wazukulu, awo yanguganigwa kilangusa na kudita gala galinguwalapa kweneza kudita gala galingumnojeza Nguluwi kwa ivyazi lyaa hewo na kuwahilusila ganojile wa mamo wa hewo gowawaditile aho hamwande, kwa vila mbuli ayi ndo ilingumnojeza Nguluwi. 5 Mdala yafililwe na mlume wa heye, yalihela munhu wa kumtanza, ayo nakamwichila Nguluwi kitumbila kwa heye na kangulutilila kumlanda Nguluwi yamtanze nechilo na nemisi. 6 Ila mdala yafililwe na mlume wa heye na kangulutilila kikala kuli unojenoje, ayo ndo kota kabagama, hanga yang'hali mkomu. 7 Uwalonjele wanhu awa wadite ago, leka waleche koneka wana nongwa. 8 Wone munhu halinguwalolela goya wanhu wa ivyazi lya heye, wala wanhu wa haluga hake, lelo munhu ayo nakagabela makundo, kahi ndo keha ng'hatu kusinda munhu yohambe yamkunde Kilistu.

9 Uleche kumwandika kuli chitabu mdala yafililwe na mlume wa heye yawele hanafika miyaka makumi sita, yawele nayali mche wa mlume yumwe hela, 10 yawele munhu yalingulonjigwa goya na wanhu kwa madito ganojile, yawele nakawalolela wana wa heye goya, yawele nakawabochela wajenzi haluga hake na nakawahovuga magulu wanhu wa Nguluwi na nakawatanza wawele na magazo na nakekangaza kudita mbuli zinojile. 11 Uleche kuwandika wadala wafililwe nwa walume wa hewo wawele wang'hali wahinza, hanji wone maya ga hewo ga lukuli wogana waholeche kahi, wogaluka na womleka Kilistu, 12 nawo kwa chiwalo acho wokoneka wana nongwa na wahela makundo kwa chiwalo cha ilagano lya hewo lya aho mwaluko. 13 Wadala kota awo wangwalukaga kubemela ng'handa mbaka ng'handa, kahi wangwalukaga kuwaheha wanhu, na kiyinjiza kuli mbuli za wanhu wanji, kuno wolonga mbuli zila zohawaganigwe kulonga. 14 Ahyo nangana wadala awo wahesigwe, wawe na wana na walolele ng'handa za hewo leka yehile yaleche kuwa na mhumu ya kulonga mbuli yihile kuwala hetwe. 15 Kwa vila wadala awo na walume wanji nawagalamka na kuliwinza Limazoga. 16 Ila wone mdala yoneche yalingumkunda Kilistu kuli ng'handa ya heye kana wafililwe na walume wa hewo, kanguganigwa kuwatanza, leka yaleche kuchilechela chilundo cha wanhu walingumkunda Kilistu, kudita mijito ayo, leka chilundo cha wanhu walingumkunda Kilistu chidite mijito ja kuwatanza wala wadala wanji wafililwe na walume wa hewo walihela utanzi woneche ula.

17 Vilongozi wa chilundo cha wanhu walingumkunda Kilistu, wanguganigwa watogoligwe mzidi, wala wawele mijito jawo ndo kudamla na kulangusa. 18 Kwa vila Maandiko Matakatifu gangulonga, "Uleche kudinya mlomo wa isenga houdita mijito ya kupulula nyhule," kahi, "Mkola mijito kanguganigwa kulipigwa." 19 Uleche kukunda kubochela nongwa ya sekulu wone hagalavilwe ulolezi wa wanhu weli ama wadatu. 20 Wala walingudita gehile uwang'hanuchile hazelu, leka wanji wadumbe.

21 Ndangukulajiza hali Nguluwi na hali Kilistu Yesu na hali wahilisi wa kilanga welile, mibatilile malajizo aga ne kuleka ne limwe, kahi uleche kumzudila munhu na uleche kumganilila munhu yoneche kwa chila chinhu choulingudita. 22 Uleche kumdita munhu yawe chilongozi himahima kwa chiwalo cha kuwa chitumagwa wa mkulu. Uleche kihanza kuli gehile ga wanhu wanji, ila wikale kuli welile kwa kumnojeza Nguluwi.

23 Kulawa sambi, uleche kunwa mazi hela, ila unwe divai nyindo kwa chiwalo cha munda wa hegwe kwa vila kwangutamika chila mhela.

24 Gehile ga wanhu wanji gangoneka hazelu lowang'hali hilikwa kuli utaguso, ila gehile ga wanji gokoneka hala howohilikwa kuli utaguso. 25 Hihyo du, madito ganojile gangoneka hazelu mbaka gala hagawele ganojile gangoneka hazelu hagoweza kuvisigwa.