1 Heni Paoli, mbele Nguluwi nakagana ndiwe mtumigwa wa Yesu Kilistu leka ndiudamule ula ukomu yoyalagane kuli kilumba na Kilistu Yesu, 2 ndangukwandichila hegwe mwanangu yondikuganile Timoteyi. Ndangukuganila kunoga na isungu na kikala goya kulawila kwa Nguluwi Mhaza na Kilistu Yesu Mkulu wa hetwe.

3 Ndanguta malumbo Nguluwi yula yombele kumkolela mijito kwa nhumbula ilihela nongwa kota vyowaditile wasekulu wa heni, ndanguta malumbo Nguluwi chila hondikumbuchila kuli kulanda kwa heni nechilo na nemisi. 4 Ndangukumbuchila mahozi ga hegwe na ndangugana ng'hatu kukona, leka memezwe usangalalo. 5 Ndangukumbuchila makundo ga hegwe ga kukomya, makundo gonayawele nago papa wa hegwe Loisi na kahi mayako Eunike. Ndangukunda kahi hegwe nagwe kwanago. 6 Ndo mina ndangukukumbusa uidite iwe ipwituche yila ndolendole iwele mgati mwa hegwe, youpegwe na Nguluwi hala hondikuwichile moko wa heni.

7 Mina Muhe wotupegwe na Nguluwi hauwele wa kutudita tuwe tudumba, haiwele ahyo, ila ndo Muhe yalingutugalila mong'ho na igano na kilongoza twetwe. 8 Lelo uleche kona soni kulavya ulolezi kwa chiwalo cha Mkulu wa hetwe, ne uleche kona soni kwa chiwalo cha heni mbele mnweng'hwa kwa chiwalo cha heye. Ila wimilile kilumba kuli magazo kwa chiwalo cha Mbuli Inojile, kota vila ludali loupegwe na Nguluwi. 9 Heye nakatulohola, nakatuchema tuwe wanhu wa heye yuye, haiwele kwa chiwalo cha madito ga hetwe ganojile gotugaditile, ila kwa chiwalo cha majesa ga heye na isungu lya heye. Nakatugalila isungu alyo kukolela Kilistu Yesu kulawa katali isi loing'hali lumbigwa, 10 ila isungu lya Nguluwi, ligubuligwa kwa hetwe sambi kwa kuya kwa heye mlohozi wa hetwe, Kilistu Yesu. Heye kadumya ludali lwa kubagama na kukolela Mbuli Inojile nakaugubula ukomu ulihela kubagama. 11 Heni nyhaguligwa na Nguluwi ndiwe mtumigwa na mlangusa kwa chiwalo cha kudamla Mbuli Inojile, 12 kwa chiwalo acho, ndo mina ndangugazika kota ahi. Silingona soni kwa chiwalo acho, kwa vila ndimzela yula yondimkundile, ndangukomya kota koweza kwamila goya chila choyamhele, mbaka zuwa lila hoyohiluka kahi. 13 Wibatilile goya ula ulanguso wa kukomya wondikulanguse gawe ulajilo kwa hegwe na kupona kuli makundo na igano lyako liwele kuli kilumba na Kilistu Yesu. 14 Vinhu vila vinojile vyoupegwe uvyamile kwa ludali lwa Muhe Yelile yalingikala mgati mwa hetwe.

15 Kota vyouvizelele, wanhu weng'ha walingikala kuli mkowa wa Asiya wandeka, hamwe na hewo wamumo Fugelo na Helimogene. 16 Mkulu yayonele isungu lukolo lwa Onesifolo, kwa vila nakang'hangaza nhumbula chila mhela, kahi nahambonele soni kwa vila nandali mchinweng'ho, 17 ila hala du loyafichile muji wa Loma, nakaluka kumhala lukami mbaka nakambona. 18 Mkulu yamonele isungu kwa zuwa lila lya utaguso! Nagwe kuvizela goya ng'hatu mbuli zila zeng'ha, Onesifolo nazoyanditile kula Efeso.